ევროკავშირი ოქტომბერში პრაღაში დაგეგმილ სამიტზე დიდი ბრიტანეთის ახალი პრემიერ-მინისტრის, ასევე რამდენიმე ქვეყნის, მათ შორის საქართველოს მიწვევას გეგმავს.
ამის შესახებ ინფორმაციას გამოცემა „გარდიანი“ ავრცელებს.
„გარდიანის“ ცნობთ, სამიტზე განხილული იქნება ახალი ორგანიზაცია, რომელიც ევროპის კონტინენტის დემოკრატიებს გააერთიანებს.
როგორც ევროპული საბჭოს პრეზდენტმა შარლ მიშელმა „გარდიანთან“ და სხვა ევროპულ მედიასაშუალებებთან განაცხადა, მას ეჭვი არ ეპარება, რომ დიდი ბრიტანეთი იქნება მიწვეული ჩეხეთის დედაქალაქში, ჩრდილოეთ ირლანდიის პროტოკოლთან დაკავშირებით სირთულეების მიუხედავად.
გამოცემის ცნობით, ევროკავშირის სამიტზე მიწვეულებს შორის იქნებიან ასევე ნორვეგია და შვეიცარია, აგრეთვე ცხრა ქვეყანა, რომლებიც ევროკავშირის წევრობისკენ მიისწრაფვიან, მათ შორის საქართველო, უკრაინა, მოლდოვა და ბალკანეთის ექვსი ქვეყანა, აგრეთვე სომხეთი და აზერბაიჯანი.
ამასთან, როგორც მედია წერს, ევროკავშირის შიგნით სადავოა სამიტზე თურქეთის მიწვევის საკითხი, რადგან ამას საბერძნეთი და კვიპროსი ეწინააღმდეგებიან. როგორც შარლ მიშელმა ინტერვიუში აღნიშნა, ევროკავშირმა უნდა მიიწვიოს თურქეთი, თუმცა მას სურს, დარწმუნდეს, რომ ამას ყველა კოლეგა უჭერს მხარს.
გამოცემა წერს, რომ შარლ მიშელი საფრანგეთის პრეზიდენტის ემანუელ მაკრონის ახლო პოლიტიკური მოკავშირეა. მაკრონი მიმდინარე წლის მაისში გამოვიდა ევროპული პოლიტიკური საზოგადოების შექმნის იდეით, რომელიც გააერთიანებდა კონტინენტის ყველა დემოკრატიას, მათ შორის უკრაინას და ევროკავშირის წევრობის სხვა ასპირანტებს დასავლეთ ბალკანეთში.
თუმცა, მედიის ცნობით, არსებობს მოსაზრება, რომ ევროპულმა პოლიტიკურმა საზოგადოებამ შესაძლოა, უბრალოდ გაიმეოროს უკვე არსებული გაერთიანებებები, როგორიცაა ევროპის უსაფრთხოებისა და თანამშრომლობის ორგანიზაცია – ეუთო. შარლ მიშელი აღნიშნავს, რომ ლიდერებს სურთ, შექმნან არაფორმალური და ძალიან მოქნილი ორგანო, დიდი შვიდეულის და დიდი ოცეულის მსგავსად.
„ჩვენ არ გვინდა რთული სტრუქტურა“, – განაცხადა შარლ მიშელმა.
პრაღაში ევროკავშირის სამიტი 6 ოქტომბერს არის დაგეგმილი. დიდი ბრიტანეთის ახალი პრემიერ-მინისტრის ვინაობა ხვალ უნდა გახდეს ცნობილი.