ენტონი ფაუჩის განცხადებით, იმ შტატებმა, რომლებიც გახსნის პროცესს იწყებენ, სიფრთხილე უნდა გამოიჩინონ.
აღსანიშნავია, რომ ენტონი ფაუჩიმ ინსტაგრამზე ინტერვიუ მსახიობ ჯულია რობერტს მისცა. ჯულია რობერტსმა მას ჰკითხა, თუ რა არის ყველაზე მნიშვნელოვანი, რაც ამერიკელებმა ახლა უნდა იცოდნენ.
„როგორც საზოგადოებრივი ჯანდაცვის სფეროში ჩართული ადამიანი, როგორც მეცნიერი და ექიმი, ერთადერთი, რისი გაკეთებაც შემიძლია ის არის, რომ სამეცნიერო და სამედიცინო მოსაზრება გავუზიარო საზოგადოებას, რომელიც უბრალოდ მოსაზრება არ არის და სამეცნიერო მტკიცებულებას ეფუძნება. სამეცნიერო მტკიცებულება კი მკაფიოდ ცხადყოფს, რომ სოციალურმა დისტანცირებამ იმუშავა, თუმცა სრულად არა, თუ მრუდეს დააკავირდებით, რომელიც მნიშვნელოვნად არ მცირდება. ახლა ბედის ცდუნების დრო არ არის. უკუსვლა დაუშვებელია“, - განაცხადა ენტონი ფაუჩიმ.
12 მაისს, ენტონი ფაუჩიმ განაცხადა, რომ შტატების ნაადრევ გახსნას შეიძლება სერიოზული შედეგები მოჰყვეს.
ენტონი ფაუჩიმ ასევე აღნიშნა, რომ შეზღუდვების მოხსნა კორონავირუსით ინფიცირების შემთხვევების გაჩენას გამოიწვევს.
„ის, თუ როგორ შეგვიძლია შემთხვევების იდენტიფიცირება, იზოლირება, კონტაქტების გამოვლენა, განსაზღვრავს იმას, თუ რა გზით უნდა წავიდეთ ამერიკის გახსნასთან დაკავშირებით. თუ რომელიმე ქალაქი ან შტატი გახსნას შეუდგება ისე, რომ ეფექტური რეაგირების შესაძლებლობა არ ექნება, მაშინ შემთხვევების ზრდას ვიხილავთ, რაც შესაძლოა აფეთქებაში გადაიზარდოს“, - განაცხადა ენტონი ფაუჩიმ.
ბოლო მონაცემებით, აშშ-ში კორონავირუსით ინფიცირების 1.59 მილიონი შემთხვევა დაფიქსირდა, ხოლო 94 276 ადამიანი კი გარდაიცვალა.
imedinews.ge