ძნელი წარმოსადგენია, მაგრამ გაზი უკრაინაში უფრო ძვირია, ვიდრე ევროპაში, სადაც ის მრავალწლიან რეკორდებს ხსნის - ამის მიზეზი ისაა, რომ ევროპა გაზს გრძელვადიანი, ხოლო უკრაინა მოკლევადიანი კონტრაქტებით ყიდულობს.

„შესაბამისად, ევროპაზე ფასის ცვლილებები ეტაპობრივად აისახება, ხოლო უკრაინაზე - მყისიერად“, – განაცხადა უკრაინის შუშის მრეწველობის ფედერაციის თავმჯდომარემ დმიტრი ოლეინიკმა.

ოქტომბერში ევროპის სხვადასხვა ქვეყნებში გაზის ღირებულება 500-დან 700 ევრომდე მერყეობდა, უკრაინაში კი 1100 ევრომდე ავარდა. იმის გათვალისწინებით, რომ ენერგომატარებლები ნებისმიერი საქონლის თვითღირებულებაში შედის, ეს ორმაგად ეხება უკრაინას, სადაც საწარმოთა დიდი უმრავლესობა მოძველებულია და ენერგოეფექტურობით არ გამოირჩევა. მაგრამ შეუძლებელია საქონელი უსასრულოდ გაძვირდეს - ბოლოდ და ბოლოს, მომხმარებლებს მისი შეძენის ფული არ ეყოფათ. მაშინ მწარმოებლებს ფასების შენარჩუნება მოუწევთ, თუმცა, ხარჯები მაინც გაიზრდება.

„უკრაინელი მომხმარებელი გაძვირებული საქონლის თვითღირებულებასაც კი ვერ დაფარავს. ქარხნები ნელა-ნელა გაჩერდება, ადამიანები კი უმუშევრად დარჩებიან. ბიუჯეტი ვერ შეივსება, ხარჯები გაიზრდება. მასობრივი გაკოტრება - დროის საკითხია“, - ამბობს ოლეინიკი.

მისი თქმით, უკრაინის ძირითადი ექსპორტი ნედლეულია, გადამამუშავებელი მრეწველობა კი, რომელიც ისედაც სუსტია, იმპორტზე დემპინგური ფასების პირობებში რეალური კოლაფსის წინაშე დგება - ეს კი - პირდაპირი გზაა სანედლეულო-აგრარული კოლონიისკენ.

უკრაინული პროდუქციის სავარაუდო გაძვირების თაობაზე საუბრობს სახელმწიფო ნავთობკომპანია „ნაფტოგაზიც“ - მისმა წარმომადგენელმა მაქსიმ ბილიავსკიმ განაცხადა, რომ უკრაინაში წარმოებული პროდუქცია გაძვირდება და ეს გარდაუვალია.

ამ კრიზისის თავიდან არიდების მიზნით, ოლეინიკის აზრით, აუცილებელია კონკრეტული გეგმა - კერძოდ, ქვეყანაში ენერგიის ხარჯის შეზღუდვა, გაზის მოპოვების გაზრდა და ენერგობაზრის მოწესრიგება, რაც პირველ რიგში უკრაინული ატომური მრეწველობის მმართველ სახელმწიფო კომპანიას „’ენერგოატომს“ შეეხება, რომელიც ვალებშია ჩაფლული.

სამრეწველო ფასებისგან განსხვავებით, ტარიფები მოსახლეობისთვის ფიქსირებული რჩება და 2022 წლის აპრილამდე მოქმედებს. შესაბამისად, საერთაშორისო ბაზარზე ენერგომატარებლების გაძვირების მთელი ტვირთი ეკონომიკას დააწვება. მაგალითად, 2 თვის წინ მრეწველობისთვის გაზის ღირებულება 7,9 გრივნას (0,92 ლარი) შეადგენდა, დღეს კი - უკვე 30 გრივნა (3,51 ლარი) ღირს.

თანაც, ეს ზღვარი არაა - ოლეინიკის თქმით, ახლო მომავალში კორპორაციული ტარიფი კიდევ უფრო გაიზრდება.

obozrevatel.com