აშშ-ის სახელმწიფო მდივანმა ენტონი ბლინკენმა დაგმო ტაივანის მახლობლად ჩინეთის მიერ საბრძოლო სროლის თანხლებით დაწყებული სამხედრო მანევრები, რომელსაც „მნიშვნელოვანი ესკალაცია“ უწოდა.

ბლინკენის თქმით „გამართლება არ აქვს“ ამ წვრთნებს, რომელიც ჩინეთმა აშშ-ს წარმომადგენელთა პალატის სპიკერის ნენსი პელოსის ტაივანის თვითმმართველ კუნძულზე ვიზიტის საპასუხოდ წამოიწყო.

პეკინი, რომელიც ტაივანს განიხილავს, როგორც სეპარატისტულ პროვინციას, აშშ-ს ოფიციალური პირების კონტაქტებს ტაიპეისთან აფასებს, როგორც კუნძულის მრავალწლიანი დე-ფაქტო დამოუკიდებლობის მხარადჭერის მცდელობას. აშშ-ს ოფიციალურმა პირები ამ პრეტენზიას უარყოფენ.

ენტონი ბლინკინმა ხაზი გაუსვა, რომ ნენსი პელოსის ვიზიტის შემდეგ ერთი ჩინეთის პრინციპთან დაკავშირებით აშშ-ის პოზიციაში არაფერი შეცვლილა.

„მე ნამდვილად იმედი მაქვს, რომ პეკინი არ წარმოქმნის კრიზისს და არ ეძებს საბაბს აგრესიული სამხედრო ქმედების გასაფართოებლად“, - აღნიშნა აშშ-ის სახელმწიფო მდივანმა კამბოჯის დედაქალაქ პომპენში, სამხრეთ-აღმოსავლეთ აზრიის საგარეო საქმეთა მინისტებთან შეხვედრის შემდეგ.

ჩინეთმა, რომელიც მასშტაბურ წვრთნებს პელოსის ვიზიტზე „აუცილებელ“ პასუხად მიიჩნევს, მანევრების დროს ბალისტიკური რაკეტები გამოიყენა და ტაივანის გარშემო საბრძოლო თვითმფრინავები და ხომალდები განათავსა.

წყარო: www.radiotavisupleba.ge