2020 წელს ზეთისხილის მოსავლის 2,5-ჯერ გაზრდა კარგ ამინდთანაა დაკავშირებული - მიიჩნევს კომპანია „ქართული ზეთისხილი“-ს დამფუძნებელი გიორგი სვანიძე.
„2020 წელს ზეთისხილისთვის ძალიან კარგი ამინდები იყო, ამიტომაც მოსავალი დაახლოებით 2,5-ჯერ გაიზარდა. დღეისთვის ზუსტი ციფრი არ გვაქვს, საბოლოო მონაცემები მარტში გვექნება“ - განაცხადა მან.
მატების ერთ-ერთი ფაქტორი ასევე ზეთისხილის პლანტაციების ფართის ზრდაც იყო.
„მოსავლის აღების პერიოდში დილის 6 საათიდან ვმუშაობდით, გადამამუშავებელ საწარმოსთან ამ დროისთვის ფერმერების რიგი იდგა. ჩვენ ძალიან გვიხარია, რომ ზეთისხილის ახალი პლანტაციები იქმნება და ამ კულტურისადმი ინტერესი მკვეთრად გაიზარდა. ჩვენ რამდენიმე შეთანხმება ზეთისხილის დარგვასთან დაკავშირებით უკვე დავდეთ მაგალითად, კომპანია KTW-სთან. საუბარია ასობით ჰექტარი ზეთისხილის პლანტაციების გაშენებაზე. ასევე საქართველოს საპარტნიორო ფონდთან ვთანამშრომლობთ. რა თქმა უნდა, საკუთარ პლანტაციებსაც მუდმივად ვაფართოვებთ“ - განაცხადა გიორგი სვანიძემ.
მისი ინფორმაციით, ზეთისხილის საერთაშორისო საბჭო ( IOC) საქართველოში ამ კულტურის განვითარების დაფინანსებას გეგმავს. კერძოდ, იგეგმება სპეციალიზირებული საერთაშორისო ლაბორატორიის შექმნა, რომელიც მსოფლიო მნიშვნელობის საექსპორტო სერტიფიკატებს გასცემს და ასევე გეგმავენ საქართველოში აგრონომების გამოგზავნას. პროგრამა 10 წელზეა გათვლილი, ფინანსური რესურსების მოცულობას მეწარმე არ აზუსტებს.
„საქართველოს ძალიან კარგი გეოგრაფიული მდებარეობა აქვს. თუ აქ ზეთისხლის ინდუსტრია განვითარდა, ქართული პროდუქცია ყოფილი სსრკს-ს ქვეყნებში და ასევე ჩინეთშიც წავა. ყველა ამ სახელმწიფოსთან ჩვენ თავისუფალი ვაჭრობის რეჟიმი გვაქვს, შესაბამისად, ჩვენი ზეთისხილი იქ ტარიფების გარეშე შევა და შედარებით იაფი იქნება“ - ამბობს „ქართული ზეთისხილის“ დამფუძნებელი.
მისი თქმით, ზეთისხილის მოყვანით სულ უფრო მეტი ქართველი ფერმერი დაინტერესდა.
„მათ სხვადასხვა ზომის პლანტაციები აქვთ 5-დან 200 ჰექტარამდე. პროცესი მხოლოდ საწყის სტადიაშია. ზეთისხილის კულტივირება, საშვილიშვილო საქმეა“, - მიიჩნევს ბიზნესმენი.
„ქართული ზეთისხილი“ 11 წლის წინ შეიქმნა. ამ დროის მანძილზე კომპანიამ 1 მლნ. ზეთისხილის ხე კახეთში დარგო, ის ასევე გადამამუშავებელ საწარმოს სიღნაღის მუნიციპალიტეტში ფლობს.
„რაც მეტი ზეთისხილის პლანტაცია იქნება, მით მეტი პროდუქცია გვექნება და ეს უკეთესი პირველ რიგში მოსახლეობისთვის იქნება. დღეისთვის ჩვენ გვიჭირს მსხვილ ქსელებთან თანამშრომლობა და ექსპორტზე გასვლა, რადგანაც ჩვენ პროდუქტის საჭირო რაოდენობა არ გვაქვს“ - თქვა გიორგი სვანიძემ.
პირველ ეტაპზე სათელსე მასალა თურქეთიდან შემოდიოდა, დღეს კი ესპანეთიდან.
ბოლო დრომდე კომპანიის ძირითადი პარტნიორი თურქეთი იყო.
ზეთისხილის გადამამუშავებელ საწარმოში 100-ზე მეტი ადამიანი მუშაობს. ბიოლოგიურად სუფთა ზეითუნის ზეთი და შეფუთული ზეთისხილი მცირე რაოდენობით ექსპორტზეც გადის, ძირითადად კი შიდა ბაზარზე, „აგროჰაბის“ ქსელში იყიდება.
წყარო: east-fruit.com