ევროკავშირმა ჩინეთს მოუწოდა ბრიტანული მედიაკომპანიისთვის BBC World News-ისთვის ჩინეთში მაუწყებლობაზე დაწესებული აკრძალვა მოეხსნა.
ევროკავშირის განცხადებაში ნათქვამია, რომ ჩინეთის გადაწყვეტილება "კიდევ უფრო ზღუდავს გამოხატვის თავისუფლებას და ინფორმაციაზე წვდომას ჩინეთის საზღვრებში" და არღვევს როგორც ჩინეთის კონსტიტუციას, ასევე ადამიანის უფლებათა საყოველთაო დეკლარაციას.
განცხადებაში ასევე აღნიშნულია, რომ ჰონგ-კონგის საზოგადოებრივი მაწყობლის მიერ BBC-ს გადაცემების შეჩერება "უფლებების და თავისუფლებების ეროზიაა", რომელიც ჩინეთის ავტონომიურ რეგიონში გასულ წელს უშიშროების ახალი კანონის მიღების შემდეგ გრძელდება.
"ევროკავშირი რჩება მედიის თავისუფლების და პლურალიზმის, გამოხატვის თავისუფლების დაცვის, საკუთარი აზრის ქონის უფლების და შეზღუდვების გარეშე ინფორმაციის მიღების და გაზიარების უფლების დაცვის ერთგული." – ნათქვამია განცხადებაში.
ჩინეთში BBC მოსახლეობისთვის უკვე შეზღუდული იყო და მხოლოდ ინტერნაციონალურ სასტუმროებში ხდებოდა მისი მაუწყებლობის მიწოდება.
ჯერერჯერობით გაურკვეველია, იმოქმედებს თუ არა აკრძალვა ჩინეთში მომუშავე BBC-ის ჟურნალისტებზე. გასულ, წელს აშშ-სთან დაძაბული ურთიერთობების ფონზე და მმართველი კომუნისტური პარტიის კრიტიკის შემდეგ, ჩინეთიდან უცხოური მედიის The Washington Post-ს, The Wall Street Journal-ს და The New York Times-სჟურნალისტები გააძევეს.
2021 წლის 4 თებერვალს ჩინეთის საგარეო საქმეთა სამინისტრომ უკმაყოფილება გამოთქვა იმასთან დაკავშირებით, თუ როგორ აშუქებდა BBC ჩინეთის მთავრობის რეაგირებას კოვიდ-19 პანდემიის მიმართ და კომპანია ცრუ ინფორმაციის გავრცელებაში დაადანაშაულა.
ჩინეთის მთავრობა ასევე შეშფოთებული იყო BBC-ის მიერ უიღურთა“გამოსასწორებელი” ბანაკების სიტუაციის გაშუქებით. ბრიტანული მაუწყებლობის ცნობით, ბანაკებში ქალთა სისტემატიური გაუპატიურება, სექსუალური შევიწროება და წამება მიმდინარეობდა. ჩინეთის მთავრობის თქმით, BBC სინძიანის უიღურთაავტონომიური რეგიონის შესახებ ცრუ ინფორმაციას ავრცელებდა. ჩინეთში უიღურთა ეთნიკური ჯგუფი უკვე მრავალი წელია, რაც მთავრობის მიერ შევიწროების მსხვერპლია.
ბრიტანული მაუწყებლობის წარმომადგენელთა შეფასებით, ისინი მუდამ მიუკერძოებელ და ფაქტებზე დაფუძნებულ სიახლეებს ავრცელებდნენ.
“იმედგაცრუებულები ვართ, რომ ჩინეთის მთავრობამ მსგავსი გადაწყვეტილება მიიღო. BBC მსოფლიოში საერთაშორისო სიახლეების ყველაზე სანდო მაუწყებელია”. - ამბობს BBC-სწარმომადგენელი.
აღსანიშნავია, რომ ჩინეთის მთავრობამ ეს გადაწყვეტილება მას შემდეგ მიიღო, რაც ბრიტანეთის მასმედიის მაკონტროლებელმა ორგანო Ofcom-მა, გაერთიანებულ სამეფოებში ჩინურ ტელეკომპანია CGTN-ს მაუწყებლობის ლიცენზია შეუწყვიტა.
Ipn.ge