საქართველოს რეალური მშპ-ს მოსალოდნელი ზრდა 2022 წელს 6.1%-ს შეადგენს, ასევე მოსალოდნელია ინფლაციის კლება შემდეგ 6 თვეში, წინა წლის შესაბამის პერიოდთან შედარებით. ამის შესახებ PMCG-ის კვლევაშია აღნიშნული, რომელიც 2022 წლის ივნისში ჩატარდა და მასში მონაწილეობა 60-მა ქართველმა ექსპერტმა მიიღო.

გამოკითხვის შედეგების თანახმად, 2022 წლის მეორე კვარტალში საქართველოს ეკონომიკური კლიმატი გაუმჯობესდა როგორც 2022 წლის პირველ კვარტალთან, ასევე 2021 წლის მეორე კვარტალთან შედარებით. უფრო კონკრეტულად, ქართული ლარი ამჟამად ზედმეტად არის შეფასებული აშშ დოლარის, ევროსა და რუსული რუბლის მიმართ და ნაკლებად არის შეფასებული გაცვლითი თურქული ლირის მიმართ. გარდა ამისა, უახლოეს ექვს თვეში მოსალოდნელია ექსპორტის და იმპორტის მოცულობის ზრდა გასულ ექვს თვესთან შედარებით, თუმცა ექსპორტის მოცულობა, სავარაუდოდ უფრო ნაკლებად გაიზრდება, ვიდრე იმპორტისა, რაც გამოიწვევს სავაჭრო ბალანსის გაუარესებას მომდევნო ექვს თვეში გასულ ექვს თვესთან შედარებით.

„გამოკითხულ ეკონომისტთა 94% ეთანხმება საქართველოს ეროვნული ბანკის მიერ 2022 წლის 11 მაისს მიღებულ გადაწყვეტილებას მკაცრი მონეტარული პოლიტიკის შენარჩუნებისა და მონეტარული პოლიტიკის განაკვეთის უცვლელად, 11%- ზე, დატოვების თაობაზე. გარდა ამისა, ეკონომისტებმა გამოთქვეს ვარაუდი, თუ საიდან მიიღებდა საქართველოს ეკონომიკა ყველაზე მძიმე ზიანს გრძელვადიან პერსპექტივაში, მას შემდეგ, რაც ომის მყისიერი ეფექტების შეფასება უკვე შესაძლებელი იყო.

გამოკითხულთა 94% ფიქრობს, რომ ეს კონფლიქტი მნიშვნელოვან დარტყმას მიაყენებს საქართველოს სასურსათო უსაფრთხოებას. ასევე, ეკონომისტების დიდი ნაწილი (71%) თვლის რომ ექსპორტები არის არხი, რომლის გავლითაც ამ ომმა შესაძლოა საქართველოს ეკონომიკას გრძელვადიან პერსპექტივაში მნიშვნელოვანი ზიანი მიაყენოს. ამავდროულად, რესპონდენტები ნაკლებად მოელიან რომ ომი საქართველოს ეკონომიკაზე გაცვლითი კურსისა და ფულადი გზავნილების კუთხით იქონიებს გავლენას. ეკონომისტებმა ასევე შეაფასეს საქართველოს რუსეთზე დამოკიდებულების არხები. ეკონომისტთა 65%-ი თვლის რომ ტურიზმის სექტორში საქართველოს დამოკიდებულება რუსეთზე მაღალია.

გამოკითხულთა 59% მიიჩნევს, რომ მაღალია საქართველოს სურსათის იმპორტის დამოკიდებულება რუსეთზე. ასევე 59% თვლის რომ საქართველოდან ექსპორტი მნიშვნელოვნად არის დამოკიდებული რუსეთის ბაზარზე. ამასთანავე, რესპონდენტებს სთხოვეს შეეფასებინათ შესაძლო სტრატეგიული შესაძლებლობები, რომლებიც, გარდა უარყოფითი გავლენისა, ასევე გაჩნდა საქართველოსთვის რუსეთ-უკრაინის ომის შედეგად მომხდარი გეოპოლიტიკური ძვრების ფონზე. რესპოდენტთა 82% ფიქრობს, რომ ყველაზე დიდ ეკონომიკურ სარგებელს საქართველო ევროკავშირთან ინტეგრაციის დაჩქარების შესაძლებლობის გამოყენების შედეგად მიიღებს“, -აღნიშნულია კვლევაში.