ევროკავშირის ერთიანობა მორიგი გამოცდის წინაშეა - ამჟამად მიზეზი ესპანეთია. მადრიდმა, ენერგოკრიზისთან ბრძოლის სტრატეგიის ფარგლებში, ევროკავშირს ახალი ინიციატივა წარუდგინა, რომლის ერთ-ერთი პუნქტიც კავშირის ცალკეული ქვეყნებისთვის ენერგომატარებლებზე ფასების გადახედვის უფლების მინიჭებას გულისხმობს.
ამ მოთხოვნას კატეგორიულად ეწინააღმდეგებიან გერმანია, ავსტრია, ლუქსემბურგი, ჩრდილოეთ ევროპის და ბალტიის ქვეყნები.
„ჩვენ ვეთანხმებით ევროკომისიის დასკვნას იმის თაობაზე, რომ ენერგომატარებლებზე ფასების ამჟამინდელი ზრდის მიზეზია მსოფლიო ეკონომიკის სწრაფი ზრდა და ამის გამო შექმნილი დისბალანსი და არა ევროკავშირის ენერგეტიკული ბაზრების სტრუქტურა ან კლიმატური პოლიტიკა“, - ნათქვამია ამ ქვენების ერთობლივ განცხადებაში ამ საკითხთან დაკავშირებით.
ესპანეთმა ოპონენტებს უპასუხა - ბუნებრივი გაზის 1 მვტ.ს.-ის გაძვირება ნიშნავს ელექტროენერგიაზე დანახარჯების 2,7 ევროთი ზრდას და ყოველდღე ვითარება უარესდება, ამიტომაც მდგომარეობა საგანგებო ზომების მიღებას საჭიროებს.
რამდენიმე დღის წინ ენერგოკრიზისზე ევროკავშირის სპეციალურ სამიტზე იმსჯელეს, თუმცა, კონკრეტული შედეგების გარეშე - შესაბამისად, ევროგაერთიანება კვლავ იმყოფება ენერგეტიკული ქაოსის მდგომარეობაში.
ყველა ქვეყანა ცდილობს ამ ჩიხური მდგომარეობიდან გამოსვლას და გამონაკლისი არც ესპანეთია - მადრიდი საჭიროდ მიიჩნევს ენერგოტარიფების რეგულირებას, რასაც დამატებითი ხარჯები მოჰყვება, მათ შორის ევროკავშირის მხრიდან.
სწორედ ამიტომ ეწინააღმდეგებიან ამ ინიციატივას ევროგაერთიანების სხვა ქვეყნები, რომლებიც მძიმე ვითარების მიუხედავად, სუბსიდირებას, მით უმეტეს, საერთო ყულაბიდან, არ გეგმავენ.
სადღეისოდ ევროკავშირის ქვეყნების პოზიციები კიდევ ერთხელ გაიყო - ჩამოყალიბდა ორი ბანაკი, რომლებიც ამ ეტაპზე ერთიან მიდგომაზე ვერ თანხმდებიან და ეს ევროკავშირს კიდევ უფრო ასუსტებს.
ესპანეთის ინიციატივას მომხრეების ჰყავს - მაგალითად, ისეთი ძლიერი მოთამაშე, როგორც საფრანგეთია. პარიზიც ენერგობაზრის რეფორმირების მომხრეა - საფრანგეთს დღევანდელი კრიზისი შედარებით მსუბუქად გადააქვს, რადგანაც მისი ენერგობალანსის 70% ატომურ ენერგეტიკაზე მოდის, შესაბამისად, გაზზე და ნავთობზე მისი დამოკიდებულება სხვა ქვეყნებთან შედარებით ბევრად უფრო დაბალია.
თუმცა, ისიც ზარალდება სწორედ ევროკავშირში ელექტროენერგიაზე ცენტრალიზებული ფასწარმოქმნის გამო. შედეგად, საფრანგეთში, სადაც ენერგომატარებლების დეფიციტი თითქმის არ არსებობს, ენერგია მაინც ძვირდება.
ქვეყნის პრეზიდენტმა ემანუელ მაკრონმა განაცხადა, რომ ეს ევროკავშირის ერთიანობას და ამავე დროს ევროკავშირის მოქალაქეების ნდობას „მწვანე ინიციატივებისადმი“ ძირს უთხრის.
ამ დროისთვის ევროკავშირში კიდევ ერთი საკამათო ინიციატივა მუშავდება - კერძოდ, გაზის ერთიანი შესყიდვა.
სავარაუდოდ, ამ იდეასაც მოწინააღმდეგეები გამოუჩნდებიან - ზოგიერთი ქვეყანა ენერგომატარებლებს ევროკავშირის საშუალი ფასზე იაფად იღებს და მათთვის ცენტრალიზებული შესყიდვა საზიანო იქნება.
როგორც ყოველთვის, კრიზისის დროს ყველა მხოლოდ საკუთარ თავზე ფიქრობს და ევროკავშირის პერსპექტივისთვის ეს აშკარად ცუდი ამბავია.
express.co.uk