საქართველოდან  ექსპორტირებული თაფლის რაოდენობა ყოველწლიურად მცირდება. სტატისტიკის ეროვნული სამსახურის მონაცემებით ქვეყანაში ექსპორტზე 6.5 ტონა თაფლი გავიდა, რომლის ღირებულებამ ჯამში 56 300 დოლარი შეადგინა. გასულ წელს ჯამში საზღვარგარეთ 21 ტონა თაფლის ექსპორტი განხორციელდა, ღირებულება 69.5 ათასი დოლარი შეადგინა. 2017 წელი - 2.2 ტონა  იქნა ექსპორტზე გატანილი (15.8 ათასი დოლარი) , 2016 წელი - 3.8 ტონა (ღირებულება 21.2 ათასი დოლარი), ხოლო 2015 წელი - 8.3 ტონა (ღირებულება 73.1 ათასი დოლარი).

ქართული თაფლის საერთაშორისო ბაზრებზე პოპულარიზაციის მიზნით, საქართველოს მეფუტკრეთა გაერთიანებამ ორი მნიშვნელოვანი პლატფორმა: www.honeyofgeorgia.com და www.jarahoney.com შეიქმნა. ვებ-გვერდი ქართული თაფლით დაინტერესებულ პირებს საშუალებას აძლევს გაეცნონ საქართველოში წარმოებულ თაფლის სახეობების მრავალფეროვნებას, საქართველოს გეოგრაფიულ ბიომრავალფეროვნებასა და ბუნებრივ სიმდიდრეს. ასევე მათ შესაძლებლობა აქვთ სიღრმისეული ინფორმაცია მიიღონ რეგიონალური თაფლოვანი მცენარეებსა და ქართული ფუტკრის შესახებ.

თუმცა, ორი ვებ-გვერდი და რამდენიმე ვიდეო რგოლი საკმარისი არ აღმოჩნდა იმ რეალობის შესაცვლელად, რომელსაც სტატისტიკის ეროვნული სამსახურის მონაცემები გვიჩვენებს. მეფუტკრე ირინა ლორთქიფანიძე „კომერსანტთან“ სახელმწიფოს როლზე საუბრობს და მთავრობას ქართული თაფლის ცნობადობის გაზრდაში დახმარებას სთხოვს.

„საქართველოს მეფუტკრეთა გაერთიანებამ შექმნა ორი ვებ-გვერდი. აქამდე ჩვენ ქართული ფუტკრის შესახებ ვებ-გვერდი არ გვქონია. სოფლის მეურნეობის სამინისტროში მიმდინარეობს შეხვედრები, უნდა დაგვეხმარონ ბაზარზე ქართული თაფლის პოპულარიზაციაში, თუ მთავრობა არ მოგვეხმარება ფართო მასშტაბით, ჩვენ ვერაფერს გავხდებით. ცნობადობის ამაღლებისთვის საჭიროა ვიდეო რგოლები, ხშირი რეკლამები, უნდა გაიგონ, რომ ქართული თაფლი საუკეთესოა. ყველა მეფუტკრე უნდა ცდილობდეს რომ კარგი თაფლი აწარმოოს, კარგ ჭურჭელში ჩამოასხას, დაცული უნდა იყოს ყველანაირი ეტიკეტი და ამ ყველაფრის შემდეგ სასურველ შედეგს მივაღწევთ“, - ირინა ლორთქიფანიძე.

საქართველოს მეფუტკრეთა გაერთიანების თავმჯდომარე ალეკო პაპავა აცხადებს, რომ თაფლის ბიზნესის განვითარებისთვის ქართული თაფლს პოპულარიზაცია საერთაშორისო ბაზრებზე მნიშვენელოვანია. მისი თქმით, ინტერესი ქართული თაფლის მიმართ დღითიდღე იზრდება.

„www.honeyofgeorgia.com -ს შემთხვევაში საუბარია ქართულ თაფლზე, www.jarahoney.com-ზე კი გაიგებთ ჯარაზე, ფუტკრის ქართულ ტრადიციული სკაზე, რომელიც ფუტკრების მოშინაურების მიზნით საქართველოში უძველესი დროიდან გამოიყენება. ჯარას თაფლი საქართველოში აღმოჩენილი ძალიან იშვიათი და მაღალი ხარისხის ორგანული ველური პროდუქტია. ის 100% სუფთა და ველური თაფლია. ჩვენი ტრადიციული მეფუტკრეობაა ეს და ამ კუთხით მსოფლიოში კიდევ უფრო მეტმა ადამიანმა უნდა გაიგონ ჩვენზე, ჩვენს ისტორიაზე. საპრომოუშენო ვიდეო რგოლებიცაა შექმნილი, ამ ყველაფერმა საბოლოოდ დაინტერესება გამოიწვია, წერილები მოგვდის უკვე ბრიტანეთიდან, აზიის ქვეყნებიდან რომლებიც ითხოვენ, რომ ჩვენი პროდუქტი გავაცნოთ, თუმცა რა თქმა უნდა საჭიროა კიდევ უფრო მეტი აქტიურობა“, განაცხადა ალეკო პაპავამ.

 ბაჩო ადამია