ევროკავშირმა პოლიტიკური ნება უნდა გამონახოს, რათა შექმნას ძალები, რომლებსაც სამხედრო ჩარევა აშშ-ის მხარდაჭერის გარეშე შეეძლებათ, - განაცხადა ევროკომისიის პრეზიდენტმა, ურსულა ფონ დერ ლაიენმა ევროპარლამენტში სიტყვით გამოსვლისას.

„ევროპას შეუძლია და აშკარად უნდა შეეძლოს და სურდეს უფრო მეტი გააკეთოს საკუთარი ძალებით. ის, რაც აქამდე გვაბრკოლებდა, არ არის მხოლოდ შესაძლებლობების ნაკლებობა - ეს პოლიტიკური ნების ნაკლებობაა. ევროკავშირს თავდაცვის კავშირი სჭირდება, რომელიც გააძლიერებს ერთობლივ სამხედრო მოქმედებას და გასცდება ევროკავშირის ტრადიციულ რბილ ძალას. ჩვენ ჰიპერკონკურენტუნარიანობის ახალ ეპოქაში შევდივართ - ეპოქაში, რომლის დროსაც ზოგიერთი ყველაფერზე მიდის გავლენის მოსაპოვებლად“, - აღნიშნა ევროკომისიის პრეზიდენტმა.

2 სექტემბერს საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჟოზეფ ბორელმა განაცხადა, რომ ევროკავშირმა სწრაფი რეაგირების ძალა უნდა შექმნას.

მისი თქმით, ევროკავშირმა ქვედანაყოფები უნდა შექმნას, რომელიც უფრო ოპერატიული იქნება, ვიდრე საბრძოლო ჯგუფები.

„უფრო ძლიერი ევროპული თავდაცვის საჭიროება გაცილებით აშკარაა, ვიდრე ოდესმე ყოფილა“, - განაცხადა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა.

1-ელ სექტემბერს ევროპული საბჭოს პრეზიდენტმა, შარლ მიშელმა განაცხადა, რომ ევროკავშირმა ზომები უნდა მიიღოს, რათა უკეთ მოემზადოს თავისი მოქალაქეების სამხედრო ევაკუაციისთვის ისეთ სიტუაციებში, როგორიც ავღანეთში ბოლო კვირების განმავლობაში განვითარდა.

imedinews.ge