რესტორატორთა ასოციაცია სხვა 20-მდე ბიზნესგაერთიანებასთან ერთად პრემიერის მისამართით წერილს ამზადებს. მეწარმეები მთავრობის მეთაურთან სხვადასხვა სექტორში არსებულ გამოწვევებთან და მათი გადაჭრის გზებთან დაკავშირებით მსჯელობას გეგმავენ. საუბარი შეეხება როგორც შაბათ კვირას არსებულ შეზღუდვებს და კომენდანტის საათს, ასევე მესამე ტალღის გამო გაჟღერებულ შესაძლო ჩაკეტვებს. ოფიციალური მიმართვის ზუსტი შინაარსი უახლოეს დღეებში გახდება ცნობილი. ირაკლი ღარიბაშვილის თანხმობის შემთხვევაში ეს იქნება მისი ბიზნესთან გაფართოებული შეხვედრის პირველი შემთხვევა პრემიერის რანგში.

„პრემიერ-მინისტრ ღარიბაშვილთან არცერთი სფერო ჯერ შეხვედრილი არ არის. წერილის შინაარსი სწორედ ის არის, რომ ვითხოვთ მასთან შეხვედრას. გვინდა გავაცნოს ის საკითხები, რომელიც მცირე ბიზნესს აწუხებს. გვინდა დეტალურად მივაწოდოთ ინფორმაცია რა პრობლემებს გამოიწვევს კიდევ ერთი ჩაკეტვა და რა საფრთხის წინაშე დადგება ათასობით დასაქმებული.

გარდა ამისა, გვექნება საუბარი ვაქცინაციის აუცილებლობაზე. „იწილო ბიწილო“ ეს „კატათაგვობანა“ გახსენი-დაკეტე ვერაფერს მოიტანს. ეს მხოლოდ და მხოლოდ ეკონომიკისა და სახელმწიფოს ჩამონგრევა იქნება. შაბათ-კვირის, ასევე კომენდანტის საათის თემა იმდენად პრობლემურია ქვეყანაში, რომ ამის გადახედვა თავისთავად უნდა ხდებოდეს. ერთმანეთთან შეუსაბამოა რეალობა და ის შეზღუდვები, რომელიც არსებობს. მივესალმებით და ვამბობთ რომ შეზღუდვები უნდა იყოს მაგრამ ისე, რომ არც საზოგადოებრივი ჯანდაცვა დაზიანდეს და ბიზნესსაც მიეცეს ფუნქციონირების საშუალება.დანის პირზე უნდა გავიაროთ, სადაც არც სახელმწიფოს და არც ბიზნესის ინტერესები არ დაზიანდება.“ - აცხადებს შოთა ბურჯანაძე.

business-partner.ge