„მსოფლიო ეკონომიკური პროგნოზი საკმაოდ ნეგატიურია. იყო მოლოდინი,რომ 2019 წლის შენელებული ზრდა 2020 წელს გაუმჯობესდებოდა. თუმცა ახლა არსებობს ნეგატიური სცენარი, რომელიც ითვალისწინებს კორონავირუსის გავრცელებას მრავალ ქვეყანაში, რის შედეგადაც მსოფლიო ეკონომიკური ზრდა 2,9%-დან 1.5%-მდე შემცირდება. ჩვენს რეგიონზე გავლენა დაახლოებით  2.5%-იანი იქნება. აქტიურად გვაქვს შეხვედრები მთავრობის ადმინისტრაციის, ეკონომიკის სამინისტროს და ფინანანსთა სამინისტროს მონაწილეობით  და ერთად ვიხილავთ სხვადასხვა სცენარს“ - ამის შესახებ რადიო „კომერსანტის“ გადაცემაში ეკონომისტის დრო ლევან ქისტაურთან ერთად“ საქართველოს ეროვნული ბანკის ვიცე–პრეზიდენტმა არჩილ მესტვირიშვილმა ლარის კურსსა და მონეტარულ პოლიტიკაზე საუბრისას განაცხადა. 

მისი ინფორმაციით, ლარის კურსი არის ჩვენი საგარეო ეკონომიკური ინდიკატორი, რაზეც გავლენას ძალიან ბევრი ფაქტორი ახდენს. „საქართველოში გვაქვს მცურავი გაცვლითი კურსი, ყველა ინფორმაცია და მოლოდინი აისახება კურსზე. გრძელვადიანი სტაბილურობისთვის მცურავი გაცვლითი კურსი ოპტიმალურია, განსაკუთრებით, მცირე ზომის და ღია ეკონომიკის მქონე ქვეყნისთვის.  გასულ წელს,როდესაც რუსეთმა ემბარგო გამოაცხადა, გაჩნდა კურსის გაუფასურების მოლოდინი, მათ შორის იყო მოლოდინი იმისა, რომ ტურისტულ ემბარგოს სხვა ტიპის ოფიციალური თუ არაოფიციალური ემბარგო დაემატებოდა. შედეგად, გაუფასურებული კურსი გადავიდა ინფლაციაში, რის საპასუხოთაც ჩვენ გავამკაცრეთ მონეტარული პოლიტიკა“-აცხადებს მესტვირიშვილი. 

ეროვნული ბანკის ვიცე-პრეზიდენტმა  უპასუხა კრიტიკას ეროვნული ბანკის დაგვიანებულ ნაბიჯებთან დაკავშირებით და განაცხადა,რომ უახლოეს მომავალში ეროვნული ბანკის ჩარევა მოსალოდნელი არ არის.

„ჩვენ ვიღებთ გადაწყვეტილებებს შესაბამისი ანალიზის საფუძველზე. ჩვენი მოქმედებები დამოკიდებული იყო 2019 წლის ზაფხულის შოკებზე და იმაზე, თუ როგორ განვითარდებოდა ეს შოკები. შეიძლებოდა მონეტარული პოლიტიკის შერბილება დაგვეწყო, თუ ეკონომიკურ ზრდაზე შოკს ექნებოდა უარყოფითი გავლენა, რაც არ მოხდა. მოხერხდა ის, რომ ტურისტები არა რუსეთიდან, არამედ ევროპის სხვა ქვეყნებიდან შემოვიდნენ, რამაც პოზიტიური გავლენა იქონია ეკონომიკის ზრდაზე. სექტემბერი იყო პირველი თვე, როდესაც ევროპიდან უფრო მაღალი ტურისტული შემოსავლები დაფიქსირდა, ვიდრე რუსეთიდან.

უახლოეს მომავალში ჩარევის საჭიროებას ვერ ვხედავთ, მაგრამ ჩვენი შემდგომი მოქმედებები დამოკიდებულია ქვეყანაში, რეგიონში არსებულ ცვლილებებზე“,- ამბობს მესტვირიშვილი.

მან გადაცემაში მიმდინარე ანგარიშის დეფიციტზეც ისაუბრა.  მისი თქმით, ეს მაჩვენებელი მნიშვნელოვანია ქვეყნის ეკონომიკური სტაბილურობისთვის. „2019 წელს, წინასწარი მონაცემებით, დამოუკიდებელი საქართველოს ისტორიაში ყველაზე დაბალი მიმდინარე ანგარიშის დეფიციტი გვაქვს 4.4%-ი. რაც უფრო დაბალია ეს მაჩვენებელი, მით უფრო ნაკლებად ვართ დამოკიდებული საგარეო შოკებზე“ - განაცხადა არჩილ მესტვირიშვილმა.

მოამზადა ნათია კეკენაძემ