ერევანში, თავისუფლების მოედანზე დემონსტრანტებსა და პოლიციას შორის დაპირისპირება მოხდა. აქციის მონაწილეები სომხეთის პრემიერ-მინისტრის, ნიკოლ ფაშინიანის მიერ რუსეთისა და აზერბაიჯანის ლიდერებთან ერთად მთიანი ყარაბაღის ზონაში ომის დასრულების შესახებ ხელმოწერილი დოკუმენტის გაუქმებას ითხოვენ.
ამჟამად სომხეთის დედაქალაქის ცენტრში ათასობით ადამიანია შეკრებილი. ისინი პრემიერ-მინისტრს სახელმწიფო ინტერესების ღალატში სდებენ ბრალს.
მანამდე ცნობილი გახდა, რომ პოლიციამ დააკავა ოპოზიციური პარტია „აყვავებული სომხეთის“ ლიდერი, დეპუტატი გაგიკ წარუკიანი. სომხური მედიის ცნობით, ასევე დააკავეს კიდევ რამდენიმე აქტივისტი და ოპოზიციონერი დეპუტატი.
შეგახსენებთ, რომ სომხეთის პრემიერ-მინისტრმა რუსეთისა და აზერბაიჯანის პრეზიდენტთან ერთად მთიანი ყარაბაღის კონფლიქტის ზონაში ომის დასრულების შესახებ შეთანხმებას 9 ნოემბერს მოაწერა ხელი. ფაშინიანი აცხადებს, რომ „მას სხვა გზა არ ჰქონდა“.
შეთანხმების მიხედვით, აზერბაიჯანელი და სომეხი სამხედროები 27 სექტემბერს დაწყებული სამხედრო მოქმედებების შემდეგ დაკავებულ პოზიციებზე რჩებიან. ამასთან, სომხეთმა პირობა დადო, რომ თვის ბოლომდე რეგიონის რამდენიმე რაიონს აზერბაიჯანს გადასცემს, ხოლო არაღიარებული მთიანი ყარაბაღისა და სომხეთის დამაკავშირებელ დერეფანს რუსი მშვიდობისმყოფელები გააკონტროლებენ. აღსანიშნავია, რომ დოკუმენტში არაღიარებული ყარაბაღის სტატუსზე საუბარი არ არის.
1tv.ge
დაპირისპირება
