„ჩვენ არ ვთვლით, რომ ბოდიში გვაქვს მოსახდელი. ზოგადად არ გვაქვს ბოდიში მოსახდელი იმიტომ, რომ ჩვენ გვაქვს ძალიან მაღალი სტანდარტი გამჭვირვალობის, ობიექტურობის“, - განაცხადა რადიო თავისუფლების „დილის საუბრებში“ „სამართლიანი არჩევნებისა და დემოკრატიის საერთაშორისო საზოგადოების“ აღმასრულებელმა დირექტორმა, ელენე ნიჟარაძემ. მისი თქმით, ხმის პარალელური დათვლის შედეგების შესწავლა და ხარვეზის გამოვლენა ორგანიზაციის მაღალი პასუხისმგებლობის მაჩვენებელია:
„აღარ დავიწყებ ეხლა იმაზე საუბარს, რამდენად შოკისმომგვრელი ფაქტი იყო და ასე შემდეგ. ფაქტია იყო ხარვეზი. მიუხედავად იმისა, რომ ჩვენი შეფასებით ეს არანაირ გავლენას არ ახდენდა იმ შედეგებზე, რაც ყველასთვის მნიშვნელოვანია, კონკრეტულად მანდატების რაოდენობაზე და ამ შემთხვევაში ჩვენი და ცესკოს მონაცემები აბსოლუტურად ერთმანეთს ემთხვეოდა, პირველი ტურის შედეგებზეა ამ შემთხვევაში საუბარი, ამაზე განსხვავებული პოზიცია არც ყოფილა, რომ საზოგადოებისთვის უნდა მიგვეწოდებინა ეს ინფორმაცია. იმიტომ რომ საზოგადოებას ჰქონდა უფლება სცოდნოდა, რომ რაღაცა ხარვეზი არის დაშვებული. შესაბამისად გვესმის, რომ ძალიან მძიმე იქნებოდა საზოგადოებისთვის ამ ინფორმაციის მიღება, ძალიან არასასიამოვნო მოსასმენი, ვიღაც გაბრაზდებოდა, ვიღაც იმედგაცრუებული დარჩებოდა, მაგრამ საზოგადოებამ უნდა იცოდეს სიმართლე. ეს არის მთავარი სტანდარტი“, - განაცხადა რადიო თავისუფლების „დილის საუბრებში“ ელენე ნიჟარაძემ. მისი თქმით, ორგანიზაციის მთავარი ამოცანა ამ ეტაპზე არის პასუხი გასცეს ყველა შეკითხვას, რომელიც ხმის პარალელური დათვლის ხარვეზთან დაკავშირებით არსებობს.
11 დეკემბერს ცნობილი გახდა, რომ არასამთავრობო ორგანიზაცია "სამართლიანმა არჩევნებმა" 2020 წლის საპარლამენტო არჩევნების ხმების პარალელური დათვლის შედეგები აუდიტის შედეგად გამოვლენილი ხარვეზის საფუძველზე შეასწორა, რის შემდეგაც მმართველი პარტიის მიერ მიღებული ხმების რაოდენობა პროცენტულად გაიზარდა 45.8% -დან 47.6%-მდე.
ამ ინფორმაციის გავრცელების შემდეგ მმართველი პარტიის წარმომადგენლები აცხადებენ, რომ ოპოზიციის მთავარი ბრალდება, თითქოს არჩევნები გაყალბდა, უსაფუძვლოა.
www.radiotavisupleba.ge
„სამართლიანი არჩევნებისა და დემოკრატიის საერთაშორისო საზოგადოება“ 
