№520 დადგენილების ამოქმედებიდან ერთი წლის შემდეგ ჯანდაცვის სამინისტრო თავის შეცდომას ირიბად აღიარებს და ახალ პროგრამას აანონსებს. სამინისტოს მოლაპარაკებებმა არითმოლოგთა ასოციაციის წევრებთან შედეგი გამოიღო, უწყება 2 566 180 ლარის ღირებულების დეფიბრილატორებს შეისყიდის და საყოველთაო ჯანდაცვის პროგრამის ბენეფიციარებს უსასყიდლოდ გადასცემს. მაშინ, როცა ჰოსპიტალური სექტორი აცხადებდა, რომ დეფიბრილატორის შეძენის ზღვრული ტარიფი, საბაზრო ღირებულებაზე დაბალი იყო და კლინიკები პაციენტებს სამედიცინო მომსახურებას ვერ გაუწევდნენ, პრემიერ-მინისტრის დავალებით, ჩატარდა ახალი ფასთა კვლევა, რომლის შედეგად სამინისტრომ კლინიკებისთვის დეფიბრილატორებს შეძენის გადაწყვეტილება მიიღო.
ჯანდაცვის სამინისტროს მიერ დაწყებული რეფორმას დადებითად აფასებს „საქართველოს გულის რიტმის ასოციაციის“ პრეზიდენტი კახაბერ ეცადაშვილი. ექიმი ამბობს, რომ გადაწყვეტილება ცალსახად და ერთ მნიშვნელოვნად პაციენტისთვის დიდი შეღავათია, რადგან თანაგადახდა მკვეთრად შემცირდება. კარდიოლოგი „კომერსანტთან“ საუბარში განმარტავს, რომ ახალი პროგრამით უწყებამ №520 დადგენილების ხარვეზები აღიარა. ამბობს იმასაც, რომ პროგრამა უნდა გაგრძელდება და მხოლოდ დეფიბრილატორებით არ ამოიწუროს. კახაბერ ეცადაშვილი აცხადებს, რომ პროექტი სამინსიტროს და დარგობრივი ასოციაციების თანამშრომლობის კარგი პრეცედენტი იქნება.
„ვფიქრობ, რომ ეს არის იმ ხარვეზის აღიარება, რომელიც 520 - ე დადგენილებაში იყო. თუ იმას გავითვალისწინებთ, რომ პრემიერმა იანვარში ბრძანა დადგენილება შეცვლილიყო რასაც ინტენსიური მუშაობის 11 თვე დასჭირდა, ცალსახად ვნახავთ, რომ 520 დადგენილება ნაჩქარევად და მოუმზადებლად იყო მიღებული, რასაც სულ ვამბობდით. იმედია პროგრამა გავრცელდება არა მარტო დეფიბრილატორებზე, არამედ მთლიან სპექტრზე. ადრე თუ კლინიკას მომწოდებლისგან უწევდა ამ აგრეგატის შეძენა, ხოლო შემდეგ სახელმწიფო თანხას 5-6 თვეში რიცხავდა, ახალა კლინიკა ამ ფინანსური ტვირთისგან გათავისუფლებული იქნება და დეფიბრილატორებს ჯანდაცვის სამინისტრო მიაწვდის“, - კახაბერ ეცადაშვილი.
„საქართველოს გულის რიტმის ასოციაციის“ პრეზიდენტი ამბობს, რომ დეფიბრილატორები ჯანდაცვის სამინისტრომ არითმოლოგთა ასოციაციის წევრებთან კონსულტაციით შეარჩია. მისი თქმით, უწყებამ ექიმების რჩევა გაითვალისწინა და სახელმწიფო კარგი ხარისხის დეფიბრილატორზე შეისყიდის. კახაბერ ეცადაშვილი ასევე დადებითად აფასებს მინისტრის განცხადებას პროგრამით მოსარგებლეთა კატეგორიის გაფართოების შესახებ. მას იმედი აქვს, რომ მინისტრის სიტყვებს რეალური მოქმედება მოჰყვება და პროცესი ერთი წელი არ გაიწელება.
შეგახსენებთ, რომ სამედიცინო დაწესებულებებისთვის ერთიანი სატარიფო სისტემა ძალაში 2019 წლის 21 ნოემბრიდან შევიდა. რეფორმის უარყოფით შედეგებზე ჰოსპიტალური სექტორი თავიდანვე საუბრობდა და დადგენილების დროებით შეჩერებას ითხოვდა. თუმცა, ჯანდაცვის სამინისტრომ სამედიცინო საზოგადოების აზრი არ გაითვალისწინა. კლინიკების წარმომადგენლები ამტკიცებდნენ, რომ დადგენილებით განსაზღვრული ერთიანი ტარიფი სამედიცინო მომსახურების თვითღირებულებაზე დაბალია და შედეგად, პაციენტებისთვის ხარისხიანი მომსახურების გაწევას ვეღარ შეძლებდნენ.
ბაჩო ადამია