დეპუტატის მაია ბითაძის განცხადებით, კანონპროექტის მიღების შემდეგ, რომელიც მშენებლებისთვის მკაცრ რეგულაციებს ითვალისწინებს, დეველოპერები ბინებს ექსპლუატაციაში შესვლამდე ვეღარ გაყიდიან. “დეველოპერები წინასწარ რომ ყიდდნენ და ადამიანები იმ შენობებში რომ შედიოდნენ, რომელიც ექსპლუატაციაში არ იყო შესული, ეს ტენდენცია დასრულდება, - განაცხადა მაია ბითაძემ ხუთშაბათს, 24 ივნისს, პარლამენტის პლენარულ სხდომაზე.

მისივე ინფორმაციით, თბილისში ექსპლუატაციაში მიუღებელი დაახლოებით 12 600 ობიექტია. აქედან 6 000-ს საცხოვრებელი ფუნქცია აქვს, 6 000-ს – კომერციული.

„კომერსანტი“ დაინტერესდა თუ რას ფიქრობენ აღნიშნულ საკითხზე დეველოპერები და შეფასებისთვის კომპანია „არსის“ გენერალურ დირექტორს ბესო ოთოროიძეს დაუკავშირდა. მისი  თქმით, კანონპორექტში საუბარია იმ ცუდი პრატქიკის გამოსწორებაზე, რაც დღეს არის, ანუ როდესაც მშენებლობა სრულდება, მოსახლეობა  შედის და  შენობა ექსპლუატაციაში არ არის მიღებული.

„ვერავინ ვერავის ვერ დაუშლის სახლში შესვლას და მის საკუთრებაში ცხოვრებას. უბრალოდ, ერთადერთი ბერკეტი ამ შემთხვევაში არის ის, რომ ელექტრო ენერგიის მიწოდებაც ვერ მოხდება და ცხოვრებასაც არ უშლის არავინ. თუ ადამიანს ელექტროენერგია და გაზი არ ექნა, რა თქმა უნდა, ნორმალურად ვერ  იცხოვრებს  – ამაზეა საუბარი, რასაც  ჩვენ რეალურად  დავეთანხმეთ. აქ  ერთადერთი პირობა, რაც სექტორიდან იყო, არის ის, რომ სახელმწიფომ სახლის ექსპლუატაციაში მიღება დროულად უზრუნველყოს, რადგან მე თუ ავაშენე  და  ყველაფერი წესრიგში მაქვს, ბიუროკრატიას აღარ ველოდო. დღეს  ეს  პროცესი ძალიან იწელება.

საბაზრო  ნაწილში და კონკურენტულ თავისუფალი ვაჭორბის ნაწილში ვერავინ ვერ  ჩაერევა, მე რომ ვინმეს მანქანა ერთი თვით ადრე მივყიდო და გარიგება გავაფორმო, როგორ  შეიძლება რომ ამაში სახელმწიფო ჩაერიოს და  თქვას რომ ეს ტრანზაქცია  არ  შეიძლება. კანონითაც არანაირი შეზღუდვა მსგავსი ოპერაციის არ არსებობს“, -  აღნიშა ბესო ოთოროიძემ.

პარლამენტში მეორე მოსმენით განიხილავენ კანონპროექტს, რომელიც ეხება როგორც სამშენებლო ამნისტიას, ისე მკაცრ რეგულაციებს.

კანონპროექტით აკრძალული იქნება ობიექტის ფუნქციონირება, სანამ არ მოხდება მისი ექსპლუატაციაში მიღების შესახებ შესაბამისი აქტის გამოცება. ანუ, ექსპლუატაციაში მიღებამდე დაუშვებელი იქნება ამ ობიექტის ფუნქციონირება საცხოვრებელი თუ სხვა დანიშნულებით. გარდა ამისა, ლიცენზიატებს აეკრძალებათ, რომ მოამარაგონ ობიექტები ელექტროენერგიით და ბუნებრივი გაზით მანამ, სანამ არ მოხდება მათი ექსპლუატაციაში მიღება. თუმცა, დასაშვები იქნება რომ ელექტროენერგია და ბუნებრივი გაზი მიწოდებული იქნას მხოლოდ სამშენებლო საქმიანობის მიზნებისათვის.

მშენებლებთან მიმართებაში დგება სისხლისსამართლებრივი პასუხისმგებლობაც. კერძოდ, თუ მშენებლობა არასწორად ხორციელდება და შეუსაბამოა არქიტექტურულ ნებართვასთან, პირველ შემთხვევაში იქნება ჯარიმა. იმ შემთხვევაში თუ დარღვევა გამოსწორებული არ იქნება და მშენებლობა არ შეჩერდება, ამოქმედდება სისხლისსამართლებრივი პასუხისმგებლობა. სასჯელი იქნება თავისუფლების აღკვეთა ვადით 2 წლამდე. იურიდიული პირი ისჯება ჯარიმით, საქმიანობის უფლების ჩამორთმევით ან ლიკვიდაციით და ჯარიმით.

თაკო კვაჭანტირაძე