თურქეთის პრეზიდენტი რეჯეფ თაიფ ერდოღანი ევროპას ტერორიზმის ახალი საფრთხის შესახებ აფრთხილებს. ერდოღანის განმარტებით, ასეთი საფრთხის წინაშე ევროპა იმ შემთხვევაში დადგება, თუ გაეროს მიერ აღიარებული მთავრობა ტრიპოლში დამარცხდება. წერს France24. 

ერდოღანი ბერლინის კონფერენციამდე გამოქვეყნებულ სტატიაში აღნიშნავს, რომ ევროკავშირის მხრიდან ადეკვატური მხარდაჭერის არარსებობა მისივე ღირებულებების ღალატი იქნება. 

„ევროპა ახალ პრობლემების და საფრთხეების წინაშე აღმოჩნდება, თუ ლიბიის ლეგიტიმური მთავრობა დაეცემა“, - აცხადებს ერდოღანი. 

მისივე თქმით, ისეთი ტერორისტული ორგანიზაციები, როგორიც ISIS-ი და ალ-ქაედა არიან, ძალების აღსადგენად ნაყოფიერ ადგილს იპოვიან.

19 იანვარს ბერლინში ლიბიის კრიზისთან დაკავშირებით საერთაშორისო კონფერენცია გაიმართება. გაერო-ს ეგიდით დაგეგმილ ღონისძიებაში მონაწილეობას რიგი სახელმწიფოების წარმომადგენლები მიიღებენ. ლიბიის საკითხებზე გერმანიაში რუსეთის პრეზიდენტი ვლადიმერ პუტინიც ჩავიდა. 

გერმანიის საგარეო საქმეთა მინისტრის, ჰეიკო მაასის თქმით, ლიბიის ეროვნული არმის გენერალი ხალიფა ჰაფტარი ქვეყანაში ცეცხლის შეწყვეტას დათანხმდა. 

ასევე ცნობილია, რომ თურქეთმა ლიბიაში ჯარის გაგზავნა დაიწყო. თურქი სამხედროები გაეროს მიერ მხარდაჭერილი ეროვნული შეთანხმების მთავრობას დაეხმარებიან.

13 იანვარს ცნობილი გახდა, რომ მოსკოვში გამართული მოლაპარაკებების დროს, რომლის მიზანიც ლიბიაში უპირობოდ ცეცხლის შეწყვეტა იყო, პროგრესის მიუხედავად შეთანხმებას ვერ მიაღწიეს. 12 იანვარს კი ცეცხლის შეწყვეტის შესახებ შეთანხმება მიღებიდან რამდენიმე წუთში დაირღვა, რაშიც დაპირისპირებული მხარეები ერთმანეთს ადანაშაულებდნენ.

2011 წელს მუამარ კადაფის გადაყენების შემდეგ, ლიბიაში ორმმართველობა ჩამოყალიბდა. ტრიპოლი და ქვეყნის დასავლეთ მხარე ხელისუფლების კონტროლის ქვეშაა, რომელსაც მხარს უჭერს გაერო. აღმოსავლეთ ნაწილი და სამხრეთი 2014 წელს არჩეული „ტობრუკეს“ მთავრობის კონტროლის ქვეშაა, რომელიც ხალიფა ჰაფტარის და მისი ჯარის მომხრეა.