საფრანგეთი სრულად დამოუკიდებელი უნდა იყოს დამცავი პირბადეების წარმოების კუთხით, - lefigaro-ს ინფორმაციით, ამის შესახებ საფრანგეთის პრეზიდენტმა ემანუელ მაკრონმა პირბადეების საწარმოში სტუმრობისას განაცხადა.

მისი თქმით, აპრილის ბოლოს საფრანგეთში პირბადეების წარმოება 10 მილიონამდე გაიზრდება. მკრონის განცხადებით, საფრანგეთი დამცავი აღჭურვილობის წარმოების კუთხით არავიზე უნდა იყოს დამოკიდებული.

„საფრანგეთში, ჩვენს მიწაზე კიდევ უფრო უნდა გავზარდოთ წარმოება, რომ არავიზე ვიყოთ დამოკიდებულები. კრიზისამდე 3.5 მილიონ პირბადეს ვაწარმოებდით, აპრილის ბოლოს ეს მაჩვენებელი 10 მილიონამდე გაიზრდება. მსურს, რომ წლის ბოლოსთვის ჩვენ აბსოლუტურად დამოუკიდებლები ვიყოთ ამ კუთხით“, - განაცხადა მან.

საფრანგეთის პრეზიდენტმა ასევე ისაუბრა რესპირატორების წარმოებაზე და აღნიშნა, რომ ამ მიზნებისთვის შეიქმნება კონსორციუმი, რომელიც მაისისთვის 10.000 რესპირატორის წარმოებას უზრუნველყოფს.

„ამ ყველაფრის დასაფინანსებლად მთავრობა საზოგადოებრივი ჯანდაცვისთვის 4 მილიარდ ევროს გამოყოფს, რათა შევუკვეთოთ პირბადეები, რესპირატორები, მედიკამენტები. აღნიშნული ცხადყოფს სახელმწიფოსა და მისი ფინანსური რესურსების მობილიზებას“, - დასძინა მან.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

imedinews.ge