2021 წლის მარტის თვეში ზუსტად ერთი წელი გახდება, რაც საქართველოს კინოთეატრების დიდი ეკრანები ჩამქრალია. პანდემიის გამო დაწესებული შეზღუდვებიდან გამომდინარე კინოს ბიზნესი, არაერთხელ ელოდა მუშაობის ნებართვის მიღებას, თუმცა როგორც „კომერსანტთან“ „კავეა თბილისი მოლის“  მფლობელმა ბაკურ ლაშქარავამ აღნიშნა, საფუძვლიანი ვარაუდით, მარტამდე კინოჩვენებები არ აღდგება. 

„ძალიან ცუდი წელი იყო კინოთეატრებისთვის.  საქართველოს მასშტაბით თითქმის არ არსებობს ჩვენ გარდა ბიზნესი, რომელიც მთელი წლის მანძილზე დაკეტილი იყო. ყველა სხვა ბიზნესი რაღაც პერიოდით მაინც იხსნებოდა . ისე ჩანს, რომ მარტამდე ასე იქნება და ერთი წელი შეგვისრულდება რაც კინოსეანსი არ გამართულა ჩვენს დარბაზებში. მსოფლიოში თითზე ჩამოსათვლელია ქვეყანაა, სადაც კინოთეატრები არ მუშაობენ. ერთი წელი ამხელა ბიზნესი კი არა ჩვეულებრივი ადამიანი ვერ გადარჩება შემოსავლის გარეშე.

მიუხედავად ამ მძიმე ვითარებისა, მომავალს ძალიან ოპტიმისტურად ვუყურებთ. იმის გათვალისწინებით, რომ ამ პერიოდის განმავლობაში კინოწარმოება თითქმის არ გაჩერებულა მსოფლიოში და კინოების საპრემიერო გრაფიკიდან გამომდინარე, გვაქვს ძალიან კარგი მოლოდინი და ვფიქრობთ, რომ როგორც კი სიტუაცია შეიცვლება უკეთესობისკენ და მოიხსნება შეზღუდვები, ხალხიც აქტიურად ივლის კინოეატრებში.  სადაც გაიხსნა კინოთეატრები, იქ ძალიან კარგი შედეგი აჩვენა აქტივობამ და ჩვენც ვხედავთ, რომ ხალხს კინოს კურება დიდ ეკრანზე მოენატრა. გვაქვს ბევრი სიახლე, რომელიც აქტიურ ფაზაშია და წინასწარ ვერ გავაჟღერებთ, მაგრამ საინტერესო ამბები გვექნება გახსნის პერიოდში,“ - განმარტავს ბაკურ ლაშქარავა.

ეპიდემიოლოგიური სიტუაციიდან გამომდინარე, კინოთეატრებისა და თეატრების გახსნა  რამდენჯერმე გადაიდო, ბოლოს მათთვის მუშაობის ნებართვის მიცემა 1 ნოემბრიდან იგეგმებოდა. რამდენჯერმე გახსნის თარიღის ცვლილების მიუხედავად კინოთეატრების ბიზნესში უმსხვილესი მოთამაშეები დარწმუნებით ვერ ამბობენ რა დროს აღდგება კინოჩვენებები, თუმცა ბიზნესი სხვა პროექტებით კინოინდუსტრიის განახლებისთვის ემზადება.

მარიამ მორგოშია