ვაკის პარკთან მდებარე რესტორან „სენატის“ ყოფილ შენობაში, Aspria-ს ფიტნეს დარბაზის გახსნა გაუთვალისწინებელი ხარჯებისა და დაზიანებული ინფრასტრუქტურის გამო გადაიდო. ფილიალი 2021 წლის იანვარში უნდა გახსნილიყო. როგორც „კომერსანტს“ ასპრიას დირექტორი ოთარ თავყელიშვილი უყვება, ყოფილ რესტორან „სენატის“ ინფრასტრუქტურა სრულად მწყობრიდან იყო გამოსული, რის გამოც თავდაპირველად გათვალისწინებული ხარჯების მოცულობა ნახევარი მილიონი ლარით გაიზარდა.
„სარემონტო სამუშაოები მიდის, იმდენად დაზიანებული იყო ყველაფერი, რომ ახალი ხარჯები გაგვიჩნდა და საინვესტიციო მოცულობაც ნახევარი მილიონი ლარით გაიზარდა. ვენტილაცია და კონდიცირების სისტემები, რისი იმედიც გვქონდა, რომ წესრიგში იქნებოდა სრულად შესაცვლელი აღმოჩნდა. ამიტომ ვადებმაც გადაიწია, ვფიქრობთ სექტემბრის დასაწყისისთვის ფილიალი იქნება მწყობრში და გახსნისთვის მზად,“ - ამბობს ოთარ თავყელიშვილი.
ეს იქნება პრემიუმ-ფილიალი და ზუსტად განსაზღვრული არ არის მომსახურების ფასი, მაგრამ ვეცდებით ჩვენს პოლიტიკას არ ავცდეთ და უფრო ეკონომიური ვიყოთ, ვიდრე ბაზარზე არსებობს. ჩვენ ვაკეში ყველაზე დაბალი ფასი გვქონდა, სამწუხაროდ ამ ფასს ვეღარ შევინარჩუნებთ ამ ფილიალში, თუმცა სხვა პრემიუმ კლასის ფიტნეს ცენტრებთან შედარებით უფრო დაბალი ფასი გვექნება.
„ასპრია“ ამჟამად „ექსპო ჯორჯიას“ ტერიროტიაზე ახალი ფილიალის მშენებლობასთან დაკავშირებით შეთანხმებას აფორმებს და ერთ წელიწადში ფიტნეს ცენტრი 500 000 დოლარის ღირებულების ახალი ფილიალიც გაიხსნება.
„კიდევ გვაქვს გეგმები, ვაწერთ ხელს გამოფენის ტერიტორიაზე ახალი ფილიალის თაობაზე ხელშეკრულებას. ეს ფილიალი ერთ წელიწადში იქნება. ასევე ქუთაისშიც ვაპირებთ ფილიალის დამატებას.
გამოფენის ტერიტორიაზე ახალი ფილიალის პროექტის მომზადებას ახლა ვიწყებთ. ჩვენ მივდივართ იმ მიმარტულებით, რომ პრემიუმ კლასის მომსახურებას ვაძლევთ მაგრამ ვცდილობთ ხელმისაწვდომი იყოს მოსახლეობისთვის. იმიტომ არამ რომ სახელს მოჰყვეს ძვირი ფასი ან რაღაცით ნაკლები ვართ. გამოფენასთან დაახლოებით 500 000 დოლარის ღირებულების ინვესტიცია ჩაიდება. ფართი საკმაოდ დიდი გვექნება და კარგი ტერიტორიაა. მეპატრონისგან კარგი შემოთავაზება გვაქვს და ადგილი ყველაზე კარგია, რადგან ბევრი მოვარჯიშეა და ფიტნეს ცენტრი კი ახლოს არ არის,“ - ამბობს „ასპრიას“ დირექტორი.
2020 წლიდან კომპანია „ასპრია“ „ჰოლდინგ მეტის“ მფლობელობაში გადავიდა და ამჟამად კომპანია რებრენდინგს განიცდის.
მარიამ მორგოშია