ევროპასთან ინტეგრაციის კომიტეტის თავმჯდომარის პირველმა მოადგილემ და თემატურ საკითხზე მომხსენებელმა ლევან ქარუმიძემ სატელეკომუნიკაციო მომსახურების სფეროს წარმომადგენლებთან სამუშაო შეხვედრა გამართა. ინფორმაციას პარლამენტის პრესსამსახური ავრცელებს.
ევროკავშირის ერთიან როუმინგულ სივრცესთან საქართველოს მიერთების მიზნით, ევროპასთან ინტეგრაციის კომიტეტი აქტიურ მუშაობას აგრძელებს.
პარლამენტში დღეს გამართულ შეხვედრაში საქართველოში არსებული მობილური ოპერატორების, საქართველოს ეკონომიკისა და მდგრადი განვითარების სამინისტროს და კომუნიკაციების კომისიის წარმომადგენლები მონაწილეობდნენ.
შეხვედრაზე საქართველოს ევროკავშირის ერთიან როუმინგულ სივრცესთან მიერთების შესაძლებლობები განიხილეს და საკითხთან დაკავშირებით, მობილური ოპერატორების მოსაზრებები მოისმინეს.
„ევროკავშირის ერთიან როუმინგულ სივრცესთან საქართველოს მიერთება იქნება კიდევ ერთი ხელშესახები სიკეთე როგორც საქართველოს მოქალაქეებისთვის, რომლებიც ევროკავშირის წევრ სახელმწიფოებს სტუმრობენ, ასევე, საქართველოში მყოფი უცხოელი ვიზიტორებისთვის“, - განაცხადა ლევან ქარუმიძემ.
საკითხზე თემატური მოხსენება ევროკავშირის ასოცირების შესახებ შეთანხმების მხარდაჭერის პროექტის (AA Facility) ფინანსური ხელშეწყობით მომზადდება.
ანგარიში ევროპასთან ინტეგრაციის კომიტეტს წლის ბოლოს წარედგინება.