ეკონომიკის ორნიშნა ზრდა და ლარის სიმყარეს მხოლოდ რუსეთის ეფექტს ვერ დავაბრალებთ, -ამის შესახებ გრიგოლ რობაქიძის სახელობის უნივერსიტეტის ბიზნესისა და მართვის სკოლის დეკანმა, პროფესორმა ვახგანგ ჭარაიამ, გიორგი აბაშიშვილის საავტორო გადაცემაში „ბიზნეს ინსაიდერი“ განაცხადა.
მისი თქმით, გლობალურმა თუ ეკონომიკურმა ცვლილებებმა საქართველოზე გარკვეული პოზიტიური ეფექტი იქონია, მაგრამ საქართველო ამისთვის წლების განმავლობაში ემზადებოდა და ბევრი ნაბიჯიც გადადგა.
„გლობალურმა თუ ეკონომიკურმა ცვლილებებმა საქართველოზე გარკვეული პოზიტიური ეფექტი იქონია. თუმცა ეს არ იყო ისე, რომ საქართველოს არაფერი არ ჰქონდა გაკეთებული და რუსეთ-უკრაინის ომმა მოგვიტანა ყველაფერი, ჩვენ ამისთვის წლების განმავლობაში ვემზადებოდით და ქვეყანამ შეძლო თუნდაც იმ მინიმალური სტანდარტის უზრუნველჰყოფა რაც საერთაშორისო ბიზნესისთვის შეეთავაზებინა. ცდილობდნენ საქართველოს ორნიშნა ეკონომიკური ზრდა რუსეთ-უკრაინის ომისთვის მიეწერათ, შეიძლება ამ შემთხვევებმა ჩვენი შესაძლებლობები კარგად გამოაჩინა, მაგრამ იმის თქმა რომ ომმა უზრუნველჰყო ეს ზრდა ძალიან გადაჭარბებულია, შეიძლება მისი წილი 1-1.5% იყო, მაგრამ ამაზე მეტი არა. მეორეს მხრივ, ინფლაციაში იმდენად დიდია ომის ფაქტორი, რომ ყველაფერი გადაფარა, მათ შორის ის 1.5%, რაც ეკონომიკურ ზრდაში მივიღეთ.
თანხების შემოდინება მნიშვნელოვანია, მაგრამ კურსის სიმყარე მარტო ამაზე ვერ იქნებოდა დამოკიდებული. წინა წლებსაც თუ შევხედავთ ეს მილიარდნახევარი ვინც შემოვიდა, ამის ნახევარი მაინც შემოდიოდა, ის მეორე ნახევარი კი რომელიც ჩვენ ნამატად გვაქვს, ის ნაწილი ისევ ქართველების შემოტანილია. ამიტომ მარტო რუსებს ვერ დავაბრალებთ, ექსპორტი ყოველთვიურად 30%-ით იზრდება თითქმის ბოლო ერთი წელია, ფულადმა გზავნილებმა 2 მილიარდს გადააჭარბა, ინვესტიციების კუთხით საკმაოდ დიდი შემოდინებები და ეს ყველაფერი ჯამში სხვა ფაქტორებთან ერთად განაპირობებს ლარის სიმყარეს.
შესაბამისად ეკონომიკის ორნიშნა ზრდას და ლარის სიმყარეს მხოლოდ რუსეთის ეფექტს ვერ დავაბრალებთ. სხვა ფაქტორებს რაც შეეხება ტურიზმი უკვე აღდგა 2019 წელთან შედარებით და ეს კარგი საფუძველი იყო ეკონომიკური ზრდისთვის. გვაქვს შიდა ეკონომიკური გამოცაცხლება. მიუხედავად ყველაფრისა ეს ეკონომიკური ზრდა, გამომდინარე იქედან რომ ჩვენი ეკონომიკა არადაბალანსებულად არის წარმოდგენილი არ უზრუნველჰყოფს იმას, რომ თითოეულ მოქალაქეზე აისახოს. ამიტომ ქვეყანას ბევრი აქვს სამუშაო, რომ სხვადასხვა განზომილებებში დაბალანსება იმ ეკონომიკური წარმატების, რაც გვაქვს აისახოს ყველა მოქალაქეზე“, — აღნიშნა ვახტანგ ჭარაიამ.