ადამიანებს, რომლებსაც მომხმარებლის არჩევანზე ზეგავლენის მოხდენა შეუძლიათ ინფლუენსერებს უწოდებენ. მათ შეიძლება ჰქონდეთ ავტორიტეტი, ცოდნა, სამუშაო პოზიცია ან უბრალოდ კარგი ურთიერთობა აუდიტორიასთან და მომხმარებლებს მათი სწამთ ან პირდაპირ მათ ქცევებს იმეორებენ. ინფლუენსერები ხშირად აკონკრეტებენ პროდუქტის სპეციფიკაციებს და ინფორმაციას აწვდიან მომხმარებლებს ალტერნატივების შესახებ.
დროთა განმავლობაში ინფლუენსერებთან ერთად გაჩნდა ინფლუენსერ მარკეტინგიც. სხვადასხვა ბრენდმა დაიწყო ინფლუენსერებთან თანამშრომლობა, მაარკეტინგული კამპანიების ერთად დაგეგმვა და ამ გზით ცდილობენ გაყიდვებზე სტიმულირების მოხდენას. იმისათვის, რომ დღეს მომხმარებლის პროდუქტის შერჩევაზე ზეგავლენა მოახდინოთ საჭირო აღარაა იყოთ მსოფლიო დონის სელებრითი ან წარმატებული ბიზნესმენი. ადამიანებს, რომლებსაც 500-დან 2000-მდე მიმდევარი ჰყავს სოციალურ ქსელში სულ უფრო და უფრო საინტერესო ხდებიან ბიზნესებისათვის, რადგან მაღალი „engagement rate” აქვთ და ძალიან კონკრეტულ სეგმენტთან ურთიერთობენ.
echolize.com არის პლატფორმა, რომელიც ბრენდებსა თუ მარკეტინგულ სააგენტოებს აკავშირებს ინფლუენსერებთან და ზოგადად კრეატორებთან, რომლებიც რაღაც ტიპის კონტენტს ქმნიან. Echolize-ის დახმარებით პროცესში ჩართულ მხარეებს აქვთ კომუნიკაცია და მათ ავტომატურ რეჟიმში შეუძლიათ ინფლუენსერ მარკეტინგული კამპანიის დაგეგმვა და მართვა.
„ჩვენი პროდუქტის გაშვებამდე, მარკეტინგის მენეჯერებს უწევდათ კრეატორების ძებნა სოციალურ მედიაში, ფასების დადგენა და აუდიტორიის გადამოწმება. მოკლედ, რომ გითხრათ პროცესი სამართავად ძალიან მოუქნელი იყო. ამ ყველაფერს ისიც ემატებოდა, რომ კამპანიის გაშვების შემდეგ სხვა ბევრ პატარა დეტალებზე ფიქრიც უამრავ დროს და ენერგიას მოითხოვდა. ჩვენი პლატფორმა მხარეებს შორის კომუნიკაციას და ზოგადად პროცესებს ამარტივებს. ყველა მარკეტინგის მენეჯერისათვის კამპანიის დაგეგმვისა და მართვის გარდა ასევე მნიშვნელოვანია რეპორტინგის და შედეგების შეფასების ნაწილიც და ამ ყველაფერსაც Echolize სრულად ავტომატურ რეჟიმში უზრუნველყოფს. უახლოეს მომავალში გვინდა, რომ ჩვენი მხარის ჩართულობა მინუმუმამდე დავიყვანოთ და მხარეებმა მხოლოდ პლატფორმის დახმარებით დამოუკიდებლად შეძლონ ინფლუენსერ მარკეტინგული კამპანიების დაგეგმვა,“ - გვიყვება კომპანიის ერთ-ერთი დამფუქნებელი გიორგი თუშურაშვილი.
Echolize-ის პლატფორმა გაშვების პირას იყო, როდესაც სტარტაპი აქსელერაციის პროგრამაში ჩაერთო. იმ მომენტში სტარტაპისათვის ყველაზე დიდი გამოწვევა მომხმარებლების რაოდენობის გაზრდა იყო და დამფუძნებლების მთავარი მოტივაციაც სწორედ ეს ფაქტორი გახდა, რის გამოც გადაწყვიტეს 500 Startups-ის პროგრამაში მიეღოთ მონაწილეობა.
„500 Startups-თან თანამშრომლობამ ყველანაირ მოლოდინს გადააჭარბა და თამამად შემიძლია ვთქვა რომ ერთ-ერთი საუკეთესო აქსელერაციის პროგრამაა, რაც კი საქართველოში ჩატარებულა. პირველ რიგში, მივიღეთ ძალიან ბევრი ტექნიკური ცოდნა და ზოგადად საქმის მიმართ მიდგომა შევცვალეთ მივესალმები საქართველოს ბანკის ამ წამოწყებას და მომწონს მათი პოზიცია, რადგან კარგად ესმით თუ რას ნიშნავს სტარტაპებისათვის დამოუკიდებლად და თან სწრაფად განვითარება. ნამდვილად სასიამოვნოა, რომ კერძო სექტორიდან ასეთმა გამოცდილმა კომპანიამ გადაწყვიტა ამ პროცესის ხელმძღვანელობა და მოკლე დროში ყველა ერთად დავინახავთ იმ ეფექტს, რასაც 500 Startups-ის შემოყვანა მოუტანს ქართულ სტარტაპ ეკოსისტემას,“ - ამბობს გიორგი თუშურაშვილი.
სტარტაპს მომავლისთვის საკმაოდ საინტერესო გეგმები აქვს. მას შემდეგ რაც მათ პლატფორმაში ასობით კამპანია გაკეთდება შესაძლებელი იქნება “Matching algorithm” მეშვეობით არსებული ინფორმაციის დამუშავება. ეს კი სტარტაპს საშუალებას მისცემს ბრენდებს შესთავაზოს კიდევ უფრო დახვეწილი სერვისი, რაც გულისხმობს მონაცემებზე დაყრდნობით გადაწყვეტილების მიღების საშუალებას.
Echolize არის სტარტაპი, რომელიც არამხოლოდ ქმნის ახალ სერვისებს არამედ ცვლის ბაზარსაც. პლატფორმა ხელს უწყობს საქართველოში ინფლუენსერების რაოდენობის ზრდას. Echolize-ის გაშვების შემდეგ ადამიანებს გაუჩნდათ სტიმული შექმნან სხვადასხვა ტიპის კონტენტი და მათ აქვთ მოლოდინი, რომ შეძლებენ სხვადასხვა ბრენდებთან თანამშრომლობას.
უნდა აღინიშნოს რომ 500 startups -ის შემოსვლა ქვეყნისთვის მნიშვნელოვანი მოვლენაა. ეს არის პირველი პრეცედენტი, როდესაც მსოფლიოში ტოპ 3 აქსელერატორიდან ერთ-ერთი საქართველოს ბაზარზე შემოვიდა, რაც არის ქართული ტალანტისა და იდეებისთვის დიდი ნდობის გამოცხადება. 500 Startups-ის შემოსვლა შესაძლებელი გახდა საქართველოს ბანკისა და საქართველოს ინოვაციების და ტექნოლოგიების სააგენტოს მხარდაჭერით. ბანკმა პროექტის ფარგლებში, სტარტაპების ხელშეწყობის მიზნით, 1 მილიონი დოლარის მობილიზება მოახდინა, რითიც საქართველოში ფორმირებულ ბიზნესებს მისცა უნიკალური შესაძლებლობა მიიღონ საუკეთესო გამოცდილება, შექმნან ინოვაციური პროდუქტი, გავიდნენ გლობალურ ბაზრებზე და მოიპოვონ წარმატება.
(R)