გამორჩეული არქიტექტურა, კარგი კლიმატი, უგემრიელიესი სამზარეული, მზიანი, ფართო სანაპიროები, აქტიური კლუბური ცხოვრება და ბევრი თავგადასვლები - ესპანეთი - ქვეყანა, რომელიც ემოციების გარეშე არ ტოვებს დამთვალიერებელს. სანგრიას, ფლამენკოს, ცეცხლოვანი საღამოების და მზიანი დღეების ქვეყანაში სამოგზაუროდ შემოდგომა სწორედ იდეალური დროა.
ესპანეთის ყველაზე მონახულებადი ქალაქი - ბარსელონაა, მისი მთავარი ხიბლი კი გაუდის არქიტექტურული შედევრები. ქალაქის სიმბოლო და დღემდე დაუსრულებელი ნაგებობა - Sagrada Familia ვერავის დატოვებს გულგრილს. პასეო დე გრასიას ქუჩას გაუდის ყველაზე ცნობილ ნამუშევრებამდე მივყავართ - კასა მილა, კასა ბატლო, კალა ამატლერი. გაუდი სულ სხვა სამყაროში ამოგზაურებს მნახველს, ექსტრავაგანტული, ცოტა უცნაური და განუმეორებელი, ფერების და სილუეტის შეხამება - ის რაც დიდხანს ახსოვს ბარსელონაში ჩასულ დამთვალიერებელს.
გოთიკური კვარტალი სულ სხვა დროში გამოგზაურებთ, ვიწრო, ქვაფენილიანი ქუჩებიდან ფართო გამზირებზე აღმოჩნდებით, ტაპასების ნაირსახეობას დააგემოვნებთ, სანგრიას მიირთმევთ და გზას ბარსელონეტას ხმაურიანი სანაპიროსკენ გააგრძელებთ. მუზეუმებით, ფერადი ბაზრებით, რესტორნებით და ბარებით, ხმელთაშუა ზღვისთვის დამახასითებელი ზღვის პროდუქტებით, ფართო სანაპიროებით და მზიანი დღეებით გაგანებივრებთ ქალაქი, რომელიც ერთდროულად ძალიან ევროპული და ძალიან ინდივიდუალურია.
ზღვის და დასვენების მოყვარულებს არა მხოლოდ ბარსელონას სანაპიროები, არამედ კოსტა-ბრავას საკურორტო ზონაც ელის. ლორეტ დე მარის, ბლანსის, ტოსა დე მარის, კალელას საკურორტო ზონები ნებისმიერი ინტერესის დამსვენებელს ერგება. წყალი ლურჯი და კამკამაა, ამინდი - მზიანი, რესტორნების და ბარების დიდი არჩევანია, სასტუმროები სხვადასხვა ბიუჯეტის მქონე დამსვენებელს მასპინძლობენ, საოჯახო თუ აქტიური დასვენებისთვის კოსტა ბრავაზე განტვირთვა საუკეთესო იდეაა. კოსტა ბრავადან შეგიძლიათ მოინახულოთ ფიგუერესი, ქალაქი რომელიც გენიალური სალვადორ დალის მუზეუმით ამაყობს. მუზეუმი ისეთივე ექსცენტრიუია, როგორც თავად დალი, თითოეული ნამუშევარი განსხვავებულად სუნთქავს. თავად ქალაქი პატარაა და მის დასათვალიერებლად ერთი დღე სრულიად კმარა.
საზღვაო მიმართულებებიდან ასევე უნდა აღინიშნოს ბალეარის კუნძულები და ყველაზე გავრცელებული ტურისტული ადგილები - მალიორკა და იბიცა. კუნძულები განსაკუთრებით მიმზიდველია დამსვენებლისთვის კლიმატის გამო, აქ მთელი წლის განმავლობაში ძალიან თბილა.
ბალეარის კუნძულებს შორის უდიდესია მალიორკა, სადაც წელიწადში 300 დღე მზიანია. მალიორკა ულამაზესია თავისი პატარა სოფლებით, მთებით და ყურეებით. მალიორკა გარდა იმისა, რომ გამოირჩევა სანაპირო ზოლით, ასევე მიმზიდველია მისი ისტორიული ცენტრით - პალმა დე მალიორკა, რომელიც წარმოადგენს კუნძულის დედაქალაქს. დამსვენებლებს შეუძლიათ მოინახულონ გოთური ტაძარი, საიდან ულამაზესი ვიწრო ქუჩებით მოხვდებიან კუნძულის თანამედროვე ნაწილში.
ბალეარის ასევე ულამაზესი კუნძულია იბიცა, რომელიც გამოირჩევა ხმაურიანი და აქტიური კლუბებით, ლუდის ბარებით და სხვადასხვა სახის რესტორნებით. კუნძულს ხშირად სტუმრობენ აქტიური დასვენების მოყვარულები, რადგან კუნძული ცნობილია აქტიური კლუბური ცხოვრებით, ფესტივალებით. სექტემბერი და ოქტომბრის პირველი ნახევარი ნაკლებად ხალხმრავალია, საუკეთესო პერიოდი სასიამოვნო დასვენებისთვის.
რა უნდა გაითვალისწინოთ: ესპანეთში გამგზავრება შესაძლებელია მხოლოდ ორჯერადად ვაქცინირებული მგზავრებისთვის, 12 წლიდან ვაქცინაციის დამადასტურებელი დოკუმენტის წარდგენა აუცილებელია. დაშვებული ვაქცინებია - Pfizer-BioTech, AstraZeneca, Moderna, Janssen (J&J), Sinopharm, Sinovac.
ესპანეთის მიმართულებით პირდაპირი რეისები ჯერჯერობით არ სრულდება, ამიტომ ნებისმიერ ქალაქში გამგზავრება შესაძლებელია ტრანზიტულად. მრავალფეროვანი, საინტერესო დასვენების დაგეგმაში კი ტურისტული კომპანია “I’m Georgia” დაგეხმარებათ, რომ თქვენი ესპანური თავგადასავალი უფრო კომფორტული და სასიამოვნო გახდეს.
(R)