1 ივლისს თელავში, სოფელ კურდღელაურში ახალი თაობის ბუტიკ-კონცეპტუალური ქართული ბრენდის სასტუმრო ესკიზი გაიხსნა. როგორც სასტუმროს მფლობელი ნოკა თორაძე „კომერსანტთან“ აღნიშნავს ესკიზის შექმნა მეცნიერების, კულტურის და შემოქმედების შეხვედრას და ერთიანი ატმოსფეროს შექმნას ისახავს მიზნად.
სასტუმროში წარმოდგენილია 57 კონცეპტუალური ოთახი, რაც იმას ნიშნავს, რომ ყველა ნომერში სხვადასხვა დეკორაცია და კულტურულ კონცეფციას ატარებს. სასტუმრო განთავსებულია 6500 კვადრატულ მეტრ ფართობზე, მიწის ნაკვეთში შედის არა მარტო ესკიზის შენობა, არამედ კახური სახლიც.
სექტემბრიდან კი ბრენდის სასტუმრო თბილისში, ჩუბინაშვილის ქუჩაზეც გაიხსნება.
ესკიზი მოვაქციეთ ერთ ბრენდის ქვეშ - ჯერჯერობით არის თელავში, მალე იქნება თბილისში და ვაპირებთ „ესკიზი გუდაურის“ რებრენდინგსაც.
ბრენდის სახელი და ლოგო დაკავშირებულია თბილისში მდგარ შენობასთან, ეს შენობა მეცხრამეტე საუკუნეში იქნა აგებული და იყო საზოგადოებრივი სახლი, სადაც ხშირად ხდებოდა შეკრებები ლიტერატურაზე და ძალიან კულტურულ-ესსთეტიური შეხვედრები. ესკიზის ლოგოსა და კონცეფციის შთაგონება სწორედ საზოგადოებრივი და საგანმანათლებლო სახლი გახდა.
თელავში ამჟამად საცურაო აუზი და ორნაირი რესტორანი გვაქვს, ქვევით არის მარნის რესტორანი და პატარა ვენახი.
დიზაინი უფრო მიმართულია კულტურულ და მშვიდ დასვენებაზე, ასოცირდება ღვინოსთან, წიგნებთან, ლიტერატურასთან. თელავის სასტუმროში გვაქვს ბიბლიოთეკაც,“ - განმარტავს ნოკა თორაძე.
სასტუმროს გეგმებზე გლობალურმა პანდემიამ მნიშვნელოვნად იმოქმედა, რადგანაც თავდაპირველი საფასო ზღვარი, კრიზისის გამო შეიცვალა და ამჟამად სტანდარტული ნომერი 80 დოლარი ღირს.
„რადგანაც მსოფლიო კრიზისია, ყველა სასტუმროს მსგავსად მოგვიწია ფასების დაწევა. სეზონზე ვფიქრობდით დაგვედო 120 დოლარი ორ ადგილიან სტანდარტულ ნომერზე, თუმცა კრიზისის გამო ფასები შემცირდა და 80 დოლარი გახდა. ვცდილობთ გავითვალისწინოთ ბაზრის ფასები და სეგმენტი.
იმის მიუხედავად, რომ ძალიან აგრესიული მარკეტინგით არ გვისარგებლია, სტუმრები გვყავდა გახსნისთანავე,“ - აღნიშნა ნოკა თორაძემ.
თბილისში სასტუმროს ნომრების გახსნისგან თავს იკავებს ბრენდის მფლობელი თუმცა სექტემბრიდან სხვადასხვა სივრცეების გახსნას გეგმავს.
„თბილისში თავდაპირველად Esquisse-ის სასტუმროს სივრცეები, რესტორანი, ლობი, ბარი გაიხსნება, რადგან თბილისში ნომრების გახსნას აზრი არ აქვს და თავს ვიკავებთ. თუმცა პირველი სექტემბრიდან ეს ყველაფერი ხელმისაწვდომი იქნება“ - ამბობს Esquisse-ის მფლობელი.
მარიამ მორგოშია