საქართველოს მთავრობამ მცირე და საშუალო ჰიდროელექტროსადგურების განვითარებისთვის განახლებადი ენერგიის წყაროების მხარდაჭერის ახალი მექანიზმი დაამტკიცა. მხარდაჭერის სქემა მოიცავს შემდეგ კომპონენტებს: მხარდაჭერის პერიოდს და პრემიალურ ტარიფს. საქართველოს მთავრობის დადგენილების მიხედვით მხარდაჭერის პერიოდი განისაზღვრება სადგურის ექსპლუატაციაში შესვლისა და წარმოების ლიცენზიის (კანონმდებლობით ასეთი საჭიროების შემთხვევაში) გაცემიდან ათი წლის ვადით, წელიწადში 8 თვის (იანვარი, თებერვალი, მარტი, აპრილი,  სექტემბერი, ოქტომბერი, ნოემბერი, დეკემბერი.) განმავლობაში. ხოლო პრემიალური ტარიფი შეადგენს 1 კვტ.სთ-ისთვის 0.015 აშშ დოლარს. პრემიალური ტარიფი გადაიხდება საქართველოს ეროვნულ ვალუტაში.

საქართველოს ენერგეტიკის ყოფილი მინისტრი და ექსპერტი ენერგეტიკის საკითხებში დავით მირცხულავა აცხადებს, რომ ენერგიის წყაროების მხარდაჭერის ახალი მექანიზმი ენერგეტიკაში ახალი ინვესტიციების მოზიდვას შეუწყობს ხელს, რაც მისი თქმით ქვეყნის ეკონომიკისთვის უმნიშვნელოვანესია. ენერგეტიკოსი დარწმუნებულია, რომ სტიმულირების ახალი მექანიზმით ქვეყანაში მრავალი პროექტი განვითარდება.

„სტიმულირების მექანიზმის შემუშავებაზე საუბარი  პოზიტიურია. გვახსოვს, რომ  გრძელვადიანი ელექტროენეგრიის შესყიდვის შემდეგ გამოცხადებული იყო მორატორიუმი, რომელიც ხანგძლივი დროით გადაიდო, ამან საინვესტიციო კლიმატზე უარყოფითად იმოქმედა. ამის შემდეგ ბუნებრივია იდგა საკითხი, რომ გარკვეული სტიმულირების მექანიზმი შემუშავებულიყო. მსოფლიოში უამრავი სტიმულირების მექანიზმია გამოყენებული და დღეს ეკონომიკისა და მდგრადი განვითარების სამინისტრო შეჩერდა ისეთ მექანიზმზე, რომელზეც ისაუბრეს მთავრობის სხდომაზე. ეს არის გარკვეული დანამატის არსებობა, რომელიც დასაბუთებულ პროექტს დიდი ალბათობით ლიკვიდურს გახდის. როდესაც გაყიდულ ენერგიაზე, გარკვეული დანამატი იქნება ეს სამომავლოდ ინვესტიციებს წახალისებით. აქედან გამომდინარე მხარდაჭერის სქემა განახლებადი ენერგიის პროექტებისთვის განვითარებისთვის მნიშვნელოვანია. ძალიან ბევრ ქვეყანას აქვს ანალოგიური მექნიზმები, მექანიზმები განსხვავდება ერთმანეთისგან ქვეყნების მიხედვით, ჩვენთან ეს მექანიზმი შეიქმნა და ვფიქრობ, რომ პოზიტიურად იმოქმედებს განახლებადი ენერგეტიკის განვითარებაზე და საინვესტიციო კლიმატზე, რაც ქვეყნის ეკონომიკისთვის უმნიშვნელოვანესია“, - აცხადებს დავით მირცხულავა.

ბაჩო ადამია