სადაზღვევო ინდუსტრია COVID-19-ის მართვაში ჩაერთო. ეპიდემიის მართვაში პირველადი მონაცემებით სადაზღვევო კომპანიების ჯამში 50-60 ოჯახის ექიმია ჩართული.
„გლობალ ბენეფიტს ჯორჯიას“ გენერალური დირექტორი ნინო კობახიძე „კომერსანტთან“ საუბრისას აცხადებს, რომ მსუბუქი პაციენტების მართვის პროცესში, რომლებიც ბინაზე მკურნალობენ, ჩართულნი არიან სადაზღვევო კომპანიების პროვაიდერი კლინიკების ოჯახის ექიმები.
„ჩვენ ვართ ჩართულები მხოლოდ ბინაზე მოვლის პროცესში, ძალიან გაზრდილია მომართვიანობა, არამხოლოდ 112-დან შემოდის პაციენტები, არამედ გაიგეს რა ეს ინფორმაცია, რომ ჩავერთეთ, პირდაპირ ჩვენ გვიკავშირდებიან. გართულებული პაციენტები საბედნიეროდ არ გვყავს, ოჯახის ექიმები მაქსიმალურად ჩართულები არიან პროცესში. გადატვირთულია ქოლ ცენტრი და დღის განმავლობაში ძალიან ბევრი ადამიანი გვიკავშირდება, ყველა დაძაბულია, ამიტომ მომართვიანობა ძალიან გაზრდილია. დღის განმავლობაში საშუალოდ 3-4 ადამიანი უკვე კოვიდდადასტურებული სიმპტომებით მოგვმართავს.
რაც შეეხება ხარჯებს, ბინაზე მომსახურებას არ სჭირდება ჩვენი მხრიდან განსაკუთრებული დანახარჯები, თუმცა რაც შეეხება სატელეფონო ოპერატორებს და ოჯახის ექიმებს, მათი დამატება მოგვიწია, მაგრამ ეს ჩვენივე დაზღვეულებისთვის გავაკეთეთ და ეს ხარჯები ლოგიკურიც იყო. რაც შეეხება მედიკამენტებს, სიცხის დამწევები და ელემენტარული წამლები არის პროტოკოლით გათვალისწინებული და ამ კუთხითაც ხარჯების ზრდას არ ველით. თუმცა აღსანიშნავია, რომ სამედიცინო სერვისების და მედიკამენტების ფასები ლარის კურსის გაუფასურების გამო ძალიან გაზრდილია, ამიტომ სადაზღვევოების დანახარჯმა ზოგადად მოიმატა.
ჯანდაცვის სამინისტროსთან მიმდინარეობს კომუნიკაცია, იმასთან დაკავშირებით რომ დადგენილებაში განხორციელდეს ცვლილება, რადგან სადაზღვევო კომპანიებზე ჩანაწერი იურიდიულად არ არის გამორთული, ჩვენ არ ვართ სამედიცინო სერვისების განმახორციელებლები, ჩვენ სერვისებს ვახორციელებთ ჩვენი პროვაიდერი კლინიკების მეშვეობით“, - განაცხადა ნინო კობახიძემ.
„იმედი L”-ის გენერალურმა დირექტორმა გივი გიორგაძემ განაცხადა, რომ ამ ეტაპზე სადაზღვევო კომპანიები დაზღვეული კოვიდინფიცირებული პაციენტების ბინაზე მკურნალობის და მეთვალყურეობის პროცესში ჩაერთვნენ.
„სადაზღვევოები სამინისტროსთან ერთად ვმუშაობთ დაზღვეული კოვიდინფიცირებული პაციენტების ბინაზე მკურნალობის და მეთვალყურეობის პროცესში ჩართვაზე. ჩვენი დაზღვეულები ჩვენს მართვაში მომსახურე ოჯახის ექიმებს მუდმივად ეკონტაქტებიან და მათგან იღებენ შესაბამის რჩევებს. დანახარჯები არის, თუმცა უნდა აღვნიშნო, რომ ჩვენ გვაქვს რესურსი და ვალდებულებაც წვლილი შევიტანოთ COVID-19-ის მართვის გამართულად განხორციელებაში“, - აღნიშნა გივი გიორგაძემ.