მთავრობის გადაწყვეტილებით ქორწილები და ქელეხები ისევ აიკრძალა. დადგენილება სარესტორნო ბიზნესზე პირველივე დღეს აისახა. კომპანია „mgroup“-ის საოპერაციო დირექტორი გიორგი მურჯიკნელი აცხადებს, რომ ღია სივრცეებში 3 ღონისძიება გაუქმდა, პოტენციურ დამკვეთებთან მოლაპარაკებები კი შეწყდა. მურჯიკნელს ჰქონდა მოლოდინი, რომ წარმატება, რომელსაც უშუალოდ სახელმწიფომ მიაღწია კორონავირუსთან ბრძოლაში, ძალიან მალე ოპერირებისთვის თავისუფალ ფორმატს შესთავაზებდა, თუმცა ყველაფერთან ერთად ქონდა მოლოდინი, რომ გამკაცრებული შეზღუდვები შეიძლებოდა განმეორებულიყო.
„ჩვენს ობიექტებზე დადასტურებული ჯავშნები, სადაც ფიზიკურ პირებს სხვადასხვა ტიპის ღონისძიებები ქონდათ დაგეგმილი უკვე გაუქმდა. დღეს დადასტურებულად, რაც ვიცით, სექტემბრის თვეში არსებულ ღია სივრცეებში 3 სოციალური ღონისძიება გაუქმდა, მოლაპარაკება 10 პოტენციურ დამკვეთთან შეწყდა. საუბარია რამდენიმე ათეულ ათასზე და არა ერთეულ ათასზე, რაც მნიშვნელოვნად დაარტყამს და დაჩაგრავს უკვე დაჩაგრულ ბიზნესს. ეს ყოველივე ძალიან ცუდი რეალობის წინაშე გვაყენებს. იმდენად არაპროგნოზირებადი გარემოა, შეუძლებელია გადაწყვეტით რაიმე ვთქვათ. შინაგანად მოლოდინი გვქონდა, რომ რაღაც შეიძლებოდა გართულებულიყო, მაგრამ რა თქმა უნდა, არ გვინდოდა ამის დაჯერება და ამაზე ფიქრი. მიუხედავად შექმნილი მდგომარეობისა, ჩვენ მაინც მოვახერხეთ ბიზნესის გაცოცხლება და ხარჯების მინიმალიზაციის გათვალისწინებით, უფრო პოზიტიურად ვიყავით განწყობილები მომავლისკენ“, - აცხადებს გიორგი მურჯიკნელი.
კომპანია „mgroup“-ის საოპერაციო დირექტორის განმარტებით კომპანია ზარალზე მუშაობს, მისი თქმით, ბიზნესს დაახლოებით 80 %-იან კლება აქვს. როგორც გიორგი მურჯიკნელი აცხადებს კიდევ ერთი დახურვა (lockdown) უამრავი ბიზნესის გარდაცვალებას ნიშნავს.
„საქართველოში სარესტორნო და სასტუმრო ბიზნესში ყველა ორიენტირებული იყო განვითარებაზე. მკვდარი ფული არავის ქონდა გათვალისწინებული, არ ვგულისხმობ დიდ ჰოლდინგებს და მსხვილ ორგანიზაციებს, ვისაც შეეძლო მრავალწლიანი ოპერირების კონტექსტში, დაგროვებული ქონოდა კაპიტალი. არსებობს მსხვილი საერთაშორისო კომპანიები,რომლებიც პროცენტულ წილს რისკის ტოლფასად ინახავენ. საქართველოში ასეთი იშვიათია. არავინ არ იყო მზად მოვლენების ასეთი განვითარებისთვის და არ ფიქრობდა, რომ ბიზნესის გადარჩენა მოუწევდა 1 წლის განმავლობაში. ჩვენი ფოკუს ჯგუფი,რომელიც შედგება პროფესიონალებისგან, ეპიდემიოლოგებისგან და კონსულტანტებისგან, ყოველდღიურ რეჟიმში ცდილობს,რომ გარკვეული მოვლენები წინასწარ წარმოვიდგინოთ. ოპტიმისტური მოლოდინი არ გვაქვს, იმედია არ მოგვიწევს ობიექტების დახურვა და თანამშრომელთა სახლში დასმა. სიტუაციის გამოსწორებას მომავალი წლის მაისის თვეში ველით, იმედია საზღვრები გახსნილი იქნება და შეზღუდვები,რომლებიც დღესდღეობით ხელს გვიშლის, მოიხსნება“,- განმარტავს გიორგი მურჯიკნელი.
გიორგი მურჯიკნელი მედია ჰოლდინგთან საქართველოს მთავრობის მიერ გადადგმულ ნაბიჯებზეც საუბრობს და აცხადებს, რომ მთავრობამ ბიზნესის დასახმარებლად ყველაფერი გააკეთა.
„ანტიკრიზისულ გეგმას უნდა შევხედოთ კომპლექსურად, რეალურად უნდა გავიაზროთ, რომ კოვიდი არის გლობალური გამოწვევა. ეს ყოველივე ახალ რელსებზე დააყენებს ბიზნესს. საქართველოს მთავრობამ მცდელობა არ დააკლო ბიზნესს დახმარებოდა, თუმცა შეიძლება სხვადასხვა საკითხების მკაფიოდ განხორციელება კიდევ უფრო დახმარებოდა და ეს ბევრად ეფექტური იქნებოდა. მნიშვნელოვანი შეღავათი იყო საშემოსავლოსა და ქონების გადასახადის რეფორმა. მთავრობის ეს გადაწყვეტილებები ბიზნესს დაეხმარა, რომ შენარჩუნებულიყო“, აცხადებს გიორგი მურჯიკნელი.
ბაჩო ადამია