ამ დროისთვის ევროკავშირის მოსახლეობის 34,4%-ს მინიმუმ ვაქცინის ერთ დოზა აქვს გაკეთებული - იუწყება საიტი Our World in Data.
ეს თითქმის 3-ჯერ მეტია, ვიდრე აპრილის დასაწყისში, როდესაც ეს მაჩვენებელი 12,4%-ს შეადგენდა. ამდენად, ვაქცინაციის წარუმატებელი დაწყების მიუხედავად, ევროპა ლიდერ-ქვეყნებს - ისრაელს (62,%), ბრიტანეთს (55,3%) კანადას (49,7%) და აშშ-ს (48, 2%) სავარაუდოდ, სულ მალე დაეწევა.
პოზიტიურ სტატისტიკას ევროკავშირის პროფილაქტიკის და დაავადებათა კონტროლის ცენტრიც ადასტურებს - მინიმუმ 1 აცრა ევროკავშირის მოსახლეობის 39,6%-მა გაიკეთა. მაშინ, როდესაც აპრილის დასაწყისში - მხოლოდ 15,9%-მა.
ევროკავშირში ვაქცინაციის კუთხით ლიდერები არიან მალტა (60%), უნგრეთი (58,1%), ფინეთი (48,2%), კვიპროსი (46,2%) და ბელგია. აუთსაიდერებს შორის არიან ბულგარეთი (12,7%), ლატვია (23,5%) და რუმინეთი (25,1%).
რაც შეეხება ევროკავშირის 3 უმსხვილეს ეკონომიკას - გერმანიას, საფრანგეთს და იტალიას, ზრდის მიუხედევად, იქ ვაქცინაცია მოსახლეობის ნახევარზე ნაკლებმა გაიარა - საფრანგეთში 38,5%, იტალიაში 39,3%, გერმანიაში 44,3%-მა.
იმუნიზაციის ტემპები ევროპაში ვაქცინისადმი უნდობლობამ ვერ შეანელა - Eurobarometer-ის გამოკითხვის თანახმად, ვაქცინისადმი ყველაზე სკეპტიკური დამოკიდებულება აცრის კუთხით ლიდერ-ქვეყნებშია - კვირპოსზე 84% და უნგრეთში - 80%. როგორც ჩანს, მოსახლეობა პრეპარატებს არ ენდობა, მაგრამ საბოლოო ჯამში ვაქცინაციას პანდემიასთან შედარებით ნაკლებ ბოროტებად მიიჩნევს.
ევროკავშირის ხელმძღვანელობა მიიჩნევს, რომ ვაქცინაციასთან დაკავშირებული პრობლემების დაძლევა მოახერხა. ევროკომისიის თავჯდომარის ურსულა ფონ დერ ლიაინენის თქმით, ივლისის ბოლოსთვის ევროპაში აცრილი ზრდასრული მოსახლეობის 70% იქნება.
შედეგად, ევროკავშირში დაინფიცირების მაჩვენებელმა კლება დაიწყო - 15 აპრილს ეს მაჩვენებელი 100 000 ადამიანზე 331-ს შეადგენდა, 22 მაისს კი - მხოლოდ 104-ს.
მთავარი ფაქტორი, რომელმაც ვაქცინაციის ტემპების მნიშვნელოვანი ზრდა შესაძლებელი გახდა, პრეპარატის მიწოდების გაუმჯობესება გახდა. ვაქცინაციის პროგრამის დასაწყისში ეს პრობლემა იყო, რადგანაც ფარმაცევტული კომპანიები საჭირო რაოდენობის ვაქცინების წარმოებას ვერ ასწრებდნენ.
მაგალითად, AstraZeneca-მ პირველ კვარტალში დაგეგმილი 90 მლნ. დოზის ნაცვლად მხოლოდ 30 მლნ. გამოუშვა.
მარტის ბოლოსთვის მდგომარეობა გაუმჯობესდა, და Barclays-ს პროგნოზით, მეორე კვარტალში ევროკავშირი 376 მლნ., მე-3-ში - 598 მლნ.-ს, ხოლო მე-4-ში - 392 მლნ. დოზას მიიღებს.
ევროკავშირში ვაქცინაციის დაჩქარება ეკონომიკისთვის, განსაკუთრებით კი ტურიზმისთვის ძალიან სასარგებლო იქნება, და კრიზისის შემდეგ აღდგენაში დაეხმარება. ევროკომისიის პროგნოზით, ევროკავშირის ეკონომიკა 2021 წელს 4,2%-ით, ხოლო 2022-ში - 4,4%-ით გაიზრდება.
ეკონომიკის ზრდის მთავარი მამოძრავებელი ძალა იქნება შეზღუდვების მოხსნა, რომელიც ვაქცინაციის ტემპებზე პირდაპირაა დამოკიდებული.
ეს განსაკუთრებით ტურიზმს ეხება - ევროპაში გადაადგილების და მოგზაურობების შეზღუდვების და აკრძალვების მოხსნა უკვე დაიწყეს, რაც ტურისტული სექტორის აღდგენის პირველი ნაბიჯი იქნება.
Rbc.ru
თენგიზ აბლოთია