ჯანდაცვის მინისტრის ეკატერინე ტიკარაძის განცხადებით, თუ დღეს მოსახლეობის ქცევა იქნება დამყოლი იმ მოწოდებების, რაც ჯანდაცვის სამინისტროსა და დაავადებათა კონტროლის ცენტრს აქვს, ინფიცირებულთა ოდენობაზე გაკეთებული პროგნოზი იქნება ცვალებადი.
როგორც მან უწყებათაშორისი საკოორდინაციო საბჭოს სხდომის დასრულების შემდეგ განაცხადა, ეს ყველაფერი სრულად არის დამოკიდებული 3,7 მილიონი მოქალაქის კეთილსინდისიერ ქმედებაზე.
„საქართველოს მოქალაქეებს შეეზღუდებათ თუ არა მოგზაურობა, ამას ევროკავშირი გადაწყვეტს. თუ ჩვენ დღევანდელი ჭრილით განვიხილავთ იმ მდგომარეობას, რაც ევროკავშირშია, ვნახავთ, რომ ძალიან ბევრი ევროპული სახელმწიფო დღეს უკვე ლოკდაუნზე საუბრობს. აქედან გამომდინარე, მე ამ გადაწყვეტილებას დიდ მნიშვნელობას ვერ მივანიჭებდი. ეს არის ცვლადი კომპონენტი და შეიძლება ხვალიდან ამოღებული ვიყოთ იმ რისკ ქვეყნებიდან, რომელშიც დღეს და გუშინ ვიყავთ შეტანილები. რაც შეეხება ინფიცირებულთა ოდენობაზე პროგნოზს, ის რასაც დაავადებათა კონტროლის ცენტრი და ჯანდაცვის სამინისტრო აკეთებენ, ეს არის მხოლოდ პროგნოზი. სწორედ პროგნოზებიდან გამომდინარე ჩვენ მუდმივ რეჟიმში მოვუწოდებთ მოსახლეობას, რომ დაიცვან სოციალური დისტანცირება და გამოიყენონ ნიღაბი, რომელიც დღე ყველაზე ეფექტურია პანდემიასთან ბრძოლაში. თუ დღეს ჩვენი მოსახლეობის ქცევა იქნება დამყოლი იმ მოწოდებების, რაც გვაქვს, ის პროგნოზი, რასაც ჩვენ ვაკეთებთ საერთაშორისო ინსტრუმენტებზე დაყრდნობით იქნება ცვალებადი, შესაბამისად, რა თქმა უნდა, რთულია ვთქვათ, ეს რიცხვი იქნება 3 თუ 5 ათასი, ჩვენ სრულად ვართ დამოკიდებული 3,7 მილიონი მოქალაქის კეთილსინდისიერ ქმედებაზე. პროგნოზი სრულიად დამოკიდებულია თუ როგორი იქნება ჩვენი ქცევა მომდევნო დღეებში. მე არ მინდა მოსახლეობა ზედმეტად შევაშინო და ამ რიცხვს მე არ დავასახელებ. ეს რიცხვი ყველასთვის ცნობილია პროფესიულ ჭრილში. ჩვენ ვდგამთ იმ ნაბიჯებს, რომ მოსახლეობას არ შეექმნას პრობლემა მიიღონ ყველა საჭირო დახმარება მათი ჯანრთელობის კუთხით, რაც ესაჭიროებათ“, - განაცხადა ტიკარაძემ.
IPN.GE