წარმომიდგენია, ბიძინა ივანიშვილი რა შეშინებულია, - ეს განცხადება რესპუბლიკური პარტიის ლიდერმა დავით ბერძენიშვილმა გააკეთა.

ბერძენიშვილი პოლიტპატიმრების გათავისუფლებას და დასავლელი პარტნიორების კიდევ უფრო მკაფიო გზავნილებს ეხმაურება. საქმე ეხება აშშ-ის სახელმწიფო მდივნის, მაიკ პომპეოსა და ფინანსთა მინისტრის, სტივენ მნუჩინის მიმართ მიწერილ წერილს, სადაც ივანიშვილის რუსეთთან მოკავშირეობაზეა აქცენტი გაკეთებული.

ივანიშვილმა უკვე ისე შეტოპა, რომ თავს დამანებებენ, ამით თავს ვერ დაიმშვიდებს იმიტომ, რომ როდესაც ძალიან გავლენიანი კანონმდებლები საკუთარ მთავრობას წერენ, რომ საჭიროა, უკვე სერიოზული რეგიარება, ბიძინა ივანიშვილი, ახლა წარმომიდგენია, რა შეშინებულია, - განაცხადა დავით ბერძენიშვილმა.

საერთაშორისო თანამეგობრობის კრიტიკულ შეფასებებს ხელისუფლების შეცდომებს უკავშირებს ერთიანი საქართველო - დამოუკიდებელი მოძრაობის თავმჯდომარე ნინო ბურჯანაძე. მისი თქმით, საქართველოს პარტნიორები უკვე ღიად საუბრობენ პოლიტპატიმრებზე.

მიმაჩნია, რომ გზავნილები, რომელიც მოდის აშშ-ის კონგრესიდან, სენატიდან, ევროპარლამენტიდან და საერთოდ დასავლელი პარტნიორებისგან, არის  ძალიან საგანგაშო სიგნალი, - ამბობს ბურჯანაძე.

ხელისუფლებას რომ პუტინის მარიონეტები მათავენ, ამაზე საუბრობს ლეიბორისტული პარტიის ერთ-ერთი ლიდერი, გიორგი გუგავა. მისი თქმით, ივანიშვილის ხელისუფლების რუსეთთან მჭიდრო კავშირი ამერიკის მხრიდან აღქმულია, როგორც მათი ეროვნილი ინტერესების წინააღმდეგ გადადგმული ნაბიჯები.

ივანიშვილის საქმე დამთავრებულია. შემიძლია გითხრათ, რომ მას განაჩენი გამოტანილი აქვს, უბრალოდ, მასზეა დამოკიდებული, რამდენად დაამძიმებს ამ განაჩენს, - განაცხადა გუგავამ.

წერილი შეაფასეს პარტიაში „ლელო საქართველოსთვის“. გრიგოლ გეგელიას განცხადებით, აშშ-ს სენატორების და კონგრესმენების წერილი წარმოადგენს მკაფიო ვერდიქტს, რომელიც ფარდას ხდის “ქართული ოცნების” მმართველობის ანტისახელმწიფოებრივ წლებს.

“ქართული ოცნების” მიერ წარმოებულმა უგუნურმა საგარეო და საშინაო პოლიტიკამ შესაძლებელი გახადა ამ სამარცხვინო მომენტის დადგომა, როდესაც ხელისუფლება ღიად არის ეჭვმიტანილი ჩვენივე ქვეყნის საუკეთესო გეოპოლიტიკური ინტერესების მტრობასა და რუსეთის ინტერესების გატარებაში. სენატორთა წერილი კითხვის ნიშნის ქვეშ აყენებს ხელისუფლების პროდასავლურ ორიენტაციას და ღიად მიგვანიშნებს, რომ საქართველოს მთავრობის მავნებლური და უგუნური გეოპოლიტიკური სვლები, პირველ რიგში კი ანაკლიის პორტის ისტორიული პროექტის ხელისშეშლა, პირდაპირ არის განპირობებული ივანიშვილის კავშირებით რუსეთის ფედერაციასთან“, - განაცხადა გრიგოლ გეგელიამ.

მაიკ პომპეოსადმი გაგზავნილ წერილს აფასებს „ახალი საქართველოს“ ლიდერი გიორგი ვაშაძეც. მისი განცხადებით, სენატორები შეერთებული შტატების სახელმწიფო მდივანს საქართველოში არსებულ მძიმე მდგომარეობას აცნობენ.

მისივე განცხადებით, წერილს ხელს აწერს 2016 წელს რესპუბლიკური პარტიის პრეზიდენტობის კანდიდატი ტედ კრუზი, რაც საკითხის მაღალ დონეზე შესრულებას ნიშნავს.

„პირველ რიგში, ხელს აწერს ამ წერილს 2016 წელს რესპუბლიკური პარტიის პრეზიდენტობის კანდიდატი ტედ კრუზი. ეს ნიშნავს, რომ ძალიან მაღალ დონეზეა აწეული თვითონ ეს საკითხი. მთავარი გზავნილებია: 1. საქართველო ხელს უშლის ამერიკულ ინვესტიციებს ქვეყანაში. ეს არის საგანგაშო და კატასტროფა, ანუ სამუშაო ადგილები არ შეიქმნება და ძალიან ბევრი პრობლემა გვექნება; 2. ის მფარველობს საეჭვო წარმომავლობის ბიზნესმენებს“, - აცხადებს გიორგი ვაშაძე.