ექსპორტი 2021 წლის იანვარ-მაისში გასული წლის ანალოგიურ პერიოდთან შედარებით 24.4%-ით, $1.538 მლრდ-მდე გაიზარდა.  უშუალოდ მაისში 44.8%-იანი მატების შემდეგ ექსპორტმა $339 მლნ-ს მიაღწია, თუმცა აღნიშნული მაჩვენებელი 2019 წლის დონესთან შედარებით 0.5%-ითაა შემცირებული. ინფორმაციას საქსტატი ავრცელებს.

2020 წლიდან მოყოლებული საექსპორტო პარტნიორებში ჩინეთი უცვლელ პირველ ადგილს ინარჩუნებს. იანვარ-მაისში ჩინეთში შარშანდელთან შედარებით 62.3%-ით მეტი - $262 მლნ-ის პროდუქცია გავიდა. ამასთან თუ გასულ წელს ჩინეთის წილი ექსპორტში 13.1%-ს შეადგენდა, დღეს ის 17.1%-მდეა გაზრდილი. მნიშვნელოვანია იმის გათვალისწინება, რომ ექსპორტი ღვინის ან რომელიმე სხვა ტრადიციული მეურნეობის ხარჯზე არ მომხდარა. ღვინის გაყიდვები მხოლოდ 275 ათასი დოლარით $5.285 მლნ-მდე გაიზარდა, რაც წილობრივად 2%-ა, მინერალური წყლები ჩამონათვალში არც იძებნება, მთავარი საექსპორტო პროდუქტი ჩინეთში სპილენძის მადნებია, რომლის გაყიდვებიც $132 მლნ-დან $217 მლნ-მდე გაიზარდა. თავის მხრივ სპილენძის მადნები ქართული კი არა, სომხური პროდუქციაა და რეექსპორტს წარმოადგენს. იმის გათვალისწინებით, რომ საქართველოს 2018 წლის 1-ლი იანვრიდან ჩინეთთან თავისუფალი ვაჭრობის ხელშეკრულება აქვს გაფორმებული, ქვეყანა საბაჟო გადასახადისგან თავისუფლდება, რაც რეექსპორტს მომგებიანს ხდის.

ჩინეთის შემდეგ, $205 მლნ-იანი ექსპორტით მეორე ადგილი რუსეთმა დაიკავა, $196 მლნ-ით აზერბაიჯანმა მესამე ადგილი დაიკავა. ექსპორტის მოცუობამ $100 მლნ-ს კიდევ ორ ქვეყანაში: თურქეთსა და უკრაინაში გადააჭარბა.