„ევექსის“ კლინიკების ქსელში ფატალური შემთხვევები არ წყდება

„ევექსის“ კლინიკების ქსელში ფატალური შემთხვევები არ წყდება

access_time2019-10-17 14:45:10

ხაშურის განახლებული რეფერალური ჰოსპიტალი გთავაზობთ მრავალპროფილურ მომსახურებას - სწორედ ამ სიტყვებით ჯერ კიდევ ცოტა ხნის წინ  ამცნო  „ევექსმა“ ადგილობრივებს მორიგი კლინიკის რეაბილიტაცია და პაციენტებს უახლეს აპარატურასა და პროფესიონალების მომსახურებას სთავაზობდა. 3 თვის თავზე კი კლინიკის სახელი  უმძიმეს ტრაგედიასთან ასოცირდება, რაც მათივე აღიარებით ექიმების არაკვალიფიციურობამ გამოიწვია.


15 ოქტომბერს ხაშურის სამშობიარო სახლში დედისა და ჩვილის გარდაცვალების პირველადი მიზეზი, როგორც  შპს „ახალი კლინიკის“ დირექტორმა კახა ხელაძემ მედიასთან განმარტა, მედპერსონალის მხრიდან „მათი მდგომარეობის შეფასებისა და გადაწყვეტილების ნაწილში გადაცდომა“ იყო. ინგა კაკიაშვილისთვის ეს იყო მეხუთე მშობიარობა,  მას ოთხი მცირეწლოვანი ბავშვი დარჩა. გარდაცვლილის ახლობლები იხსენებენ, თუ როგორ ითხოვდა მშობიარე მისთვის საკეისრო კვეთა ჩაეტარებინათ, რაზეც ექიმებმა უარი თქვეს.


სამედიცინო კატასტროფები, რომელთა მიღმაც გაუმართავი ტექნიკა ან არაკვალიფიციური მედპერსონალი იდგა, ბოლო პერიოდის განმავლობაში არც ისე ცოტა ახსოვს საზოგადოებას.


  • თებერვალში 16 წლის ლუკა ფოფხაძე რეანომობილის გაუმართაობის გამო 41 დღის განმავლობაში კომაში იყო და 41-ე დღეს გარდაიცვალა.მანქანით ტრანსპორტირებისას წარმოშობილი სამედიცინო ხარვეზების შედეგად ვითარება რადიკალური გახდა - მოზარდს ჟანგბადი არ მიეწოდებოდა, რის გამოც მას  ტვინი გაეთიშა.ბავშვის ხელოვნური სუნთქვის აპარატზე მიერთება დროულად ვერ მოხდა და ამიტომ მას მექანიკურად მართავდნენ. შემდეგ გადაიყვანეს დროებით ტყიბულის „ევექსის“ კლინიკაში, საიდანაც 4 საათში ქუთაისში, ცხაკაის სახელობის დასავლეთ საქართველოს ინტერვენტული მედიცინის ცენტრში მოათავსეს. ყველა ამ დაწესებულებაში  გარკევული დარღვევები დაფიქსირდა - პაციენტის მართვასთან დაკავაშირებით, ჩანაწერებთან მიმართებაში... ასევე გამოიკვეთა უკანონო საექიმო საქმიანობა.

 

  • ყვარლის ჰოსპიტალში 56 წლის ბესიკ იაშვილს, რომელიც კლინიკაში გულის შეტევით მიიყვანეს, დახმარება ვერ აღმოუჩინეს, რადგან როგორც გარდაცვლილის ოჯახის წევრები ამბობენ, ამის რესურსი საავადმყოფოში არ არსებობს. პაციენტის მძიმე მდგომარეობის გამო, ექიმებმა რეანომობილი გამოიძახეს და ბესიკ იაშვილის სასწრაფოდ სხვა კლინიკაში გადაყვანა გადაწყდა, თუმცა, კატასტროფის ბრიგადა ადგილზე 6 საათის განმავლობაში არ ჩავიდა. ამ დროის განმავლობაში მდგომარეობა დამძიმდა და 56 წლის მამაკაცი რეალურად სამედიცინო დახმარების გარეშე გარდაიცვალა. პაციენტების ნაამბობიდან ირკვევა, რომ ყვარელს საავადმყოფო რეალურად არ აქვს და ათასობით ადამიანის სიცოცხლე ამ მუნიციპალიტეტში საფრთხეშია. ეროვნული ჰოსპიტალი „ევექსის“ სამედიცინო ჯგუფს ეკუთვნის.


  • მარტში ექიმების გულგრილობამ 29 წლის მელანო ფუტკარაძის სიცოცხლე შეიწირა. გოგონა ბრმანაწლავთან დაკავშირებულ პრობლემაზე ბათუმის რეფერალურ საავადმყოფოში გადაიყვანეს, საიდანაც მისი გაწერა მოხდა. მდგომარეობის გართულების შემდეგ კი კლინიკა „მედცენტრში“ აღმოჩნდა, თუმცა მისი გადარჩენა ვერ მოხერხდა.


ეს მცირე ჩამონათვალია იმ ტრაგიკული სამედიცინო შემთხვევების, რამაც საზოგადოებაში ხმაური გამოიწვია. ვის ეკისრება პასუხისმგებლობა უყურადღებოდ დარჩენილი პაციენტის სიცოცხლის ფატალურ დასასრულზე - ექიმებს, საავადმყოფოს, თუ სისტემას და  რაც მთავარია, რაშია გამოსავალი? 


„კომერსანტი“ კლინიკებში მომხდარ მსგავს შემთხვევებთან დაკავშირებით დიდი ხანია სხვადასხვა ფაქტებსა და მოსაზრებებს აშუქებს.  ამ პერიოდში განსაკუთრებულ ყურადღებას იქცევს ის, რომ გარდაცვლილი პაციენტების უმეტესობა საქართველოში უმსხვილესი სამედიცინო კორპორაციის „ევექსის“ პასუხისმგებლობის ქვეშ იყო.  


„საქართველოს ჯანდაცვის ჯგუფი“ , რომლის მფლობელობაშიცაა სამედიცინო კორპორაცია  „ევექსი“ ,  პირველი ჯანდაცვის ჰოლდინგია რეგიონიდან, რომელმაც 2015 წელს ლონდონის საფონდო ბირჟის პრემიუმ ლისტინგში აქციები წარმატებით განათავსა,  რითაც 100 მილიონი დოლარის მოცულობის ახალი კაპიტალი მოიზიდა.


რას მოხმარდა ეს  100 მილიონი, თუ არა მედპერსონალის კვალიფიკაციის ამაღლებასა და უახლესი ტექნოლოგიების დანერგვას კლინიკებში?  ამ 4 წლის მანძილზე პაციენტების სიკვდილიანობის სტატისტიკა მზარდია, კორპორაციის რესურსი კი საკმაოდ დიდი , აქედან გამომდინარე, რამდენი დაიხარჯა მედიკოსების კვალიფიკაციის ამაღლებაზე ? - ეს ის კითხვებია, რაც „კომერსანტმა“  „ევექსს“ - დაუსვა, კორპორაციის წარმომადგენლობა აცხადებს, რომ გადამზადება მუდმივად მიმდინარეობს, თუმცა, კონკრეტულად რა პერიოდულობით და ხარისხით, ამასთან დაკავშირებით ინფორმაცია არ მოუწოდებიათ. 


„პერიოდულ რეჟიმში მუდმივად წარმოებს მედიკოსების გადამზადებები. ახლა არ გვაქვს საშუალება მოგაწოდოთ ზუსტი ინფორმაცია, თუ რა თარიღები აწერია სერთიფიკატებს, მაგრამ უზარმაზარი ინვესტიცია განხორციელდა მთლიანად კლინიკაში, როგორც მატერიალურ ტექნიკური ბაზის, ისე ადამიანური რესურსის გაუმჯობესებაზე.  კონკრეტული თანხების დასახელების უფლებამოსილება კი ნამდვილად არ გვაქვს“ აღნიშნავს ხაშურის საავადმყოფოს დირექტორი კახა ხელაძე. 



როგორც „კომერსანტს“ სამედიცინო საქმიანობის სახელმწიფო რეგულირების სააგენტოში განუცხადეს, ხაშურის ჰოსპიტალში მომხდარ შემთხვევასთან დაკავშირებით ჯერჯერობით უწყება სასამართლოდან ბრძანებას ელოდება, რის შემდეგაც მოხდება ფაქტის გამოკვლევა.


აქვე უნდა აღინიშნოს, რომ ექიმის გულგრილობის თუ დარღვევის ფაქტის გამოვლენის შემთხვევაში მას მხოლოდ და მხოლოდ  1 დან 6 თვემდე უჩერდება სერთიფიკატის მოქმედების ვადა და ის ვერ შეძლებს სამედიცინო მომსახურების გაწევას, უკიდურეს შემთხვევაში კი სერთიფიკატის ჩამორთმევა ხდება.


„ჯერ ხაშურში არ შევსულვართ, რა მოხდა არ ვიცით და ველოდებით სასამართლოდან ბრძანებას.  გუშინწინ შუამდგომლობა გამზადდა და ჩაბარებულია სასამართლოში, სანამ სასამართლოდან ბრძანება არ მოვა ვერაფერს გავარკვევთ.“


„კომერსანტი“ დაინტერესდა წინა შემთხვევების მოკვლევის შედეგებითაც, რაზეც რეგულირების სააგენტოში განგვიცხადეს, რომ ექიმისთვის ლიცენზიის ჩამორთმევის ხანგრძლივობაც და პაციენტის გარდაცვალების კონკრეტული მიზეზებიც ექიმისა და ოჯახის ოფიციალური თანხმობის გარეშე კონფიდენციალურ ინფორმაციას წარმოადგენს.


თუმცა, ლუკა ფოფხაძის ოჯახის ცნობით, პროფესიული საბჭოს გადაწყვეტილებით, შპს „ემერჯენსი სერვისის“ ექიმს, ხათუნა გელაშვილს შეუჩერდა სახელმწიფო სერტიფიკატის მოქმედება მხოლოდ სამი თვის ვადით და დაევალა კვალიფიკაციის კურსის გავლა.

 

„ლუკა ფოფხაძის ამბავი დასრულებულია, დადგა რამდენიმე ექიმის პასუხისმგებლობის საკითხი, თუმცა, რას გულისხმობს ეს პასუხისმგებლობა, ვერ გავაჟღერებთ, უშუალოდ მათი თანხმობის გარეშე. ექიმების პერსონალური მონაცემია ის, თუ  ვის რამდენი ხნით შეუჩერდა სერთიფიკატის მოქმედების ვადა.


ექიმების საქმიანობის შეჩერება შემდეგნაირად ხდება, შეიძლება იყოს ერთიდან ექვს თვემდე სერთიფიკატის შეჩერება ან საერთოდ გაუქმება, ამას წყვეტს საბჭო. ვის რა დარღვევა ჰქონდა, რა არ გაკეთდა და რა შეიძლებოდა გაკეთებულიყო  - ეს ყველაფერი ჯამდება.“ - აცხადებენ რეგულირების სააგენტოში


ცუდი მომსახურება კლინიკებში, არასათანადო სადამსჯელო ღონისძიებები არაკვალიფიციური მედპერსონალის მიმართ, რომელიც მინიმუმ 7 წლის მანძილზე მედიცინის სფეროს ეუფლება, არასათანადო ტექნიკური აღჭურვილობა  ეს ის მიზეზებია, რაც პაციენტის მხრიდან სამედიცინო სექტორის მიმართ უნდობლობას იწვევს. კვლავაც ისმის კითხვა, ვის ეკისრება პასუხისმგებლობა და რაშია გამოსავალი? საკითხზე მოსაზრება „კომერსანტმა“ სამედიცინო ექსპერტს სთხოვა. 


„კლინიკებში ცუდი ხარისხის მომსახურება არის საკმაოდ ძვირად. ამ ყველაფერში, სახელმწიფოს როლი არის ის, რომ ხარისხი შეამოწმოს. სამედიცინო მომსახურების ხარისხის რეგულირების ჩარჩო, რომლის გაკეთებასაც სახელმწიფო წლებია აპირებს, ამ დრომდე არ გაუკეთებია. აუცილებელია, არსებობდეს რამე ერთიანი რეგულირების ჩარჩო, მერე ყველა კლინიკა ამას დაექვემდებარება  და ნებისმიერი გადახრა ამ ხარისხის მაჩვენებლიდან გამოიწვევს მათ დაჯარიმებას, მათთვის ლიცენზიის ჩამორთმევას. იმედია ამის შემდეგ მაინც კლინიკა იზრუნებს იმაზე, რომ ხარისხი გააუმჯობესოს.“-  ასე აფასებს ხაშურის ჰოსპიტალში მომხდარ ტრაგედიას სამედიცინო ექსპერტი სერგო ჩიხლაძე.


ჩიხლაძე საუბრისას ხაზს უსვამს ჯანდაცვის სისტემაში წლების მანძილზე მოუგვარებელ სისტემურ პრობლემებს, რეფორმების არაეფექტურობასა და ბიუროკრატიულ ხარვეზებს.


„აუცილებელია ძირეული რეფორმები, ხოლო  ამ რეფორმის შუაგულში უნდა იყოს პაციენტი და ექიმი და არა ვიღაცის ვიწრო კომერციული ინტერესები.


სანამ სისტემა არ გაჯანსაღდება, ყოველთვის ცუდი შედეგები გვექნება და ყოველთვის გვექნება სიკვდილიანობის ასეთი მაჩვენებელი. კვალიფიკაციის სერიოზული პობლემები დიდი ხანია ჯანდაცვის სისტემაში არსებობს. სისტემის ნაკლოვანებიდან გამომდინარეა, რომ ექიმს არ აქვს მოტივაცია, რომ კვალიფიკაცია აიმაღლოს. როდესაც ამბულატორიის ექიმს 200-300 ლარი აქვს ხელფასი და იმასაც სახელმწიფო უგვიანებს, რა მოტივაციაზეა საუბარისახელმწიფო არ ზრუნავს ექიმის გადამზადებაზე, კლინიკაც არ არის დაინტრესებული, რომ ამაში თანხები გადაიხადოს.


ხარისხი დავარდა, არათანაბარზომიერი ხელმისაწვდომობაა სამედიცინო სერვისებზე, წამლების ფასები გაიზარდა. ფინანსურად გაიზარდა ბიუჯეტი, მაგრამ  არის სექტორები, სადაც კატასტროფული გადახრჯვები გვაქვს და არის პროგრამები, რომელთა ათვისება ვერ ხდება.  ადამიანები უწამლობით  იღუპებიან ქვეყანაში და ამ დროს მედიკამენტების პროგრამა გვაქვს, რომლის ათვისება ხან 6 პროცენტია, ხან 10 პროცენტი. აბსოლუტურად გულგრილობა და ცუდი მენეჯმენტია გამეფებული“  - აცხადებს სერგო ჩიხლაძე

 


მარიამ მორგოშია




ჩვენ არ გვაქვს ცუდი შედეგები, 5%-იან ეკონომიკურ ზრდას უამრავი ქვეყანა ინატრებდა-დეპუტატები IRI-ს კვლევას აფასებენ

ჩვენ არ გვაქვს ცუდი შედეგები, 5%-იან  ეკონომიკურ ზრდას უამრავი ქვეყანა ინატრებდა-დეპუტატები IRI-ს კვლევას აფასებენ
access_time2019-11-19 20:10:10
„IRI- კვლევებს დიდ პატივს ვცემ მაგრამ იმ ხალხს ვინც საქართველოში სამუშაოებს ასრულებს მე მათი კვლევების არ მჯერა, რადგან შედეგები არასდროს გამართლებულა“ -ასე აფასებს საფინანსო-საბიუჯეტო კომიტეტის თავმჯდომარის პირველი მოადგილე პაატა კვიჟინაძე საერთაშორისო რესპუბლიკური ინსტიტუტის კვლევას, რომლის მიხედვითაც გამოკითხულთა 80% მიიჩნევს, რომ მათი უმთავრესი პრობლემებად უმუშევრობა, საცხოვრებელი ხარჯები და სიღარიბეა.   რატომ ვერ მიიღო მოსახლეობამ...

„საქართველოს ბანკი“- ახლო მომავალში ლარი იმ ნიშნულს დაუბრუნდება, რომელიც მის გაცვლით კურსს რეალურად ასახავს“

„საქართველოს ბანკი“- ახლო მომავალში ლარი იმ  ნიშნულს დაუბრუნდება, რომელიც  მის გაცვლით კურსს რეალურად ასახავს“
access_time2019-11-19 18:35:56
„საქართველოს ეკონომიკა ბოლო მონაცემებითაც აჩვენებს ისეთ შედეგებს, რომელიც მყარ საფუძველს იძლევა, იმისთვის რომ ლარი ახლო მომავალში დაუბრუნდება ნიშნულს, რომელიც რეალურად ასახავს მის გაცვლით კურსს“--ამის შესახებ „კომერსანტს“  „ საქართველოს ბანკის“ გენერალური დირექტორის მოადგილე სულხან გვალიამ განუცხადა.  მისივე განმარტებით,  ყველა კვლევაც ასე აჩვენებს, ლარის კურსი დაახლოებით 10%-ით მეტადაა გაუფასურებული. „აქვე, ერთმნიშვნელოვნად უნდა...

„ნამახვანი ჰესის მშენებლობა წყალტუბოს განვითარების გეგმას ჩააგდებს“

„ნამახვანი ჰესის მშენებლობა წყალტუბოს განვითარების გეგმას ჩააგდებს“
access_time2019-11-19 18:00:17
„როდესაც ქვეყანაში ისეთი პროექტების მშენებლობა გრძელდება, რომელიც გარემოს აზარალებს, ჩნდება ეჭვი, რომ მსგავსი დიდი პროექტების მეშვეობით ქვეყანაში ფული თეთრდება“- ამის შესახებ „კომერსატს“ არასამთავრობო ორგანიზაცია ”მწვანე ალტერნატივის” ბიომრავალფეროვნების კოორდინატორმა ირაკლი მაჭარაშვილმა განუცხადა. მისი თქმით, წყალტუბოს განვითარებაც შეიძლება ასეთ საკითხად მივიჩნიოთ თუ წინასწარ არ იქნა მისი დადებითი და უარყოფითი შედეგები...

ბრონქიტი -როგორ ავიცილოთ თავიდან გართულებები?

ბრონქიტი -როგორ ავიცილოთ თავიდან გართულებები?
access_time2019-11-19 14:30:24
ბრონქების ლორწოვანი გარსის ანთებას ბრონქიტი ეწოდება, რომელის ყველაზე ხშირი მიზეზიც ვირუსული ინფექციაა. კორონავირუსებს, რომლებიც ამ დაავადებას იწვევენ,ბევრი საერთო აქვთ გრიპისა და ატოპიური პნევმონიის გამომწვევ ვირუსთან. ერთი შეხედვით გარეგნულად სრულიად უწყინარი , თუმცა უკიდურესად სახიფათო არიან. გერმანელი სპეციალისტების გამოთვლით , ზამთრის სეზონზე მხოლოდ გერმანიაში გაციებისა და მისი გართულების შედეგად 12 ათასი ადამიანი იღუპება! ბრონქიტი ნამდვილად ეპიდემიად იქცა, რამდენადაც...

„სოკარს“ არ ვაწყენინოთ? - რატომ გადაიდო დიზელის საწვავზე „ევრო 5“-ის სტანდარტის ამოქმედება?

„სოკარს“ არ ვაწყენინოთ? - რატომ გადაიდო დიზელის საწვავზე „ევრო 5“-ის სტანდარტის ამოქმედება?
access_time2019-11-19 16:10:05
„აქ არ იყო მთავარი მხოლოდ ის, რომ სტრატეგიულ პარტნიორს და „სოკარს“ არ ვაწყენინოთ, აქ მნიშვნელოვანი სოციალურ ეკონომიკური ფაქტორი იკვეთება. „სოკარი“ ცალსახად არის მნიშვნელოვანი ინვესტორი და ეს ფაქტორიც გასათვალისწინებელია, თუმცა ამით ეკოლოგიური მდგომარეობა არ უარესდება“, - ასე აფასებს  „ნავთობპროდუქტების იმპორტიორთა კავშირის“ თავმჯდომარე ვანო მთვრალაშვილი დიზელის საწვავზე „ევრო 5“ სტანდარტის ამოქმედების 2021 წლამდე გადავადებას. დიზელის ახალი „ევრო 5“ სტანდარტის...


მსგავსი სიახლეები

up