„ელექტროენერგიის გადასახადი ადგილობრივების სოციალურ მდგომარეობაზე აისახება ძალიან ცუდად.“ - მესტიის გამგებელი კახა ჟორჟოლიანი სვანეთის მოსახლეობისთვის ელექტროენერგიის საფასურის დაწესების მოსაზრებას უარყოფითად აფასებს.

„ვითვალისწინებთ გარკვეულ სპეციფიკას, მაგრამ საბოლოო ჯამში, ყველამ უნდა გადაიხადოს ელექტროენერგიის საფასური“, - ასე უპასუხა ეკონომიკისა და მდგრადი განვითარების მინისტრმა ნათია თურნავამ ჟურნალისტების კითხვას, მოუწევს თუ არა სვანეთის მოსახლეობას ელექტროენერგიის საფასურის გადახდა.

ცნობილია, რომ სვანეთის რეგიონის მცხოვრებლები ელექტროენერგიის ტარიფს არ იხდიან. ქვეყნის სხვა მაღალმთიან დასახლებებში მთავრობა სამომხმარებლო ტარიფის 50%-იან სუბსიდირებას ახდენს, ზემო სვანეთში კი მოსახლეობა დენის ტარიფის გადახდისგან გათავისუფლებულია. მას შემდეგ, რაც სვანეთის მოსახლეობა ელექტროენერგიის გადასახადისგან განთავისუფლდა, „ენერგო პრო ჯორჯიას“ ზარალი ამ მიმართულებით გაიზარდა. საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკი) ინფორმაციით, კომპანიის ზარალმა 2019 წლის 9 თვეში,  სვანეთისთვის მიწოდებული და გადაუხდელი ელექტროენერგიის ნაწილში, 7 მლნ. ლარი შეადგინა.

კახა ჟორჟოლიანი აღნიშნავს, რომ მოსახლეობისთვის გადასახადის დაწესება მიზანშეწონილი არ არის და სამომავლო ნაბიჯებზე მოსახლეობასთან კონსულტაციის შემდეგ გახდება ცნობილი.

 „ამას დასხდომა და მოფიქრება სჭირდება, გადაწყვეტილების ასე მიღება არ მიმაჩნია მიზანშეწონილად.  სოციალური პაკეტებიც უნდა შეიქმნას.  იმას,  რომ ეს აზრი მოსახლეობისთვის მიუღებელია,  ამას აქედანვე დაგიდასტურებთ, დანარჩენს მოსახლეობასთან შეხვედრის მერე გავარკვევთ“ - ამბობს მესტიის გამგებელი.

აღსანიშნავია, რომ ამ მხარეში უფასო ელექტროენერგიის ჭარბად გამოყენება სვანეთში ბიტკოინების მაინერების ამუშავებას უკავშირდება, რამაც გასულ წელს სვანეთის სოფლები რამდენიმე დღით ჩააბნელა.  აღსანიშნავია, რომ ამ მაინერებს  სამუშაოდ საკმაოდ დიდი რაოდენობის ელექტროენერგია სჭირდება.

იწვევს თუ არა პრობლემას მაინერების მუშაობა რეგიონში და რამდენად საჭიროა ძაბვებზე დატვირთვის შესამცირებლად ელექტროენერგიის გადასახადის დაწესება მოსახლეობისთვის, ამასთან დაკავშირებით „კომერსანტი“ სვანეთში მდებარე სასტუმროების დამფუძნებლებსაც გაესაუბრა.

„სასტუმროები გახნის დღიდან იხდიან ელექტროენერგიის გადასახადს, რადგან სამეწარმეო საქმიანობას ეწევა. როცა მაინერებით დატვირთულია რეგიონი, მერე ენერგია არ ჰყოფნის სხვა ობიექტებს. ვფიქრობ, რაღაც კუთხით კარგი იქნება ელექტროენერგიის გადასახადის დაწესება, რადგან  გაიზრდება ენერგია და დაბალანსდება სიტუაცია.“ - ამბობს მესტიის სასტუმრო „ბანგურიანის“ მეპატრონე ლაშა ჯაფარიძე.

სასტუმრო „მესტიის“ დამფუძნებელი მარიკა ჯაფარიძე მიიჩნევს, რომ სვანეთში ელექტროგადამცემი ხაზები ხშირად იტვირთება მათი სიძველის გამო და დიდთოვლიანობის შემთხვევაში ხშირად სოფლები ელექტროენერგიის გარეშე რჩება.

„დიდი დატვირთვის იყენებდნენ ელექტროენერგიას ჩვენს რეგიონში, ახლა მაინერები გატანილია და მოსახლეობა ამას გაგებით შეხვდა. თუმცა,  ელექტროგადამცემი ხაზები ძველია და გაიზარდა მოხმარება, გაიზარდა სასტუმროების რაოდენობაც, ზოგ სოფელში არც არის და რაღაც პერიოდი შუქის გარეშე არიან. ერთ ღამეში ნახევარი მეტრი თოვლი მაინც მოდიოდა და როცა კომუნისტების დროინდელ ბოძს და ხაზებს აწვებოდა ვერ უძლებდა და წყდებოდა.  რაც შეეხება გადასახადს, ბუნებრივია, ამას მოსახლეობა დადებითად ვერ შეხვდება.“  - ამბობს სასტუმრო „მესტიის“ მეპატრონე მარიკა ჯაფარიძე.

ეკონომიკის მინისტრს არ დაუკონკრეტებია, თუ როდიდან მოუწევთ სვანეთის მაცხოვრებლებს ელქტროენერგიის გადასახადის გადახდა.

მარეგულირებელი კომისიის თავმჯდომარე დავით ნარმანიას  რამდენიმე კვირის წინ გაკეთებული განცხადებით, ცუდია, რომ მესტიის მოსახლეობა ელექტროენერგიის გადასახადს არ იხდის.” და ხაზი გაუსვა, რომ როდესაც ყოველწლიურად  მთავრობა 30 მლნ. ლარზე მეტს ხარჯავს, რათა მოწყვლად ჯგუფებს კომუნალურების გადასახადი შეუმსუბუქდეს, ამ ფონზე სვანეთის ელექტროენერგიის გადასახადისგან განთავისუფლება მიზანშეწოლილად არ მიაჩნია.

მარიამ მორგოშია