საქართველოში კორონავირუსით ინფიცირებულთაგან ერთ-ერთი ბავშვია. გავრცელებული ინფორმაციით, 12 წლის ბავშვი იტალიაში მყოფი იმ ჯგუფის წევრია, რომლებიც თვთიზოლაციაში იმყოფებოდნენ და ვირუსი განმეორებითი ტესტირებისას დაუდგინდათ. ამ ინფორმაციის გავრცელების შემდეგ, პრემიერ-მინისტრის ხელმძღვანელობით კორონავირუსთან დაკავშირებით მოქმედმა უწყებათაშორისმა საკოორდინაციო საბჭომ საქართველოს მასშტაბით სასწავლო დაწესებულებებში გამოცხადებული არდადეგები ამ ეტაპზე 1-ელ აპრილამდე გაახანგრძლივა.
„კომერსანტი“ დაინტერესდა არსებული მდგომარეობიდან გამომდინარე, გეგმავენ თუ არა კერძო ბაღები სასწავლო პროცესების შეჩერებას. როგორც კერძო საბავშვო ბაღში Family აცხადებენ, მიუხედავად იმისა, რომ მაქსიმალურ კონტროლზეა აყვანილი ჰიგიენური და სანიტარული პროცედურები, სწავლის შეჩერების გადაწყვეტილება მაინც მიიღეს.
„ჩვენ განსაკუთრებული ყურადღებით ვაკვირდებით COVID-19 ვირუსთან დაკავშირებულ პროცესებს და მაქსიმალურ კონტროლზეა აყვანილი ჰიგიენური და სანიტარული პროცედურები ბაღის ფილიალებში. საჯარო და კერძო სამსახურები ჩვეულებრივ რეჟიმში განაგრძობენ მუშაობას. მშობლებს დამტოვებლები არ ჰყავთ, ამიტომ მათი სურვილი იყო სწავლა გაგრძელებულიყო, მაგრამ რადგან დღეს სახელმწიფომ მსგავსი გადაწყვეტილება მიიღო, ჩვენ თავს ვიზღვევთ და ორშაბათიდან ანუ 16 მარტიდან 1-ელ აპრილამდე სასწავლო პროცესს შევწყვეტთ. ჩვენთვის ფინანსურად ეს დიდი დარტყმაა, მაგრამ ბავშვის ჯანმრთელობა უპირველესია“, - აცხადებენ საბავშვო ბაღში Family.
სასწავლო პროცესის შეჩერებას საბავშვო ბაღში „ნევერლენდი“ გეგმავენ, თუმცა ამასთან ერთად ფინანსურ პრობლემებზეც საუბრობენ და აცხადებენ, რომ მსგავსი რთული სიტუაცია 6 წლიანი მუშაობის მანძილზე არ ჰქონიათ.
„რამდენიმე საათის წინ გავრცელდა ინფორმაცია სწავლის გადადებასთან დაკავშირებით, ჩვენც სავარაუდოდ შევაჩერებთ სწავლას და სადეზინფექციო სამუშაოებს ჩავატარებთ. მთავრობის რეკომენდაციებს აქტიურად ვითვალისწინებთ. ყველა მშობელს ვეუბნებით, რომ ამ პასუხისმგებლობას ვერ ავიღებთ და სასწავლო პროცესს დროებით ვწყვეტთ. ბავშვის ჯანმრთელობა უპირველესია, თუმცა ფინანსურის თვალსაზრისით ეს ჩვენთვის დიდი დარტყმაა, 6 წელია საქართველოს ბაზარზე ვართ და მსგავსი პრობლემა არასოდეს გვქონია. ამ პირობებში მშობელსაც ვერ მოვთხოვთ თანხის გადახდას და ხელფასების გაცემის პრობლემაც შეიქმნება“, - აცხადებენ საბავშვო ბაღში „ნევერლენდი“.
საბავშვო ბაღში „ათინათი“ ამბობენ, რომ სასწავლო პროცესის შეჩერება ამ ეტაპზე მშობლების სურვილის გამო არ იგეგმება, თუმცა, საკუთარ თავზე პასუხისმგებლობას ვერ იღებენ და თუ კორონავირუსით დაინფიცირების შემთხვევები მომრავლდა, შესაძლოა სწავლა შეაჩერონ.
„იქედან გამომდინარე, რომ ძირითადად, დასაქმებულ მშობლებს ვემსახურებით, ხელს ვუწყობთ მათ, ამიტომ ჩვენც ვაგრძელებთ მუშაობას იმისათვის, რომ მათაც მოახერხონ სამსახურში სიარული, ამიტომ რასაც მშობელი გადაწყვეტს ისე ვიქცევით, პასუხისმგებლობას ჩვენს თავზე ვერ ვიღებთ. თუ ამ მოვლენებმა შეუქცევადი ხასიათი მიიღო, არ ვიცით რას ვიზამთ, ეს განხილვის საგანია, თუმცა ამ ეტაპზე სადენზიფექციო სამუშაობს აქტიურად ვახორციელებთ. როდესაც ბავშვის ჯანმრთელობას ეხება საქმე რა თქმა უნდა ეს უმნიშვნელოვანესია, ამიტომ თუ კორონავირუსით დაინფიცირების შემთხვევები მომრავლდა, ალბათ გავჩერდებით“, - აცხადებენ საბავშვო ბაღში „ათინათი“.
ნინო თამაზაშვილი