სს „ევექსის ჰოსპიტლებმა“ მიმდინარე წლის პირველი ნახევარი 4.5 მლნ ლარის მოგებით დაასრულა, რაც 2021 წლის 6 თვის მონაცემებთან შედარებით თითქმის 76%-ით შემცირებული მაჩვენებელია, წინა წელს აღნიშნული კომპანიის მოგება 19.4 მლნ ლარი იყო.
2022 წლის 30 ივნისის მდგომარეობით, კომპანიის აქტივები 581 მლნ ლარი იყო, სულ საკუთარი კაპიტალი კი 319 მლნ ლარი. სს „ევექსი ჰოსპიტლების“ საერთო შემოსავალმა 6 თვეში 54 მლნ ლარს გადააჭარბა, რაც წინა წლის ანალოგიურ პერიოდთან შედარებით დაახლოებით 7 მლნ ლარით ნაკლებია.
ფინანსური ანგარიშგებების მიხედვით, კომპანია ფლობს 16 ჰოსპიტალს ჯამში 2,524 საწოლით. შემოსავალი სამედიცინო მომსახურებიდან კი 149,557,000 ლარი იყო, მოგების გადასახადის, ცვეთის და ამორტიზაციის დარიცხვამდე კი 31,678,000 ლარი.
2022 წლის 30 ივნისის მდგომარეობით ჯგუფის ძირითადი საშუალებების საბალანსო ღირებულება 393,334 ლარია (2021 წ.: 404,755 ლარი). კომპანიის ძირითადი საშუალებების თვითღირებულება 2022 წლის 30 ივნისის მდგომარეობით 503,275 ლარს შეადგენდა (2021 წ.: 502,994 ლარი), ხოლო დაგროვილი ცვეთა 109,941 ლარს (2021 წ.: 98,239 ლარი).
„ევექსი ცდილობს რაც შეიძლება გააფართოვოს შემოსავლის წყაროები და, ამ გზით, შეამციროს დამოკიდებულება საყოველთაო ჯანდაცვის პროგრამაზე. ამ მიზნით ჩვენ განვაგრძნობთ გეგმიური და შერჩევითი სერვისების რიცხვის ზრდას“, — აღნიშნულია ფინანსურ ანგარიშგებაში.
სს „ევექსი ჰოსპიტლები“ არის 2014 წლის 1 აგვისტოს დაფუძნებული სააქციო საზოგადოება. ჯგუფი სამედიცინო მომსახურებას უწევს სტაციონარულ და ამბულატორიულ მომხმარებლებს საქართველოს სხვადასხვა კუთხეში არსებული საავადმყოფოების ქსელის მეშვეობით. 2022 წლის 30 ივნისისა და 2021 წლის 31 დეკემბრის მდგომარეობით, ევექსის 100%-იანი წილის მფლობელი იყო სს „საქართველოს ჯანდაცვის ჯგუფი“. კომპანიისა და მისი შვილობილი კომპანიების საბოლოო მშობელი კომპანია იყო ინგლისში, ლონდონში, დაფუძნებული საჯარო სააქციო საზოგადოება „ჯორჯია კაპიტალი“.