მაღალმთაინ აჭარაში, ქედის სოფელ დანდალოში წელს პრემიუმ კემპინგი გაიხსნა. „Hill Inn - ჰილლ ინნ“ გახსნის დღიდან ერთ- ერთ მიმზიდველ დანიშნულების ადგილად იქცა. კომფორტული სასტუმროს პანორამული ხედებით, კინოთეატრით, ბიბლიოთეკით და სპა ზონით შუაგულ ტყეში ზაფხულის სეზონს წარმატებით ასრულებს. „ჰილლ ინნ“- ის ერთ-ერთი დამფუძნებელი მაია ვერძაძე „კომერსანტს“ უყვება, რომ სასტუმროს არც ერთი თავისუფალი დღე არ ჰქონია.

„მთელი სეზონი 100% იანი დატვირთით ვიმუშავეთ, ერთ დღეც არ გვქონია თავისუფალი თუ არ გავითვალისწინებთ იმას, რომ ახლა ბათუმში კორონავირუსის გავრცელების მეორე ტალღის საკითხი დგას დღის წესრიგში. თბილისში, საჯარო  სექტორში ვინც  მუშაობს ბათუმში ვიზიტთან დაკავშირებით შეზღუდვა ჰქონდა, ამ მიზეზის გამო რამდენიმე დღე გაუქმდა, თუმცა თარიღების შეცვლა მაინც მოხდა. რეალურად 17 სექტემბრამდე მხოლოდ ორი დღე  გვქონდა თავისუფალი.

17 სექტემბრის შემდეგ ყოველი დღე დაკავებულია, ოქტომბრის ჯავშნებიც უკვე  დაწყებულია. გვესმის, რომ ზაფხულის სეზონიდან გამომდინარე იყო ესეთი დატვირთვა სავარაუდოდ ნოემბერში სრულად დატვირთულები არ ვიქნებით, თუმცა მაინც გვგონია, რომ მუშაობას საკმაოდ მომგებიანად გავაგრძელებთ“, - განმარტავს მაია ვერძაძე.

ზაფხულის ტემპის შესანარჩუნებლად „Hill Inn - ჰილლ ინნ“ დანდალოში ინფრასტრუქტურის განვითარებას გეგმავს. ახალი სერვისების გარდა თვის ბოლოს სასტუმრო სტუმრებს ახალი განთავსების ადგილით დახვდება. ახალი პროექტი, რომლის ინვესტიციის ოდენობა 70 000 ლარია, ხეზე სასტუმროს აშენებას გულისხმობს.

„დაგვემატება ორანჟერეა, სადაც ადამიანს ექნება დასვენების და ვახშმის საშუალება. გვაქვს საუნა ხეში, ოქტომბრის თვიდან საუნა იქნება ნომრის ფასში გაერთიანებული. არ ვფიქრობთ ფასის დაბლა დაწევას, აქედან გამომდინარე ფასში დამატებით სერვისები იქნება. დაახლოებით 15 დღეში „ჰილლ ინნ“  კიდევ ერთ ახალ სიახლეს შესთავაზებს. ჩვენი განთავსების ობიექტი მდებარეობს ტყეში, სიმწვანეშია ჩაფლული, ის ტერიტორია სადაც ახლა ტენტები არის განთავსებული ხეებს ესაზღვრება. იქედან გამომდინარე, რომ ჩვენ საკუთრებაში არის და ძალიან კარგი ნარგავების ტერიტორია გადავწყვიტეთ ხეზე  გავაკეთოთ ორ სართულიანი ორი სახლი. დაახლოებით 20 მეტრი იქნება, პანორამული  ხედებით და პანორამული  ჭერით, სახლი დაახლოებით 6 ადამიანს დაიტევს,  ახლა  თუ  1  ტენტი  2-3  ადამიანს  იტევს სახლში 6 ადამიანი განთავსდება. სახლები ერთმანეთს დაკიდებული ბილიკებით დაუკავშირდება. ეს იქნება უფრო მეგობრული შეკრებებისთვის და  ოჯახებისთვის, რადგან ხშირ შემთხვევაში ოჯახებს   ბავშვებით ვეღარ  ვმასპინძლობდით“, - განაცხადა მაია ვერძაძემ.

„ჰილლ ინნ“- ის ერთ-ერთი დამფუძნებელი მაია ვერძაძე „კომერსანტთან“ მაღალმთიან სოფელში არსებულ პრობლემებზე საუბრობს. პრობლემებზე რომელიც ბიზნესის განვითარებას მნიშვნელოვნად აფერხებს.

„გამოწვევებზე გეტყვით იმას, რომ  ჩვენ გვაქვს გზის პრობლემა, ბოლო 300 მეტრო საკმაოდ ცუდი გზაა. ჩემთვის და საზოგადოების ნაწილისთვის გასაგებია, რომ ჩვენ  ვართ  კემპინგი და როდესაც ადამიანი საკემპინგედ მიდის 200 მეტროს გავლა საერთოდ  არ უნდა უქმნიდეს პრობლემას, მაგრამ არიან ადამიანები, ვისაც უნდათ მხოლოდ „პრემიუმ  სერვისი“. ამიტომ ახლა დღის წესრიგში გზის პრობლემა გვიდგას, თუმცა ადგილობრივი მუნიციპალიტეტი დაგვპირდა, რომ გააკეთებს გზას პრობლემა უახლოეს მომავალში მოგვარდება.

ასევე  დიდი პრობლემას წარმოადგენს წყლის არ არსებობა. ჩვენ გვაქვს  ვერანდაზე ხის ჯაკუზი , მეორეს და  მესამეს  ფიზიკურად  ვერ  ვამატებთ  რადგან წყალი არ  არის  რომ  შევავსოთ ჯაკუზი. ამ საკითხზე მუნიციპალიტეტთან  საუბარი არ იყო იქიდან გამომდინარე, რომ პრიორიტეტი იყო  გზა. როდესაც გზის საკითხი მოგვარდება აქტიურად გადავალ წყლის პრობლემის მოგვარებაზე“, - განმარტავს მაია ვერძაძე.

„ჰილლ ინნ“-ის მენეჯმენტი უახლოეს მომავალს პოზიტიურად უყურებს. მიუხედავად იმისა, რომ დღეს ბათუმში ეპიდემიოლოგიური სიტუაცია რთულია, მაია ვერძაძეს იმედი აქვს რომ ზამთრის სეზონი აჭარაში არ ჩავარდება.

„ზამთრის სეზონზე სტუმრებს ზამთრის გასართობი და  სარელაქსაციო სერვისები უნდა  შევთავაზოთ. შესაბამისად თუ ჩვენ მაქსიმუმს გავაკეთებთ, სტუმარი ყოველთვის გვეყოლება, რადგან ქართველ ადამიანს სჭირდება ისეთი სერვისები რომელსაც ჩვენ ვთავაზობთ“, — ამბობს ვერძაძე.

ბაჩო ადამია