ევროკომისია კრიპტოვალუტების ბრუნვის მეტად გაკონტროლების და მათი მეშვეობით ფულის გათეთრების წინაამღდეგ ბრძოლის მიზნით ახალი რეგულაციების შემოღებას აპირებს.
კერძოდ, ევროკავშირის მთელს ტერიტორიაზე ვირტუალური ვალუტების ანონიმური საფულეების აკრძალვას გეგმავს. კანონპროექტის ავტორები მიიჩნევენ, რომ ახალი წესები კრიპტოაქტივების მოძრაობის იდენტიფიცირების და ამ გზით ფულის გათეთრების თავიდან აცილების მეტ საშუალებას იძლევა.
ევროკომისიას სურს, რომ ტრანზაქციების მონაწილეთა შესახებ ინფორმაცია ღია და ყველა გზავნილში დაფიქსირებული იყოს ისე, როგორც ეს დღეს ჩვეულებრივ გზავნილებში ხდება.
რეგულაციების მიზანია კრიპტოვალუტის გამგზავნის და მიმღების იდენტიფიცირება და საჭიროების შემთხვევაში საეჭვო ტრანზაქციების დაბლოკვა.
ზოგადად, ევროკავშირი ბოლო წლების მანძილზე კრიპტოვალუტების მიმართ მკაცრი მიდგომის მომხრეა - მაგალითად, რამდენიმე თვის წინ ახალი კანონი მიიღეს, რომელიც ევროპის ტერიტორიაზე მოქმედ კრიპტობირჟებს საგადასახადო ორგანოებისთვის კლიენტების თაობაზე ინფორმაციის მიწოდებას ავალდებულებს.
თუ ახალი რეგულაციები მართლაც შევა ძალაში, ეს დაარტყამს კრიპტოვალუტების მთავარ უპირატესობას - ანონიმურობას და ტრანზაქციებში შუამავლების არარსებობას. შესაბამისად, ეს ფინანსური ოპერაციების რაოდენობას შეამცირებს, მეორეს მხრივ კი კრიპტოვალუტების ანონიმური ბრუნვის ახალი მეთოდებს გააჩენს.
ამ დროისთვის ევროკავშირში ვირტუალური ფულის მიმოქცევის ანონიმურობის წინაამღდეგ სერიოზული ნაბიჯებია გადადგმული - მაგალითად, 5000 ევროს ღირებულების კრიპტოვალუტის ტრანზაქციებზე აუცილებელია ორივე მხარის იდენტიფიცირება და თანხის წარმომავლობის დადასტურება.
დამატებითი რეგულაციები ბანკებს კრიპტივალუტების წინაამღდეგ ბევრ ახალ ბერკეტს მისცემს - მაგალითად, მათ ვალუტების გაცვლის დაბლოკვა შეეძლებათ იმ შემთხვევაში, თუ კლიენტები აქტივების წარმომავლობის კონტროლის პროცედურას არ გაივლიან.
თუმცა, რეალურ ცხოვრებაში კრიპტოსაფულეების ანონიმურობის აღმოფხვრა ადვილი არ იქნება - მფლობელთა იდენტიფიცირებას ბევრი დრო და რესურსები სჭირდება - სწორედ ამიტომაა კრიპტოვალუტა ასეთი პოპულარული.
ევროპულ რეგულატორებს ალტერნატიული გზაც აქვთ - კლიენტების გაკონტროლება კრიპტობირჟებს დაავალონ. სახელმწიფო ორგანოებს ასევე შეუძლიათ შეზღუდვების შემოღება ისეთ სერვისებზე, როგორც AppStore, Google Play და სხვა ონლაინ-სავაჭრო პლატფომებზე, სადაც მომსახურეობის ანაზღაურება ჩვეულებრივთან ერთად, ვირტუალური ვალუტითაც ხდება.
თუმცა, ანონიმური საფულეების გამოყენების სრული აღმოფხვრა შეუძლებელი იქნება, რადგანაც ასეთ შემთხვევაში კრიპტოვალუტა არსებობის აზრს კარგავს.
kommersant.ru