ევროკავშირს და ბრიტანეთს შორის ვაჭრობის ახალმა სტატისტიკამ ბრიტანელები განარისხა - ბრექსიტის მომხრე ანალიტიკური ცენტრი Facts4EU აცხადებს, რომ ეს მონაცემები ბრიტანეთისადმი ევროკავშირის მტრულ დამოკიდებულებაზე მეტყველებს.

ევროსტატის სტატისტიკის გაანალიზება აჩვენებს, რომ 2021 წლის პირველ 4 თვეში, ბრექსიტის გარდამავალი პერიოდის დასრულების შემდეგ, ბრიტანული ექსპორტი ევროკავშირში გასული წლის ანალოგიურ პერიოდთან შედარებით 27%-ით შემცირდა.

სამაგიეროდ კვლავ მაღალ დონეზეა ბრიტანეთის იმპორტი ევროკავშირიდან. კერძოდ, ევროკავშირმა ბრიტანეთიდან მხოლოდ 35,9 მლრდ. ფუნტის პროდუქცია შემოიტანა, ხოლო ბრიტანეთის იმპორტმა ევროკავშირიდან 75,8 მლრდ. ფუნტი შეადგინა.

ლონდონში განსაკუთრებით გაღიზიანდნენ იმის გამო, რომ პარალელურად ევროკავშირმა რუსეთიდან იმპორტი 12,4%-ით,  32,4-დან 36,5 მლრდ. ფუნტამდე გაზარდა.

Facts4EU-ს ექსპერტმა დევიდ ევანსმა ეს ვითარება აღმაშფოთებლად შეაფასა.

„პუტინის რუსეთმა, რომელიც თითქოს და გარიყული ქვეყანაა და სანქციების ქვეშ იმყოფება, რეალურად ევროკავშირში ექსპორტის კუთხით ბრიტანეთს გაუსწრო. დღეს რუსეთიდან ევროკავშირში იმპორტი მესამე ადგილზეა აშშ-ის და ჩინეთის შემდეგ. რუსეთის ეკონომიკა ბრიტანეთის ეკონომიკის 55%-ს შეადგენს, თუმცა 2021 წელს რუსეთმა ევროკავშირის 27 ქვეყანაში მეტი საქონელი გაყიდა, ვიდრე ჩვენ“, - აღშფოთებულია ევანსი.

მისი თქმით, სავაჭრო დისბალანსს ევროკავშირს და გაერთიანებულ სამეფოს შორის  ხელს 3 ფაქტორი უწყობს. პირველი ისაა, რომ ევროკავშირმა ბრიტანულ პროდუქციაზე საბაჟო კონტროლი მკვეთრად გაამკაცრდა, მაშინ, როდესაც ბრიტანეთმა ევროკავშირის პროდუქციაზე - არა.

მეორე - ლონდონმა ევროპულ კომპანიებს თავის ფინანსურ სექტორში შეუზღუდავი მუშაობის უფლება მისცა, ხოლო ბრიუსელი ინგლისურ კომპანიებს თავის ბაზარზე ბარიერებს უქმნის.

მესამე ფაქტორია ჩრდილოეთ ირლანდიაში ბრიტანული პროდუქციის მიწოდებაზე ბრიუსელის კონტროლის შესუსტება, რის გამოც ევროკავშირი ლონდონს სასამართლოში უჩივის.

ბრექსიტის მოწინაამღდეგეთა ბანაკიდან ამ ციფრებზე მარტივი პასუხი ისმის - „ხომ ხედავთ, ბრექსიტი კატასტროფაა, ჩვენ ხომ გაფრთხილებდით“.

დევიდ ევანსის თქმით, 2 კვირაში ლონდონი ისევ არჩევანის წინაშე დადგება.

„ევროკავშირი ბრიტანული პროდუქციის ჩრდილოეთ ირლანდიაში მიწოდების მნიშვნელოვან გართულებას მოითხოვს. ჩვენმა მთავრობამ ამაზე უარი უნდა თქვას, თუმცა, ისიც უნდა ვიცოდეთ, რომ ამის საპასუხოდ, ბრიუსელი აუცილებლად დაგვარტყამს - სასამართლოში გვიჩივლებს, ბრიტანულ ექსპორტს დაარტყამს, და ა.შ.“, - მიიჩნევს Facts4EU.

სტატისტიკა გვიჩვენებს, რომ ბრიტანეთი, რომელიც ევროკავშირის ერთ-ერთი უმსხვილესი სავაჭრო პარტნიორია, ევროკავშირთან ბორის ჯონსონის მიერ ხელმოწერილი სავაჭრო შეთანხმებისგან ვერანაირ სარგებელს ვერ იღებს.

„მეტიც, ევროკავშირის 27 ქვეყანა ექსპორტს ბრიტანეთში ზრდის. ეს ისედაც ნეგატიურ სავაჭრო ბალანსს კიდევ უფრო აუარესებს. ჩვენ ყოველთვის ვიყავით ევროკავშირთან ვაჭრობაში მსოფლიო სავაჭრო ორგანიზაციის პრინციპებზე გადასვლის მომხრეები და ამ პოზიციაზე დღესაც ვართ. არაერთხელ დაგვიწერია, რომ ევროკავშირი ბრიტანეთთან სამართლიანად არასდროს მოიქცევა, ამიტომაც ბორის ჯონსონის მიერ ხელმოწერილი შეთანხმება ევროკავშირთან აუცილებლად უნდა გადაიხედოს“, - მიიჩნევს დევიდ ევანსი.

წყარო: express.co.uk