აზიის განვითარების ბანკმა (ADB) ეკონომიკური ზრდის მოლოდინი კავკასიისა და ცენტრალური აზიისთვის 3.6%-დან 3.8%-მდე გაზარდა, რადგან ქვერეგიონის ზოგიერთმა ეკონომიკამ რუსეთის მიერ უკრაინაში შეჭრის უარყოფით გავლენას მოსალოდნელზე უკეთ გაუძლო. სუბრეგიონული ეკონომიკური ზრდის პროგნოზები გადაიხედა 4.0%-დან 4.1%-მდე 2023 წლისთვისაც. ეს გაუმჯობესებული პერსპექტივები ძირითადად აისახება საქართველოს, სომხეთის, აზერბაიჯანის და ტაჯიკეთის შემთხვევებში, რომლებმაც ყველაზე უკეთ გაუძლეს უკრაინის ომის ეკონომიკურ შედეგებს, ვიდრე ეს მოსალოდნელი იყო.

საქართველოს ეკონომიკა პირველ კვარტალში გაიზარდა 14.4%-ით, რაც გამოწვეული იყო სერვისისა და დამუშავების სექტორის ზრდით. 54,3%-ით მოიმატა უცხოეთიდან ფულადმა გზავნილებმა, ტურისტული ნაკადი კი 2022 წლის პირველ 5 თვეში წლიურად 258%-ით გაიზარდა. მაისში ფულადი გზავნილები რუსეთის ფედერაციიდან თითქმის გაათმაგდა მისი მოქალაქეების შემოდინების გამო.

სომხეთის ეკონომიკა 2022 წლის პირველ კვარტალში 8,6%-ით გაიზარდა და დარჩა ძლიერი აპრილში. შემომავალი ფულადი გადარიცხვები დაკავშირებულია უცხოელი ვიზიტორების შემოდინებაზე, მათ შორის ბიზნესის დივერსიფიკაცია მოხდა რუსეთის ფედერაციის წინააღმდეგ სანქციების გამო, გაიზარდა კერძო მოხმარება და მოხდა მომსახურების სექტორის ამაღლება.

აზერბაიჯანის ეკონომიკა 2022 წლის მაისში 7,2%-ით გაიზარდა, რაც ნავთობის სექტორის ზრდამ გამოიწვია. მშენებლობის სექტორი კი 5 წლიანი ვარდნის შემდეგ 5.2%-ით გაიზარდა. 

ტაჯიკეთის ეკონომიკა პირველ კვარტალში 7.5%-ით გაიზარდა ინვესტიციების 9.6%-ით გაფართოების ხარჯზე.

2022 წლის ზრდის პროგნოზები ყირგიზეთის რესპუბლიკის, თურქმენეთისა და უზბეკეთისთვის უცვლელი რჩება.

ყაზახეთში, ქვერეგიონის უდიდეს ეკონომიკაში, მშპ გაიზარდა 4.4%-ით 2022 წლის პირველ 4 თვეში, ნავთობის წარმოების 5.1% ზრდის ფონზე. ყაზახეთის ნავთობის წარმოება სავარაუდოდ, გაფართოვდება, რადგან ნავთობის ექსპორტიორი ქვეყნები თანხმდებიან წარმოების კვოტების გაზრდაზე. თუმცა ომმა ყაზახეთზე უარყოფითი გავლენა იქონია ისეთ სფეროებში, როგორიცაა ვაჭრობა, ინვესტიციები, ვალუტის კურსი და საბანკო სექტორი. მიუხედავად ამ მოვლენებისა, 2022 წლისთვის ყაზახეთის ეკონომიკის ზრდის პროგნოზები უცვლელი რჩება და 3.2%-ია, ხოლო 2023 წლისთვის 3.9%.

ინფლაციის პროგნოზები კავკასიასა და ცენტრალურ აზიაში 2022 წლისთვის 8.8%-დან 11.3%-მდე გაიზარდა და 7.1%-დან 8.1%-მდე 2023 წლისთვის. საქონლის გლობალური ფასების შემდგომი ზრდა და მიწოდების ჯაჭვის შეფერხებები უკრაინაში ომის გამო უკვე გავრცელებულ ინფლაციურ ზეწოლას დაემატა. ინფლაციის პროგნოზი გაიზარდა საქართველოს, აზერბაიჯანის, ყაზახეთის და უზბეკეთის შემთხვევაში. საქართველოში საშუალო წლიური ინფლაცია გაიზარდა მაისში 12.7%-მდე, რაც გამოწვეულია საკვების, ტრანსპორტის და კომუნალური მომსახურების ფასების ზრდის მიზეზით. აზერბაიჯანის ინფლაცია მაისში 12.6%-მდე გაიზარდა, რაც გამოწვეულია სურსათის გაძვირების გამო.  ყაზახეთში საშუალო წლიური ინფლაცია დაჩქარდა იმავე თვეში 11.3%-მდე, ხოლო სურსათზე ფასები გაიზარდა 14.5%-მდე.  უზბეკეთში ინფლაცია პირველ 5 თვეში 10,2%-მდე გაიზარდა.