„ჯეოქეისის“ თავმჯდომარე ვიქტორ ყიფიანმა, გადაცემაში „ბიზნეს ინსაიდერი” გიორგი აბაშიშვილთან ერთად ეკონომიკური დიპლომატიის ერთ-ერთ საკვანძო საკითხზე ეროვნულ უსაფრთხოებაზე ისაუბრა.
მისი თქმით, ეკონომიკური დიპლომატია არის საკითხი, რომელიც იწყება ეკონომიკით, მაგრამ გადადის სხვა სფეროებშიც.
„ერთ-ერთი ასეთი საკვანძო სფერო არის ეროვნული უსაფრთხოება. რატომ უსაფრთხოება? როდესაც ჩვენ ვცხოვრობთ ეკონომიკური ნაციონალიზაციის ხანაში, რომელშიც დაუფარავად შეაბიჯა ბევრმა ქვეყანამ და არ ერიდებათ ამის ღიად დეკლარირება, ამ შემთხვევაში ის თუ როგორ უნდა მოახდინოს ჩვენმა ქვეყანამ, ნავიგაცია და სწორი სვლა ასეთი ქარტეხილების ფონზე, რაც ბოლო ხანებში ნეგატიური დიპლომატიის ნიშნებით ხასიათდება, როგორ გააკეთოს ისე, რომ თავისი საერთაშორისო ვალდებულებების ერთგული დარჩეს, მაგრამ ამავე დროს საკუთარ ეროვნულ ეკონომიკურ, კარგი გაგებით ეგოისტურ ინტერესს, არ უღალატოს, ეს არის ნეგატიური დიპლომატიის მდგენელი და ყველაფერთან ერთად ეკონომიკური დიპლომატიის საკითხი.
გარდა ამისა, როდესაც ჩვენ ვსაუბრობთ სავაჭრო პარტნიორების დივერსიფიცირებაზე, ესეც უსაფრთხოების საკითხია. მაშინ როდესაც ქვეყანა დამოკიდებული არის ერთ, ორ ან რამდენიმე სავაჭრო პარტნიორზე, ბუნებრივია დღეს როდესაც ვაჭრობა გახდა საკუთარი პოლიტიკური და გეოპოლიტიკური ინტერესების გატარების საშუალება, ის იარაღად იქცა. დივერსიფიცირება მათ განელებას ემსახურება. ასევე მდიდარი მოსახლეობა ანუ ინვესტიციების შემოტანა და რაც შეიძლება მეტი შემოსავლიანი ადამიანის გაჩენა ქვეყანაში და ამ მოწყვლადობის, სიღარიბის შემცირება ნიშნავს იმას, რომ საზოგადოების მედეგობა იზრდება და ესეც უსაფრთხოების საკითხი არის. ასე რომ ეს ყველაფერი ერთად აღებული იძლევა იმის საშუალებას, რომ ეს ისეთი სახის ეკონომიკური დიპლომატია არის, რომელიც პირველ რიგში ქვეყნის უსაფრთხოებას, მის სტაბილურობას და საგარეო ასპარეზზე პოზიციონირებას უკავშირდება.
იმ ახალ რეალობაში რაშიც ჩვენ ვართ მოქცეული და მსოფლიო ეკონომიკური ლანდშაფტი იცვლება, მთხოვნელთა რიგი ახალ ინვესტიციებზე და ფულად შემოდინებებზე დაუნდობელი ხდება, ალბათ ამ თვალსაზრისით იმის ფუფუნება რომ იყოლიო წარმომადგენლობა და მან ვერ დადოს მატერიალური შედეგი, ეს ამ ვითარებაში უპატიებელი არის“, — აღნიშნა ვიქტორ ყიფიანმა.