ევროპის რეკონსტრუქციისა და განვითარების ბანკმა (EBRD) 2022 წლისთვის საქართველოს ეკონომიკური ზრდის პროგნოზი 8%-მდე გაზარდა. ახალი საპროგნოზო მაჩვენებელი 5 პროცენტული პუნქტით მეტია წინა პროგნოზთან შედარებით.

EBRD-ში აღნიშნავენ, რომ საპროგნოზო მაჩვენებლის ცვლილების მთავარი მიზეზი, საქართველოს საკმაოდ მაღალი ეკონომიკური ზრდა ტურიზმის სექტორის შემოსავლების თითქმის სრული აღდგენაა. გარდა ამისა, რუსული ბიზნესებისა და ICT პროფესიონალების შემოდინება საქართველოში და მათი ფულადი გზავნილები დაეხმარა ტურიზმისა და სერვისების სექტორებს, გაფართოვდა სავაჭრო დეფიციტიც, რადგანაც იმპორტისა და ექსპორტის დონე 30%-ით გაიზარდა.

ორგანიზაცია, ეროვნული ვალუტის გამყარების დადებით ფაქტორებზეც ამახვილებს ყურადღებას და აღნიშნავს, რომ ინფლაციის 12.5%-დან 10.9%-მდე შემცირების ერთ-ერთი მიზეზი ლარის გამყარებით იმპორტირებული საქონლის ფასების ზრდის გავლენის შემცირება იყო.

2023 წლისთვის კი ნავარაუდევია შედარებით უფრო სტაბილური, 5%-იანი ეკონომიკური ზრდა, რადგან რისკები კვლავ მაღალია და არსებობს ნეგატიური საგარეო შოკების საფრთხე.

საქართველოსთან ერთად EBRD-მა ზრდის პროგნოზი გაზარდა რეგიონის ქვეყნებშიც, მათ შორის სომხეთში 8%-მდე; თურქეთში 4.5%-მდე, რაც წინა პროგნოზთან შედარებით 2.5 პროცენტული პუნქტით მეტია. აზერბაიჯანის პროგნოზი კი უცვლელად 4.5%-ზე დატოვა.

უკრაინაში EBRD-ი 30%-იან რეცესიას პროგნოზირებს, ბელარუსში კი 5.5%-იანი ვარდნას. რაც შეეხება რუსეთს, აქ ეკონომიკის 5%-იანი ვარდნაა მოსალოდნელი.