2021 წლის ეკონომიკური ზრდა ბიზნესის საქმიანობაზეც პოზიტიურად აისახა. იშვიათი გამონაკლისის გარდა, თითქმის ყველა სექტორში ბიზნესმა შვება იგრძნო. კომპანიების წარმომადგენლები ,,კომერსანტთან“ მიღწეულ შედეგზე საუბრობენ, თუმცა ჰორეკა სექტორი კვლავ რჩება დარგად, სადაც მდგომარეობა ისევ მძიმეა და უარყოფითი დინამიკა ჯერჯერობით უცვლელია.
2021 წლის მიღწევებით განსაკუთრებით ღვინის ინდუსტრია გამოირჩევა. როგორც ,,ჯაყელების მარნის“ დამფუძნებელი, მეწარმე ზაზა ჯაყელი ამბობს, პანდემიის გავლენა ამ მიმართულებით სუსტია, თუმცა სწორედ ჯანდაცვის საკითხების მოგვარებაა მთავარი პირობა, რაც ბიზნესს მეტი განვითარების შესაძლებლობას მისცემს.
,,ეკონომიკურ ზრდას ჩემს საქმიანობაში ვგრძნობ, გულახდილი ვიქნები და ამას ვერ უარვყოფ. მსხვილი ბიზნესის შესაძლებლობა ამ მხრივ გაცილებით მეტია, თუმცა დადებითი მდგომარეობაა მცირე მეწარმეობაშიც, კერძოდ, მეღვინეობის სფეროში. ჩვენ ბიოლოგიურად სუფთა, მცირე მოწულობის პროდუქციას ვაწარმოებთ და პანდემიურ პერიოდშიც არ შეგვქმნია პრობლემა. თუმცა ბიზნესს მეტი სტაბილურობისთვის სჭირდება, რომ კორონაზე ნაკლებად იყოს დამოკიდებული. ეს პრობლემა რომ მოგვარდეს, სახელმწიფომაც მეტად უნდა გააძლიეროს თავისი როლი, რაც შეიძლება მეტი რეკლამა გაუწიოს ჩვენს პროდუქციას ქვეყნის გარეთ. ისე გამოდის, რომ ჯერჯერობით ჩვენ თვითონ ვავითარებთ დარგს, მაგრამ მთავარია, რომ ქვეყნის ეკონომიკური მდგომარეობა ამის საშუალებას გვაძლევს“, - ამბობს ჯაყელი.
ქვეყნის ეკონომიკურ მიღწევებს დადებიტად აფასებს ცხოველების კომბინირებული საკვების მწარმოებელი უმსხვილესი კომპანია „ნუტრიმაქსის“ წარმომადგენელი რეზო ლაფაჩი.
,,პანდემია, ზოგადად, ცუდად მოქმედებდა ბიზნესზე, სტრესული გარემო იყო და რამდენიმე დიდი წარმოება გაჩერდა კიდეც, მთლიანობაში ცხოველთა კვების ბაზარი განვითარდა. ეკონომიკაშიც თანდათან გამოსწორდა ვითარება, რაც ბევრმა ბიზნესმა იგრძნო. ამის შედეგია ისიც, რომ პანდემიის მიუხედავად, ეკონომიკასთან ერთად, ჩვენც ვიზრდებით. 2021 წელს, პანდემიამდელ პერიოდთან შედარებით, 35-40%-იანი ზრდა გვაქვს. ადგილობრივ ბაზარზე ჩვენი პროდუქციის წილი 60%-ა, სომხეთის ბაზარზე 20%-ით ვართ წარმოდგენილი, 10-15% - აზერბაიჯანში. ასევე ექსპორტზე გავდივართ აფრიკაში“, - ამბობს ლაფაჩი ,,კომერსანტთან“.
თუმცა, ჰორეკა სექტორში შექმნილი ვითარება რადიკალურად განსხვავებულია. სფერო პანდემიის გამო დიდ დანაკარგს განიცდის. როგორც „რესტორატორთა ასოციაციის“ დამფუძნებელი შოთა ბურჯანაძე ამბობს, შემცირებულია სამუშაო ადგილებიც და მომხმარებელთა რაოდენობაც.
,,ეკონომიკური ზრდის ფონზე დარგი განიცდის კრიზისს. სამწუხაროდ, ,,მწვანე პასპორტი“ რასაც უნდა ემსახურებოდეს და რა მისიაც უნდა გააჩნდეს, ვერ ასრულებს. ის ვერ გახდა საზოგადოებისთვის ბიძგის მიმცემი, რომ იმუნიზაციის პროცესის დაჩქარებისთვის შეეწყო ხელი. მთლიანად სარესტორნო ბიზნესმა დაკარგა თანამშრომელთა დიდი ნაწილი, განახევრდა მათი რაოდენობა. კარგია, რომ ეკონომიკა ვითარდება, მაგრამ ისეთი პირობები უნდა შეიქმნას, რომ კოვიდვითარება ბიზნესისთვის არ იყოს დაბრკოლება. ეს მოცემულობა როგორმე უნდა შეიცვალოს“, - ამბობს შოთა ბურჯანაძე.
საქსტატის მიერ გამოქვეყნებული ანგარიშის თანახმად, 2021 წლის დეკემბერში საქართველოს ეკონომიკა 9.6%-ით გაიზარდა, ხოლო მთელი წლის ჯამურმა ზრდამ, წინასწარი მონაცემებით, 10.6% შეადგინა.
საქართველოში ორნიშნა ზრდის ფორმირებაზე მთავარი გავლენა მოახდინა ე.წ. საბაზო ეფექტმა, რადგანაც ზრდა წინა წლის ანალოგიური პერიოდის მაჩვენებელს დარდება, 2020 წლის ანალოგიურ პერიოდში კი ქვეყანაში ლოქდაუნები და მკაცრი შეზღუდვები იყო, რის გამოც ეკონომიკა 6.8%-ით შემცირდა.
მარი ჩიტაია