14 დეკემბერს ესპანეთის ეროვნულმა პოლიციამ ვინმე ალექსეი შიროკოვის ვილას ქალაქ ალიკანტეს ერთ-ერთი ელიტურ რაიონში მიაკითხა და ის, მეუღლესთან ერთად დააპატიმრა.

თავად შიროკოვს ეს დიდად არ გაკვირვებია. რამდენიმე თვის წინ ინფორმატორებმა ის გააფრთხილეს, რომ ორგანიზებულ დანაშაულთან ბრძოლის დეპარტამენტი მის დაპატიმრებას გეგმავდა. თუმცა, ეს პირველი ასეთი გაფრთხილება არ ყოფილა, ამიტომაც 50 წლის რუსი იურისტი მშვიდად აგრძელებდა ცხოვრებას კომფორტ-კლასის დახურულ რაიონში, რომელსაც ადგილობრივები „რუსულ სამოთხეს“ უწოდებდნენ.

შიროკონვი ძირითადად უძრავი ქონების სფეროში და სამეწარმეო საკითხებში კონსულტაციებით იყო დაკავშირებული და ეს მისთვის ძალიან სარფიანი საქმე იყო - „რუსული სამოთხე“ ალიკანტეს ყველაზე ძვირადღირებული ვილებით გამოირჩევა, და იქ  ყოველი მეოთხე რუსი ცხოვრობს - სწორედ ამიტომაა ის „რუსული სამოთხე“.

შიროკოვის გარდა პოლიციამ კიდევ 25 ადამიან დააკავა და მათ უმრავლესობა - რუსები არიან. თუმცა, დაპატიმრებულებს შორის რამდენიმე ესპანელიც არის - პოლიციის ოფიცრები და ქალაქ ალიკანტეს მერიის თანამშრომლები.

ესპანეთის პოლიცია დარწმუნებულია, რომ შიროკოვის დაპატიმრებით ესპანეთში აშენებული რუსული იმპერია, თავისი ლუქს-კლასის აპარტამენტებით, ვილებით, სასტუმროებით და ღამის კლუბებით დაინგრა. მთელის ეს ქონება რუსეთში ნაშოვნი ბინძური ფულით აშენდა.

შიროკოვი, რომელიც თავს ქველმოქმედებით და რუსული მართლმადიდებლური ეკლესიის მხარდაჭერით იწონებდა, წლების მანძილზე ფულის გათეთრების მეფედ იქცა. მას ამ საქმეში რამდენიმე რუსი პარტნიორი ეხმარებოდა.

„მათ კომპანიებში, რომლებიც ძირითადად გართობის და უძრავი ქონების დარგებში მუშაობდნენ, რუსული მაფია იარაღით და  ნარკოტიკებით ვაჭრობით, სახელმწიფო საწარმოების თაღლითური პრივატიზაციის გზით მოპოვებულ მილიარდებს აბანდებდა“ - ნათქვამია ესპანეთის პოლიციის განცხადებაში.

დაკავებული ესპანელი მაღალჩინოსნები თავს შიროკოვის მეგობრებად თვლიდნენ, და აცხადებდნენ, რომ მის უკანონო საქმიანობის შესახებ არაფერი იცოდნენ“ - განაცხადა ერთ-ერთმა გამომძიებელმა.

მაგრამ როგორც მინიმუმ რამდენიმე შემთხვევაში ფაქტები სხვა რამეზე მეტყველებენ - მაგალითად, ალიკანტეს პოლიციის უცხოელებზე ზედამხედველობის დეპარტამენტის ერთ-ერთი მაღალჩინოსანი შიროკოვის კლიენტებს ვიზების და ბინადრობის უფლების მიღებას უმარტივებდა.

კორუმპირებული საჯარო მოხელეები მაფიას ინფორმაციასთან წვდომაში ეხმარებოდა, განსაკუთრებით იმ ტერიტორიების შესახებ, სადაც მაფიოზები სამშენებლო პროექტების რეალიზებას გეგმავდნენ.

ესპანეთის ეროვნული პოლიციის ინფორმაციით, ალექსეი შიროკოვის სახელი რამდენიმე გამოძიებაში უკვე ფიგურირებდა, თუმცა, კრიმინალურ დაჯგუფებებთან მისი კავშირის დამტკიცება წლების მანძილზე ვერ ხერხდებოდა.

„ის სანდო ადამიანი ჩანდა, მან განათლება ესპანეთში მიიღო, თუმცა, ასეა თუ ისე, მაინც რუსი იყო, ამიტომაც იდეალური მოკავშირე იყო იმათთვის ვისაც ესპანეთში ფულის ჩადება სურდა“ - აღნიშნეს გამომძიებლებმა.

სქემა შემდეგნაირად მუშაობდა  - საეჭვო მილიარდების მფლობელები ესპანეთში დასასვენებლად, ძირითადად იბიცაზე ან ალიკანტეში ჩამოდიოდნენ. შემდეგ ისინი უფრო დიდი  ხნით ბრუნდებოდნენ და ესპანეთში საკუთარ კაპიტალებს აბადნებდნენ.

„ისინი ძირითადად ღამის კლუბებს და სასტუმროებს ყიდულობდნენ და ყოველთვის ყველაზე ძვირიანს და ლუქს-კლასის“ - განაცხადა ერთ-ერთმა გამომძიებელმა.

18 ჩხრეკის დროს პოლიციამ 1,3 მლნ. ევრო ნაღდი ფული, 6 პისტოლეტი, 2 თოფი, ავტომატი, მაყუჩიანი სნაიპერული შაშხანა და ათასობით სხვადასხვა კალიბრის ვაზნა ამოიღო. გარდა ამისა, მათ ხელში კრიპტოვალუტის ვირტუალური საფულეები, ბრილიანტები და 16 ძვირადღირებული ავტომობილი აღმოჩნდა. საბოლოდ პოლიციამ რამდენიმე ათეული მილიონი ევროს ქონება დააყადაღა.

თუმცა, პოლიციის ინფორმაციით, ჯერ არაფერი დასრულებულა - გამოძიება რუსული მაფიის წინაამღდეგ ესპანეთის კიდევ რამდენიმე ქალაქში მიმდინარეობს.

elpais.com