სემეკი ივლისიდან საყოფაცხოვრებო მომხმარებლებისთვის ელექტროენერგიის მიმწოდებლის ცვლილებასთან დაკავშირებით განცხადებას ავრცელებს და ტარიფების შესაძლო ცვლილებას კატეგორიულად უარყოფს.
სემეკში აცხადებენ, რომ ტარიფების მატებასთან დაკავშირებით ზოგიერთი პოლიტიკური პარტიის წარმომადგენლის მიერ, საკუთარი პოლიტიკური მიზნებისთვის გავრცელებული არასწორი ინფორმაცია საზოგადოების შეცდომაში შეყვანის მიზანმიმართულ მცდელობას წარმოადგენს. მათივე აზრით ტარიფების მატებაზე გავრცელებული დეზინფორმაციის მიზანს ელექტროენერგეტიკული ბაზრის ლიბერალიზაციის პროცესის შეფერხება წარმოადგენს.
ენერგეტიკული ბაზრის ლიბერალიზაციის პროცესის ფარგლებში ივლისიდან თბილისის მოსახლეობას ელექტროენერგიით „თალასის“ ნაცვლად „თელმიკო“ ხოლო რეგიონებში „ენერგო-პრო ჯორჯიას“ ნაცვლად „ეპ ჯორჯია მიწოდება“ მოამარაგებს.
ელექტროენერგიის საყოფაცხოვრებო ტარიფი 3.5 თეთრით მიმდინარე წლის 1-ლი იანვრიდან გაიზარდა, თუმცა მთავრობის გადაწყვეტილებით იმ აბონენტებს, რომლებიც თვეში 300 კვტ/სთ-ზე ნაკლებს ხარჯავენ, ასეთი კი მომხმარებლის 95%-ა, ნაზარად სხვაობას 2022 წლამდე ბიუჯეტი დაუსუბსიდირებს.