პროექტი 39 განსხვავებული და მწვანე კონცეფციის კაფეა, სადაც ტრადიციული მომსახურების გარდა მომხმარებლებს სხვადასხვა აქტივობები დახვდება.
როგორც „კომერსანტს“ პროექტი 39 - ის დამფუძნებელმა სოფო შენგელიამ განუცხადა, მსგავსი კონცეფციის კაფის შექმნის იდეა კერძო სახლში გადასვლის შემდეგ გაუჩნდათ.
„პროექტი 39 ის იდეა უკვე დიდი ხანია, რაც ჩვენ ოჯახში გაჩნდა, ეს არის ოჯახური საქმიანობა და მაშინ დაიწყო როდესაც საცხოვრებლად კერძო სახლში გადავედით და დავიწყეთ ამ სახლის აშენება მოპირკეთება.
ორი წლის კი წინ ჩვენ ეზოში ავაშენეთ პატარა სახლი, გავამწვანეთ სივრცე და სტუმრების მიღება გადავწყვიტეთ, რადგან ვფიქრობთ, რომ თბილისში ასეთი სივრცეების ნაკლებობაა“,- აცხადებს სოფო შენგელია.
პროექტი 39 მომხმარებელს სხვადასხვა გასართობ თუ კულტურულ აქტივობებს სთავაზობს, იქნება ეს პოეზიის საღამო თუ სხვადასხვა თამაშები, სივრცეს ასევე არ აქვს Wifi, რადგან მომხმარებლებმა ერთმანეთთან ურთიერთობა შეძლონ.
როგორც სოფო შენგელია აცხადებს, პროდუქტიც განსხვავებული და ნატურალური აქვთ, რადგან ყველაფერი მათ ეზოში მოყვანილ პროდუქტებზე მზადდება.
პროექტი 39 ოფიციალურად 6 ივნისიდან ფუნქციონირებს და სტუმრების მიღება შეუძლია, თუმცა ერთი წლის წინ სატესტოდ რამდენიმე „ივენთიც“ მოაწყვეს. როგორც სოფო შენგელია აღნიშნავს, ეს არ არის სტანდარტული სივრცე და მომხმარებლებიც საინტერესო ჰყავთ.
„1 წლის წინ სექტემბერში სატესტოდ გავიხსენით, გვქონდა რამდენიმე ღონისძიება, რეალურად კაფის რეჟიმში 6 ივნისიდან ანუ მესამე თვეა ვართ. ეს არ არის სტანდარტული სივრცე, რომელსაც ადამიანები მიჩვეულები არიან, ამიტომაც ძალიან საინტერესო ადამიანები გვპოულობენ და ჩვენი მეგობრები ხდებიან, ჩვენი სივრცე მდებარეობს ნახალოვკაში და არ არის სადღაც გზაზე, უფრო დაჩის ვარიანტია და ამიტომაც ასე შემთხვევით ვერავინ ვერ გვიპოვის, გვპოულობენ ძალიან საინტერესო ადამიანები და აფასებენ ჩვენ ხარისხს და ჩვენ კერძებს.
კერძებიდან გვაქვს სტეიკები, რომლის დამზადების ტექნოლოგიაზეც ძალიან დიდი ხანი ვმუშაობდით, გვაქვს ჯანსაღი ბოსტნეული, რომელსაც ან სათბურიდან ან ჩვენი ეზოდან ვიღებთ და სალათებს ვამზადებთ, გვაქვს დესერტები, იდეაში ყველაფერი გვაქვს ერთი კარგი სრული ვახშმისთვის ნებისმიერი გემოვნების ადამიანისთვის. უახლოეს მომავალში კიდევ ვგეგმავთ სიახლეებს“, - აღნიშნავს სოფო შენგელია.
პროექტი 39 მომხმარებლებს ასევე კორპორატიულ საღამოებს და „თიმბილდინგს“ სთავაზობს, რადგან თანამშრომლებმა დრო არასტანდარტულად და საინტერესოდ გაატარონ და გუნდი შეიკრას.
რაც შეეხება ინვესტიციას, როგორც სოფო შენგელია აღნიშნავს ყველაფერი პირადი ინვესტიციით გააკეთეს და პროექტში ოჯახმა საკუთარი თანხები ჩადო.
„ჩვენ იდეაში ბევრი ინვესტიციის ჩადება არ დაგვჭირვებია, სახლი ავაშენეთ მთლიანად ჩვენი იყო დაახლოებით 100 000 ლარი დაჯდა.
პროექტი არ არის ჩვენი სტანდარტული მიმართულება, განვითარებას და გაფართოებას ვცდილობთ და იდეაში პროექტს მივყავართ ჩვენ სადღაც, თვითონ გვიბიძგებს საით უნდა წავიდეთ და ვვითარდებით. მთელი ოჯახი მყავს დასაქმებული, ვართ ხუთი ადამიანი.
ძალიან ვართ ორიენტირებული რომ ადამიანმა ის მომსახურეობა მიიღოს რაც საჭიროა, რომ მიიღოს იქ სადაც მიდიხარ და თანხას იხდი“, - აღნიშნავს სოფო შენგელია.
სოფო შენგელია ასევე აღნიშნავს, რომ მომსახურეობის ხარისხზე არიან ორიენტირებულები და ამიტომ არც მომსახურეობის საკომისიოს იღებენ.
„გამომდინარე იქიდან, რომ ოჯახური საქმიანობაა როგორც ბიზნესს ნაკლებად ვუდგებით, ჩვენთვის ჩვენი თავის გამოხატვა უფროა. ამიტომაც ხარისხზე უფრო მეტად ვართ ორიენტირებულები და არც მომსახურების საკომისიო გვაქვს“, - აცხადებს სოფო შენგელია.
თაკო კვაჭანტირაძე