„მეეჭვება, რომ საგანგებო მდგომარეობის დასრულების შემდგომ რესტორნებსა და ბარებში ხალხის აქტიურობა ისეთი იყოს, როგორიც იტალიაშია, სადაც ადამიანებმა საქმიანობა განაახლეს, დადიან საზოგადოებრივი თავშეყრის ადგილებში და ფოტოებს იღებენ. საქართველოში ეს ყველაფერი დამოკიდებულია იმაზე, თუ როგორ შეხედავენ სიტუაციას ქართველები, შესაბამისად, ეს ბიზნესზეც აისახება. - ამის შესახებ „კომერსანტთან“ იტალიელმა შეფ-მზარეულმა ენზო ნერიმ ისაუბრა.
იტალიელი შეფ-მზარეული წლებია საქართველოში საქმიანობს, ამჟამად კი კახეთში „შატო მერეში“ ქართულ-იტალიური რესტორნის გახნას გეგმავს, სახელწოდებით Enzo’s Ezo . რესტორნის იდეა მზარეულს ღვინის სასტუმრო „შატო მერეს“ დამფუძნებელთან გია პირადაშვილთან ერთად დაებადა. როგორც ენზო ნერი აღნიშნავს, როგორც კი რესტორნებისთვის დაშვებული იქნება საქმიანობა, ახალი რესტორანიც სტუმრებს მოემსახურება.
რა მდგომარეობაშია რესტორნის სექტორი და ვის გაუჭირდება ბიზნესის შენარჩუნება ? ენზო ნერი აღნიშნავს, რომ როგორც მსხვილი, ასევე პატარა კვების ობიექტები რეგულაციების გამო დაკარგული დროისა და შემოსავლების დაბრუნებას მომავალ წლამდე ვერ შეძლებენ.
„ხალხი ეცდება დისტანცია დაიცვას, დაწესდება რეგულაციები, რის გამოც პატარა რესტორნებს დიდი დანაკლისი ელოდებათ, რადგან ბევრ მომხმარებელს ვერ მოემსახურებიან. რაც შეეხება დიდ რესტორნებს, მაგალითად Radisson-ის მზარეულებსაც კი ხელფასის მხოლოდ 30 პროცენტი აუნაზღაურდათ. მიტანის სერვისით ნებისმიერი რესტორანი მხოლოდ 700 ლარს გამოიმუშავებს დღეში, რაც ფაქტობრივად არაფერია. საკმაოდ მძიმე მდგომარეობაა და ტურიზმის აღდგენას ველოდებით, რადგან ქართული რესტორნების სტუმრებს შორის ადგილობრივსა და ტურისტს შორის თანაფარდობა 50:50-ზეა, ტურისტების გარეშე კი ძალიან ძნელი იქნება ბიზნესის შენარჩუნება“. -აცხადებს ენზო ნერი.
შევა თუ არა რესტორნებში გამოყენებული ჰიგიენური ინვენტარის ღირებულება მომსახურების ფასში, იტალიელი შეფ-მზარეული აღნიშნავს, რომ გახსნის შემდგომ ახალი რეგულაციებით ამოქმედებისას რესტორნებს ცალკე დიდი ხარჯი ელით ჰიგიენის საშუალებების შეძენისთვის, რაშიც მთავრობის ფინანსური თანამონაწილეობა მაქსიმალური უნდა იყოს.
„რესტორანში, გარდა იმისა, რომ დაცული უნდა იყოს ჰიგიენის წესები, საკვების უსაფრთხოების კუთხით საკუთარი ნორმები გვექნება, ამას ემატება კორონავირუსისგან თავის დასაცავად გამოცემული დირექტივები. ბევრისთვის შეიძლება არაკოფორტული იყოს ნიღბითა და ხელთათმანებით სადილობა.
რაც შეეხება სამედიცინო ნიღბებისა და ჰიგიენისთვის აუცილებელი ატრიბუტების ღირებულებას საქათველოში, ვხედავ რომ ეს ადამიანების სპეკულაციის შედეგია.ზოგადად, მთელს მსოფლიოში კატასტროფიდან მოგების მიღებას ვიღაც მაინც ცდილობს. როგორ უნდა მოიმარაგონ კომპანიებმა ეს აუცილებელი ჰიგიენის საშალებები - ეს ყველაზე რთულია. ალბათ მომსახურების ღირებულებაში მოხდება სწორედ ამ საშუალებების ფასის დამატებაც, სხვა გზას ვერ ვხედავ. პირველ რიგში, მთავრობას უნდა აინტერესებდეს უზრულველყოფილია თუ არა კომპანია უსაფრთხოებისთვის აუცილებელი ყველა ჰიგიენური საშუალებით. ამაში კი სწორედ მთავრობა უნდა დაგვეხმაროს. ხელისუფლებამ ღამით გარეთ გასვლა კი უმეტესად იმიტომ აკრძალა, რომ პანდემიის გამო სასოწარკვეთილ მოქალაქეებს არ გაეძარცვათ ობიექტები. „ — განმარტავს ენზო ნერი.
მარიამ მორგოშია