აშშ–ის ელჩმა საქართველოში კელი დეგნანმა განაცხადა, რომ საქართველოს მთავრობის მიერ ევროკავშირისთვის 75 მლნ–იან სესხზე უარის თქმა, რომლის წინაპირობაც რეფორმების გატარება იყო, მისთვის სიურპრიზი აღმოჩნდა.

ამის შესახებ ამერიკელმა დიპლომატმა 2 სექტემბერს, სასტუმრო „რედისონში“ ამერიკული კულტურის ცენტრის გახსნის ცერემონიაზე განაცხადა.

"ჩვენთვის სიურპრიზი იყო. ცოტა არ იყოს გაკვირვებულები ვართ საქართველოს მთავრობის განცხადებით, რომ არ ჭირდებათ 75 მილიონი ევროს ოდენობის სესხი ევროკავშირისგან პანდემიის მძიმე გავლენის და უმუშევრობის მაღალი დონის მიუხედავად. ამ სესხის დანიშნულება იყო გაეტარებინა საქართველოს მნიშვნელოვანი რეფორმები და მნიშვნელოვანია, რომ საქართველომ არ შეწყვიტოს რეფორმების გატარება. რა თქმა უნდა ამას გამოეხმაურება ვაშინგტონიც. კონგრესი, რა თქმა უნდა უყურებს, რა პროცესები მიმდინარეობს საქართველოში, ჩვენ საკმაოდ ახლო კოორდინაციაში ვართ საქართველოს მთავრობასთან და ვიცით რა სჭირდება საქართველოს. 75 მილიონი ევრო ცოტა ფული არ არის" - თქვა კელი დეგნანმა.

პრემიერ–მინისტრმა ირაკლი ღარიბაშვილმა 1–ელ სექტემბერს გაკეთებულ განცხადებაში ევროკავშირისთვის სესხზე უარის თქმა საგარეო ვალის შემცირების სურვილით ახსნა. მალევე რუსეთის საგარეო საქმეთა მინისტრმა სერგეი ლავროვმა გააკეთა განცხადება, რომ კრემლი მზადაა საქართველოსთან კეთილმეზობლური ურთიერთობებისთვის, თუმცა არა უპირობოდ.

„თუ საქართველოს ნამდვილად არ სურს რუსეთის კარტის გათამაშება დასავლეთის მფარველობის შენარჩუნებისთვის, არამედ სურს ჩვენთან, როგორც მეზობლებთან, ნორმალური ცხოვრება, ჩვენ ამისთვის მზად ვართ ნებისმიერ მომენტში“, - განაცხადა მან მოსკოვის საერთაშორისო ურთიერთობათა სახელმწიფო ინსტიტუტში ცოდნის დღისადმი მიძღვნილ ღონისძიებაზე.

ლავროვის ამ განცხადებასთან დაკავშირებით კელი დეგნანმა ხაზი გაუსვა იმას, რომ საქართველოს რუსეთისგან არაერთი განცხადება მოუსმენია სხვადასხვა დროს, თუმცა ისინი არადამაჯერებელია მანამ, სანამ რუსეთი არ დატოვებს საქართველოს ოკუპირებულ ტერიტორიებს და არ შეასრულებს ნაკისრ ვალდებულებებს.