საერთაშორისო კომპანია „ენკამ“ ნამახვანჰესის მშენებლობაზე საბოლოო უარი განაცხადა და თავის ამ გადაწყვეტილებას პირობების შეუსრულებლობითა და ფორსმაჟორით განმარტავს.
ENKA İNŞAAT აცხადებს, რომ მისმა შვილობილმა კომპანიამ, Enka Renewables-მა გადაწყვიტა, შეწყვიტოს სამშენებლო სამუშაოების ხელშეკრულება საქართველოს სახელმწიფოსთან, ნამახვანის კასკადის პროექტის შემუშავების, მშენებლობის, საკუთრებისა და ექსპლუატაციის შესახებ. საქართველოს 2019 წლის 25 აპრილის კონტრაქტის ხანგრძლივად დარღვევის და ფორსმაჟორული სიტუაციის გამო, - ნათქვამია კომპანიის განცხადებაში.
„რიონის ხეობის მცველების“ ლიდერი ვარლამ გოლეთიანი, რომელმაც ჰესის წინააღმდეგ არაერთი მრავალრიცხოვანი საპროტესტო აქცია გამართა, კმაყოფილებას არ მალავს „ენკას“ გადაწყვეტილებით, რომლის მიხედვითაც „ნამახვანჰესის“ მშენებლობა წყდება და ქვეყანასთან ხელშეკრულება უქმდება. რადიო "თავისუფლებასთან" საუბრის დროს გოლეთიანი ამბობს, რომ ხელშეკრულების შეწყვეტა არ აწყობს ხელისუფლების იმ წარმომადგენლებს, რომლებიც ამ პროექტით პირადი სარგებლის მიღებაზე ფიქრობდნენ.
ჰესის მშენებლობის მოსამზადებელი სამუშაოების წარმოებაში გოლეთიანის რიონის მცველები თვეების განმავლობაში აფერხებდნენ. ხშირი იყო პოლიციასთან პროტესტანტების დაპირისპირებაც.
ნამახვანის ჰესების კასკადის მშენებლობაზე ნებართვა 2015 წელს გაიცა, რომლის გაუქმებასაც პროტესტანტები ითხოვდნენ.
საქართველოს მთავრობამ, მათ შორის ეკონომიკის მინისტრმა ნათია თურნავამ არაერთი შეხვედრა გამართა პროტესტანტებთან, თუმცა, შედეგი ამ კომუნიკაციამ არ გამოიღო.
ნამახვანის ჰესების კასკადი ორ ჰესს მოიცავს – ტვიში-ჰესი 100 მგვტ დადგმული სიმძლავრით, რომლის სიმაღლე 60 მეტრი იქნება და ნამახვანი-ჟონეთის ჰესი – 333 მგვტ დადგმული სიმძლავრით, რომელიც 111 მეტრი იქნება. საერთო სიმძლავრე 433 მეგავატი. წლიური გამომუშავება 1500 გგვტ.სთ, რაც კომპანია “ენკას” გათვლით, წლიური მოხმარების 12 პროცენტს მიაღწევდა.