დეკემბერში ევროპაში ავტომობილების გაყიდვები შემცირდა. ტენდენცია მეექვსე თვეა გრძელდება, რაც მიუთითებს, თუ რა სირთულეების წინაშე დგანან ავტომწარმოებლები ჩიპების მიწოდების კრიზისის გამო.
ევროპის ავტომობილების მწარმოებელთა ასოციაციის ინფორმაციით, გასულ თვეში სამგზავრო მანქანების რეგისტრაციების რაოდენობა 22%-ით შემცირდა. ახალი მანქანების გაყიდვები შარშან 1,5%-ით დაეცა. ეს ყველაზე ცუდი მაჩვენებელია მას შემდეგ, რაც ასოციაციამ დაიწყო ბაზრის მონიტორინგი 1990-იანი წლების დასაწყისში.
თვეების პროგნოზების შემდეგ, რომ ჩიპების დეფიციტი შემცირდებოდა, ავტომწარმოებლების მოლოდინები გაუარესდა. საკმარისი რაოდენობის ნახევარგამტარების შეძენა წელსაც გამოწვევად დარჩება. Renault-მა განაცხადა, რომ დეფიციტი პიკს წლის პირველი ექვსი თვის განმავლობაში მიაღწევდა და შემდეგ თანდათან გაუმჯობესდებოდა.
“2022 წელს ავტომობილების გაყიდვები ისეთივე რთული იქნება, როგორც 2021 წელს. ჩვენ ჯერ კიდევ გვაქვს პანდემია მთელს მსოფლიოში, ისევე როგორც ომიკრონის ტალღა ევროპაში, რომელიც მნიშვნელოვნად ზღუდავს მომხმარებელთა ქცევას”,- განაცხადა პიტერ ფუსმა, EY Automotive Team-ის პარტნიორმა.
გერმანიის უმსხვილესი ავტომობილების ბაზარი დეკემბერში 27%-ით შემცირდა, რამაც BMW-სა და Volkswagen-ის სამშობლო ერთადერთ ქვეყნად აქცია, სადაც წლიური ვარდნა დაფიქსირდა. გაძლიერებულმა პანდემიამ აიძულა მთავრობა, ხელახლა დაენერგა შეზღუდვების სერია და კონტინენტის უდიდესი ეკონომიკა წლის ბოლო კვარტალში 1%-ით შემცირდა.
მიუხედავად იმისა, რომ მიწოდების შეფერხებები სულ უფრო მეტ პრობლემას ქმნის, მწარმოებლები ისარგებლებენ მანქანების მაღალი ფასებით, რადგან როგორც ახალი, ასევე მეორადი მანქანების ხელმისაწვდომობა შეზღუდულია. გასულ წელს, კომპანიების უმეტესობამ წარმატებით გადაიტანა წარმოება უფრო მაღალი დონის, მაღალი მარჟის მქონე მანქანებზე.
“აშკარა შეუსაბამობაა ბაზრის აქტივობასა და ძირითად მოთხოვნას შორის. ჩვენი საბაზისო პროგნოზით, ინდუსტრიაში მიწოდების პრობლემები, ძირითადად, ნახევარგამტარების დეფიციტის გამო, გაგრძელდება, თუმცა ეს გავლენა 2022 წელს თანდათან შემსუბუქდება”,- განაცხადეს LMC Automotive-ის ანალიტიკოსებმა მიმდინარე თვის ანგარიშში.
წყარო: Bloomberg, "ბიზნეს ფორმულა"